ପାଲ୍ଘର୍ (ମହାରାଷ୍ଟ୍ର), ୨୪ା୫: ପେସ୍ ବୋଲର ଶାର୍ଦ୍ଦୁଳ ଠାକୁର ଶନିବାର ଆଉଟ୍ଡୋର୍ ଟ୍ରେନିଂ ଆରମ୍ଭ କରିଛନ୍ତି। କରୋନାଭାଇରସ୍ଯୋଗୁ ଲକ୍ଡାଉନ୍ରେ ଦୁଇମାସ ଘରେ ରହିବା ପରେ ପ୍ରଥମ ଭାରତୀୟ କ୍ରିକେଟର ଭାବେ ସେ ଟ୍ରେନିଂ ଆରମ୍ଭ କରିଛନ୍ତି। ଠାକୁର ଭାରତ ତରଫରୁ ଗୋଟିଏ ଟେଷ୍ଟ, ୧୧ ଅନ୍ତର୍ଜାତୀୟ ଦିନିକିଆ ଓ ୧୫ ଟି୨୦ ଖେଳିଛନ୍ତି। ମହାରାଷ୍ଟ୍ରର ପାଲ୍ଘର୍ ଜିଲା ଅନ୍ତର୍ଗତ ସ୍ଥାନୀୟ ବୈସାର ଗ୍ରାଉଣ୍ଡରେ କେତେଜଣ ଘରୋଇ ଖେଳାଳିଙ୍କ ସହ ଟ୍ରେନିଂ ଆରମ୍ଭ କରିଛନ୍ତି। ଗ୍ରୀନ ଓ ଅରେଞ୍ଜ ଜୋନ୍ରେ ବିନା ଦର୍ଶକଙ୍କ ଉପସ୍ଥିତିରେ ଷ୍ଟାଡିୟମରେ ଖେଳାଳିମାନଙ୍କୁ ବ୍ୟକ୍ତିଗତ ଭାବେ ଟ୍ରେନିଂ ପାଇଁ ଅନୁମତି ଦେଇଛନ୍ତି ମହାରାଷ୍ଟ୍ର ସରକାର। ବୈସାରେ ନେଟ୍ ସେସନ ଆରମ୍ଭ କରାଯାଇଥିବା ପାଲ୍ଘର ଦାହାନୁ ତାଲୁକା ସ୍ପୋଟର୍ସ ଆସୋସିଏଶନର ଜଣେ ଅଫିସିଆଲ କହିଛନ୍ତି। ବୈସାର ହେଉଛି ମହାରାଷ୍ଟ୍ରଠାରୁ ପାଖାପାଖି ୧୧୦ କିଲୋମିଟର ଦୂରରେ। ଏଠାରେ ପ୍ରୋଟୋକଲକୁ କଡାକଡ଼ି ଭାବେ ଅନୁପାଳନ କରାଯାଉଛି। ପ୍ରତ୍ୟେକ ବୋଲରଙ୍କୁ ନିଜସ୍ବ କୀଟାଣୁମୁକ୍ତ ବଲ୍ ବ୍ୟବହାର କରିବା ଲାଗି କୁହାଯାଇଛି। ସମସ୍ତ ପ୍ରକାର ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ଅଭ୍ୟାସ କରିବାକୁ ଆସୁଥିବା ବୋଲରମାନେ କୀଟାଣୁମୁକ୍ତ ବଲ୍ ଆଣୁଛନ୍ତି କି ନା ତାହା ପରୀକ୍ଷା କରାଯାଉଛି। ଖେଳାଳିମାନଙ୍କ ଶରୀର ତାପମାତ୍ରା ମଧ୍ୟ ଯାଞ୍ଚ କରାଯାଉଛି ବୋଲି ଅଫିସିଆଲ ଜଣକ କହିଛନ୍ତି। ଗତ ଘରୋଇ ସିଜନରେ ରଣ୍ଜୀ ପଦାର୍ପଣ କରିଥିବା ମୁମ୍ବାଇ ବ୍ୟାଟ୍ସମ୍ୟାନ ହାର୍ଦ୍ଦିକ ତାମୋରେଙ୍କୁ ମଧ୍ୟ ଏହି ଗ୍ରାଉଣ୍ଡରେ ଟ୍ରେନିଂ ନେଉଥିବା ଦେଖିବାକୁ ମିଳିଥିଲା।