ନୂଆଦିଲ୍ଲୀ, ୧୨।୩- ବିଶ୍ୱର ସବୁଠାରୁ ବ୍ୟୟବହୁଳ ଟି୨୦ କ୍ରିକେଟ୍ ଟୁର୍ନାମେଣ୍ଟ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ଆଗାମୀ ତ୍ରୟୋଦଶ ସଂସ୍କରଣ ମାର୍ଚ୍ଚ ୨୯ରୁ ଆରମ୍ଭ ହେବ। ତେବେ ବିଶ୍ୱରେ ଆତଙ୍କ ସୃଷ୍ଟି କରିଥିବା କରୋନା ଭାଇରସ ଲାଗି କେନ୍ଦ୍ର ସରକାର ନୂଆ ଭିଜା କଟକଣା ଜାରି କରିଛନ୍ତି। ରାଜନୈତିକ ଓ ରୋଜଗାର ଶ୍ରେଣୀକୁ ଛାଡ଼ି ବଳକା ସମସ୍ତ ପ୍ରକାର ଭିଜାକୁ ଏପ୍ରିଲ ୧୫ ତାରିଖ ପର୍ଯ୍ୟନ୍ତ ବାତିଲ କରିଦେଇଛନ୍ତି। ଫଳରେ ଆଇପିଏଲ୍ର ପ୍ରାରମ୍ଭିକ ପର୍ଯ୍ୟାୟରେ ଏବେ ବିଦେଶୀ ଖେଳାଳି ଭାଗନେବା ନେଇ ଆଶଙ୍କା ପ୍ରକାଶ ପାଇଛି। ଏନେଇ ଶନିବାର ଆଇପିଏଲ୍ର ଗୁରୁତ୍ୱପୂର୍ଣ୍ଣ ଗଭର୍ନିଂ କାଉନସିଲ ବୈଠକ ବସିବାର କାର୍ଯ୍ୟକ୍ରମ ରହିଛି। ବିଭିନ୍ନ ଦେଶର ୬୦ ବିଦେଶୀ ଖେଳାଳି ଯେଉଁମାନେ କି ଆଇପିଏଲ୍ ଲାଗି ଭାରତ ଆସିବାକୁ ରହିଛନ୍ତି, ସେମାନଙ୍କ ଭିଜାକୁ ନେଇ ବିସିସିଆଇ ଚିନ୍ତାରେ ରହିଛି। ଏହି ସମସ୍ତ ଖେଳାଳିଙ୍କ ଭିଜା ରଦ୍ଦ କରାଯାଇଛି କି ନାହିଁ ତାହା ସ୍ପଷ୍ଟ ହୋଇ ନ ଥିବା ବିସିସିଆଇ ପକ୍ଷରୁ କୁହାଯାଇଛି। ଉଲ୍ଲେଖଯୋଗ୍ୟ ବର୍ତ୍ତମାନ ସୁଦ୍ଧା ବିଶ୍ୱରରେ ପାଖାପାଖି ୪ ହଜାର ଲୋକ କରୋନା ଭାଇରସ ଲାଗି ମୃତ୍ୟୁବରଣ କରିସାରିଥିବାବେଳେ ଭାରତରେ ୬୨ଜଣ ଆକ୍ରାନ୍ତଙ୍କୁ ଚିହ୍ନଟ କରାଯାଇଛି।
