ୟୁଏଇ,୨୭।୯: ଆଇପିଏଲ ୨୦୨୧ରେ ମହେନ୍ଦ୍ର ସିଂ ଧୋନୀଙ୍କ ଚେନ୍ନାଇ ସୁପର କିଙ୍ଗ୍ସ (ସିଏସକେ) ପାଇଁ ଖେଳୁଥିବା ଅଲରାଉଣ୍ଡର ମୋଇନ ଅଲି ଟେଷ୍ଟ କ୍ରିକେଟରୁ ଅବସର ନେବାକୁ ନିଷ୍ପତ୍ତି ନେଇଛନ୍ତି। ସେ ଆଉ ଇଂଲଣ୍ଡ ପାଇଁ ଟେଷ୍ଟ କ୍ରିକେଟ ଖେଳିବେ ନାହିଁ। ସେ ଖୁବ ଶୀଘ୍ର ଏକ ଆନୁଷ୍ଠାନିକ ଘୋଷଣା କରିବେ। ମୋଇନ ନିକଟରେ ଇଂଲଣ୍ଡର ଟେଷ୍ଟ ଅଧିନାୟକ ଜୋ ରୁଟ, କୋଚ କ୍ରିସ ସିଲଭରଉଡ ଏବଂ ଚୟନକର୍ତ୍ତାଙ୍କୁ ତାଙ୍କ ନିଷ୍ପତ୍ତି ବିଷୟରେ ସୂଚନା ଦେଇଛନ୍ତି। ସୀମିତ ଓଭର କ୍ରିକେଟ ଉପରେ ଧ୍ୟାନ ଦେବା ଉଦ୍ଦେଶ୍ୟରେ ମୋଇନ ଏହି ପଦକ୍ଷେପ ନେଇଛନ୍ତି। ୩୪ ବର୍ଷୀୟ ମୋଇନ ଇଂଲଣ୍ଡ ପାଇଁ ୬୪ଟି ଟେଷ୍ଟ ଖେଳିଛନ୍ତି।
ମୋଇନ ଆସନ୍ତା ମାସରେ ଟି -୨୦ ବିଶ୍ୱକପ ଏବଂ ଆସେସ ସିରିଜ ଖେଳିବା ପାଇଁ ଇଂଲଣ୍ଡ ଦଳର ଜଣେ ସମ୍ଭାବ୍ୟ ସଦସ୍ୟ ଅଟନ୍ତି। ଏପରି ପରିସ୍ଥିତିରେ ତାଙ୍କୁ ଦୀର୍ଘ ସମୟ ପର୍ଯ୍ୟନ୍ତ ଘରୁ ଦୂରରେ ରହିବାକୁ ପଡୁଛି, ଏହାକୁ ନେଇ ସେ ନିଜକୁ ଅସହଜ ମନେ କରୁଛନ୍ତି। ଏହି କାରଣରୁ ସେ କ୍ରିକେଟର ଲମ୍ବା ଫର୍ମାଟରୁ ଅବସର ନେବାକୁ ନିଷ୍ପତ୍ତି ନେଇଛନ୍ତି। ତେବେ ସେ ସୀମିତ ଓଭର କ୍ରିକେଟରେ ଇଂଲଣ୍ଡ ପାଇଁ ଖେଳିବାକୁ ଆଗ୍ରହୀ ଏବଂ କାଉଣ୍ଟି କ୍ରିକେଟ ବ୍ୟତୀତ ଫ୍ରାଞ୍ଚାଇଜ କ୍ରିକେଟ ଖେଳିବା ଜାରି ରଖିବାକୁ ଚାହୁଁଛନ୍ତି। ସେ ଏପର୍ଯ୍ୟନ୍ତ ପ୍ରଥମ ଶ୍ରେଣୀ କ୍ରିକେଟ ଖେଳିବା ଜାରି ରଖିବେ କି ନାହିଁ ସେ ନେଇ କୌଣସି ଠୋସ ନିଷ୍ପତ୍ତି ନେଇ ନାହାଁନ୍ତି।
ଇଂଲଣ୍ଡ ପାଇଁ ଟେଷ୍ଟ କ୍ରିକେଟରେ ସେ ଇଂଲଣ୍ଡର କିମ୍ବଦନ୍ତୀ ଅଲରାଉଣ୍ଡର ଇୟାନ ବୋଥାମ, ଇମ୍ରାନ ଖାନ ଏବଂ ଗ୍ୟାରି ସୋବର୍ସଙ୍କ ଅପେକ୍ଷା କମ ମ୍ୟାଚରେ ୨୦୦୦ ଟେଷ୍ଟ ରନ ଏବଂ ୧୦୦ ଉଇକେଟ ନେଇଛନ୍ତି। ୬୪ଟି ଟେଷ୍ଟରେ ସେ ୧୯୫ ଉଇକେଟ ନେଇଛନ୍ତି ଏବଂ ଇଂଲଣ୍ଡ ପାଇଁ ସର୍ବାଧିକ ଉଇକେଟ ନେଇଥିବା ତାଲିକାରେ ୧୬ତମ ସ୍ଥାନରେ ଅଛନ୍ତି। ତାଙ୍କ ଟେଷ୍ଟ କ୍ୟାରିୟରରେ ସେ ଦୁନିଆର ତୃତୀୟ ଶ୍ରେଷ୍ଠ ଅଲରାଉଣ୍ଡର ମଧ୍ୟ ହୋଇଛନ୍ତି। ଟେଷ୍ଟ କ୍ରିକେଟରେ ତାଙ୍କର ୫ ଶତକ ଏହାର ପ୍ରମାଣ। ଏଥିରୁ ସେ ୨୦୧୬ରେ ୪ଟି ଶତକ ମାରିଥିଲେ। ସେ ଏପର୍ଯ୍ୟନ୍ତ ୬୪ଟି ଟେଷ୍ଟରେ ୨୯୧୪ ରନ ସହ ୧୯୫ ଉଇକେଟ ନେଇଛନ୍ତି। ସେ ଟେଷ୍ଟରେ ୧୪ ଅର୍ଦ୍ଧଶତକ ହାସଲ କରିଛନ୍ତି। ସେ ଟେଷ୍ଟରେ ୧୦ ଓ ୫ ଥର ପାଞ୍ଚଟି ଉଇକେଟ ନେଇଛନ୍ତି।
