ନୂଆଦିଲ୍ଲୀ, ୧୬।୧୦ (ପି.ଟି.)- ବିବାଦୀୟ ବାଉଣ୍ଡାରୀ କାଉଣ୍ଟ ନିୟମ ପରିବର୍ତ୍ତନ କରିବା ପରେ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ଏବେ ସମାଲୋଚନାର ଶିକାର ହୋଇଛି। ନ୍ୟୁଜିଲାଣ୍ଡ ଅଲରାଉଣ୍ଡର ଜିମ୍ମି ନିଶାମ ଏ ନେଇ ଆଇସିସିକୁ ସମାଲୋଚନା କରିବା ସହ ପରିହାସ କରିଛନ୍ତି। ପୂର୍ବରୁ ଥିବା ବାଉଣ୍ଡାରୀ କାଉଣ୍ଟ ନିୟମ କାରଣରୁ ନ୍ୟୁଜିଲାଣ୍ଡ ଗତ ଦିନିକିଆ ବିଶ୍ୱକପ୍ ଫାଇନାଲ ମ୍ୟାଚ୍ରେ ଇଂଲଣ୍ଡଠାରୁ ପରାସ୍ତ ହୋଇ ରନର୍ସଅପ୍ ହୋଇଥିଲା।
ଉଲ୍ଲେଖଥାଉ କି, ଆଇସିସି ସୋମବାର ସବୁ ମେଜର ଇଭେଣ୍ଟ ତଥା ଟୁର୍ନାମେଣ୍ଟରେ ସୁପର ଓଭର ନିୟମରେ ପରିବର୍ତ୍ତନ ଆଣିଥିଲା। ଏହି ନିୟମ କାରଣରୁ ଗତ ଜୁଲାଇରେ ଅନୁଷ୍ଠିତ ବିଶ୍ୱକପ୍ ଫାଇନାଲ ମ୍ୟାଚ୍ରେ ଇଂଲଣ୍ଡ ଅଧିକ ସଂଖ୍ୟାରେ ବାଉଣ୍ଡାରୀ ମାରିଥିବାରୁ ଚାମ୍ପିୟନ ଘୋଷିତ ହୋଇଥିଲା ଓ ନ୍ୟୁଜିଲାଣ୍ଡ ରନର୍ସଅପ୍ ହୋଇଥିଲା। ଫାଇନାଲ ମ୍ୟାଚ୍ ଟାଇ ହେବା ପରେ ସୁପର ଓଭର ମଧ୍ୟ ଟାଇ ରହିଥିଲା।
ଆଇସିସିର ଏହି ନିୟମ ପରିବର୍ତ୍ତନରେ ନିଶାମ ପରିହାସ କରି ଏକ ଭିନ୍ନ ପ୍ରକାର ଟୁଇଟ୍ କରିଛନ୍ତି। ଟାଇଟାନିକ ପାଇଁ ବରଫ୍ ଖଣ୍ଡ ବା ହିମଶୀଳାକୁ ଦେଖିବାକୁ ଅପେକ୍ଷାକୃତ ଭଲ ବାଇନାକୁଲାର ଆଇସିସିର ପରବର୍ତ୍ତୀ ଏଜେଣ୍ଡା ବୋଲି ସେ ଟୁଇଟ୍ କରିଛନ୍ତି। ନିଶାମ ବିଶ୍ୱକପ୍ ଫାଇନାଲରେ ସୁପର ଓଭରରେ ବ୍ୟାଟ୍ସମ୍ୟାନ ହିସାବରେ ସାମିଲ ହୋଇଥିଲେ। ଏହି ନିୟମ ପରିବର୍ତ୍ତନ କରିବାରେ ଆଇସିସି ଟିକିଏ ଡେରିକରିଦେଲା ବୋଲି କ୍ରେଗ ମ୍ୟାକ୍ମିଲନ ଟୁଇଟ୍ କରିଛନ୍ତି। ତେବେ ନ୍ୟୁଜିଲାଣ୍ଡ କ୍ରିକେଟ ମୁଖ୍ୟ କାର୍ଯ୍ୟନିର୍ବାହୀ ଡେଭିଡ ହ୍ବାଇଟ୍ ଏଥିରେ ସନ୍ତୋଷ ପ୍ରକଟ କରିଛନ୍ତି। ଅତୀତକୁ ଆମେ ପରିବର୍ତ୍ତନ କରିପାରିବା ନାହିଁ। ଯାହା ଘଟିଯାଇଛି ସେ ନେଇ ଚିନ୍ତା କରି କିଛି ଲାଭ ନାହିଁ। ତେବେ ଭବଷ୍ୟତରେ ପୁରୁଣା ନିୟମ ପାଇଁ କାହାକୁ ମୂଲ୍ୟ ଦେବାକୁ ହେବ ନାହିଁ ବୋଲି ସେ କହିଚନ୍ତି।
ନୂଆ ନିୟମ ଅନୁସାରେ ଯେପର୍ଯ୍ୟନ୍ତ ଅନ୍ତିମ ଫଳାଫଳ ବା ବିଜେତା ନ ମିଳିଛି ସେ ପର୍ଯ୍ୟନ୍ତ ସୁପର ଓଭର ବାରମ୍ବାର ଖେଳାଯିବ। ତେବେ ଗ୍ରୁପ ପର୍ଯ୍ୟାୟରେ ଯଦି କୌଣସି ମ୍ୟାଚ୍ ଟାଇ ରହେ ତାହାଲେ ତାହାକୁ ଟାଇ ଘୋଷଣା କରାଯିବ। ତେବେ ସେମିଫାଇନାଲ କିମ୍ବା ଫାଇନାଲରେ ନୂଆ ନିୟମ ଲାଗୁ ହେବ ବୋଲି ଆଇସିସି ସ୍ପଷ୍ଟ କରିଛି।