ମୁମ୍ବାଇ, ୨୪।୫: ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଆୟୋଜନ ସଂକ୍ରାନ୍ତରେ ଭାରତ ସରକାର ହିଁ ନିଷ୍ପତ୍ତି ନେବେ ବୋଲି କେନ୍ଦ୍ର କ୍ରୀଡ଼ାମନ୍ତ୍ରୀ କିରଣ ରିଜିଜୁ କହିଛନ୍ତି। ଏଥିରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର କୌଣସି ଭୂମିକା ରହିବ ନାହିଁ। ବୋର୍ଡ ଏ ସଂକ୍ରାନ୍ତରେ ନିଷ୍ପତ୍ତି ନେବ ନାହିଁ। କରୋନା ଭାଇରସ ମହମାରୀକୁ କିଭଳି ନିୟନ୍ତ୍ରଣ କରାଯାଇଛି ତାହା ଉପରେ ଆଇପିଏଲ୍ର ଭାଗ୍ୟ ନିର୍ଭର କରିବ ବୋଲି ସେ ସ୍ପଷ୍ଟ କରିଛନ୍ତି।
ସର୍ବସାଧାରଣଙ୍କ ସ୍ବାସ୍ଥ୍ୟକୁ ପ୍ରାଥମିକତା ଦିଆଯିବ। ଯଦି ଏ ନେଇ କୌଣସ ବିପଦ ନ ଥାଏ ତାହାଲେ ଆଇପିଏଲ୍ ଆୟୋଜନ ନେଇ ନିଷ୍ପତ୍ତି ନିଆଯିବ। ମହମାରୀର ସ୍ଥିତିକୁ ମଧ୍ୟ ଆକଳନ କରାଯିବ। ଯଦି ସବୁକିଛି ଠିକ୍ଠାକ୍ ଲାଗେ ତାହାଲେ ସରକାର ଏହି ଲିଗ୍ ନେଇ ନିଷ୍ପତ୍ତି ନେବେ ବୋଲି ରିଜିଜୁ ରବିବାର ଏକ ଟିଭି ଚ୍ୟାନେଲକୁ ସାକ୍ଷାତ୍କାର ଦେବା ଅବସରରେ କହିଛନ୍ତି। ଆମେ ପ୍ରକୃତରେ କୋଭିଡ-୧୯ ବିପକ୍ଷରେ ଲଢେଇ କରୁଛୁ। ଆଇପିଏଲ ଭଳି କ୍ରୀଡ଼ା ଇଭେଣ୍ଟ ଆୟୋଜନ ପାଇଁ ସାରା ଦେଶକୁ ବିପଦରେ ପକାଇବୁ ନାହିଁ। ଟି୨୦ ବିଶ୍ୱକପ୍ ଆୟୋଜନ ନ ହେଲେ ଅକ୍ଟୋବର- ନଭେମ୍ବରରେ ଆଇପିଏଲ୍ ଆୟୋଜନ କରିବାକୁ ବିସିସିଆଇ କହିଥିଲା। ଆଇପିଏଲ୍ ସହିତ ୫୩୦ ମିଲିୟନ ଆମେରିକୀୟ ଡଲାର ସାମିଲ ରହିଛି। ତେଣୁ ଏହା କେବଳ ବିସିସିଆଇ ନୁହଁ ସାରା ବିଶ୍ୱର କ୍ରିକେଟର ଓ ସେମାନଙ୍କ ବୋର୍ଡ ପାଇଁ ବେଶ୍ ଗୁରୁତ୍ୱ ବହନ କରୁଛି।