ଆନନ୍ଦପୁର,୨୬।୩(ସ୍ବ.ପ୍ର.)-କେନ୍ଦୁଝର ଜିଲା ଆନନ୍ଦପୁର ଉପଖଣ୍ଡ ସ୍ପେଶାଲ ସ୍କାଡ୍ରେ କାର୍ଯ୍ୟ କରୁଥିବା ରାମଚନ୍ଦ୍ରପୁର ଥାନାର ଜଣେ ଏସଆଇ ମଙ୍ଗଳବାର ଅପରାହ୍ନରେ ସ୍ଥାନୀୟ ବ୍ରିଜ ଛକ ନିକଟରୁ ଜଣେ ଆଇନଜୀବୀଙ୍କୁ ମାଡ଼ ମାରି ଉଠାଇ ନେବା ବେଳେ ସେଠାରେ ଉପସ୍ଥିତ ଜଣେ ଭାଜପା ଯୁବନେତାଙ୍କୁ ମାଡ ମାରିବା ନେଇ ପୋଲିସରେ ଅଭିଯୋଗ ହୋଇଛି। ଆନନ୍ଦପୁର ପୋଲିସ ଏ ନେଇ ଏସ.ଆଇ. ବିଶ୍ୱଜିତ ବେହେରାଙ୍କ ନାମରେ ଦୁଇଟି ପୃଥକ ମାମଲା (ନଂ. ନଂ ୫୧/୨୦୨୦ ଏବଂ ନଂ ୫୨/୨୦୨୦) ରୁଜୁ କରିଛି। ପୋଲିସର ଏଭଳି କାର୍ଯ୍ୟକୁ ବିରୋଧ କରି ଓକିଲ ସଂଘ ସଭାପତି ସଞ୍ଜୟ ମିଶ୍ରଙ୍କ ତତ୍ତ୍ୱାବଧାନରେ ଆଇନଜୀବୀମାନେ ଥାନାକୁ ଯାଇ ପ୍ରତିବାଦ ଜଣାଇଥିଲେ। ପରେ ପୋଲିସ ମାମଲା ରୁଜୁ କରିଥିଲା। କେଉଁ କାରଣ ନେଇ ପୋଲିସ ଅଧିକାରୀ ଆଇନଜୀବୀଙ୍କୁ ରାସ୍ତାରେ ମାଡ଼ ମାରି ଥାନାକୁ ଉଠାଇ ନେଇ ପରେ ଏକ ନିର୍ଜନ ସ୍ଥାନରେ ଛାଡିଦେଲେ ସେ ନେଇ ଥାନା ପକ୍ଷରୁ କୌଣସି ସୂଚନା ଦିଆଯାଉନାହିଁ ା ଏ ସମ୍ପର୍କରେ ଆନନ୍ଦପୁର ଏସଡିପିଓ ବିଦ୍ୟୁତ୍ ଚନ୍ଦ୍ର ପଣ୍ଡା ଏବଂ ଥାନା ଆଇଆଇସି ଗଗନ ବିଶ୍ୱାଳଙ୍କୁ ପଚାରିବାରୁ ଘଟଣା ନେଇ ମାମଲା ରୁଜୁ ହୋଇଛି, ତଦନ୍ତ ପରେ ଯାହାକିଛି ସ୍ପଷ୍ଟ ହେବ ବୋଲି କହିଛନ୍ତି।