କୋଲକାତା, ୧୨।୧୨- ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ତ୍ରୟୋଦଶ ସଂସ୍କରଣର ଖେଳାଳି ନିଲାମୀ ପ୍ରକ୍ରିୟା ଡିସେମ୍ବର ୧୯ରେ କୋଲକାତାରେ ଅନୁଷ୍ଠିତ ହେବ। ନିଲାମ ପ୍ରକ୍ରିୟା ଲାଗି ପ୍ରାରମ୍ଭିକ ପର୍ଯ୍ୟାୟରେ ଭାରତୀୟ ଓ ବିଦେଶୀ ଖେଳାଳିଙ୍କୁ ମିଶାଇ ମୋଟ୍ ଉପରେ ୯୯୧ଜଣ ନାମ ରେଜିଷ୍ଟ୍ରେଶନ କରିଥିଲେ। କିନ୍ତୁ ଆଇପିଏଲ୍ ମ୍ୟାନେଜମେଣ୍ଟ ନିଲାମ ପ୍ରକ୍ରିୟା ଲାଗି ଚୂଡ଼ାନ୍ତ ଖେଳାଳି ତାଲିକାକୁ ୩୩୨ରେ ସୀମିତ ରଖିଛନ୍ତି। ଏହି ତାଲିକାରେ ୧୯ ଜଣ ଭାରତୀୟ ଅନ୍ତର୍ଜାତୀୟ ଖେଳାଳି ରହିଛନ୍ତି। ସେହିଭଳି ୨୪ଜଣଙ୍କୁ ନିଲାମରେ ସାମିଲ କରାଯାଇଛି। ସେମାନଙ୍କ ମଧ୍ୟରେ ଓ୍ବେଷ୍ଟଇଣ୍ଡିଜର କେସରିକ ଓ୍ବିଲିୟମ୍ସ, ଅଷ୍ଟ୍ରେଲିଆର ଡାନ୍ କ୍ରିଷ୍ଟିଆନ, ଆଡାମ ଜାମ୍ପା ଓ ବାଂଲାଦେଶର ମୁସଫିକର ରହିମ ପ୍ରମୁଖ ରହିଛନ୍ତି। ଓରିଜିନାଲ ତାଲିକାରେ ଏହି ୨୪ ଖେଳାଳିଙ୍କୁ ସାମିଲ କରାଯାଇ ନ ଥିଲା। କିନ୍ତୁ ଫ୍ରାଞ୍ଚାଇଜମାନଙ୍କ ଅନୁରୋଧ ପରେ ଆଇପିଏଲ୍ ମ୍ୟାନେଜମେଣ୍ଟ ସେମାନଙ୍କୁ ନିଲାମ ପ୍ରକ୍ରିୟାରେ ସାମିଲ କରିଛି।
ବ୍ୟାଟ୍ସମ୍ୟାନଙ୍କଠାରୁ ନିଲାମ ଆରମ୍ଭ ହେବ। ଏହାପରେ ପର୍ଯ୍ୟାୟକ୍ରମେ ଅଲ୍ରାଉଣ୍ଡର, ଉଇକେଟ୍କିପର, ଦ୍ରୁତ ବୋଲର ଓ ସ୍ପିନରଙ୍କ ନାମ ନିଲାମରେ ଡକାଯିବ। ଏହି ନିଲାମରେ ମୋଟ୍ ୭୩ଟି ସ୍ଥାନ ଲାଗି ୩୩୨ ଖେଳାଳିଙ୍କ ମଧ୍ୟରେ ଲଢ଼େଇ ଦେଖିବାକୁ ମିଳିବ। ଗ୍ଲେନ ମ୍ୟାକ୍ସଓ୍ବେଲ, କ୍ରିସ ଲିନ୍, ପ୍ୟାଟ୍ କୁମିନ୍ସ, ଜୋଶ ହାଜେଲଉଡ୍, ମିଚେଲ ଷ୍ଟାର୍କ, ଡେଲ୍ ଷ୍ଟେଇନ ଓ ଆଞ୍ଜେଲୋ ମାଥ୍ୟୁସଙ୍କ ପରି ଖେଳାଳିଙ୍କୁ ବେସ୍ ପ୍ରାଇସ ୨ କୋଟି ରଖାଯାଇଛି। ନିଲାମରେ ସାମିଲ ଥିବା ଭାରତର ୧୯ ଅନ୍ତର୍ଜାତୀୟ ଖେଳାଳିଙ୍କ ମଧ୍ୟରେ ରବିନ୍ ଉଥାପ୍ପା, ଜୟଦେନ ଉନାଡକଟ ରହିଛନ୍ତି। କୋଲକାତା ନାଇଟ୍ ରାଇଡର୍ସ ଉଥାପ୍ପାଙ୍କୁ ରିଲିଜ କରିଥିଲା। ତାଙ୍କର ବେସ୍ ପ୍ରାଇସ ୧.୫ କୋଟି ଓ ଉନାଡକଟଙ୍କ ୧ କୋଟି ମୂଲ୍ୟ ରହିଛି।