ଦୁବାଇ,୧।୫(ପି.ଟି.): ସଦ୍ୟପ୍ରକାଶିତ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ଟେଷ୍ଟ ର଼୍ୟାଙ୍କିଙ୍ଗ୍ରେ ଭାରତ ତା’ର ଶୀର୍ଷ ସ୍ଥାନ ହରାଇଛି। ଶୁକ୍ରବାର ପ୍ରକାଶିତ ର଼୍ୟାଙ୍କିଙ୍ଗ୍ରେ ଭାରତ ତୃତୀୟ ସ୍ଥାନକୁ ଖସିଛି। ଭାରତକୁ ହଟାଇ ଅଷ୍ଟ୍ରେଲିଆ ୧ ନମ୍ବର ସ୍ଥାନ ଅଧିକାର କରିଛି। ୨୦୧୬ ଅକ୍ଟୋବର ପରଠାରୁ ଭାରତ ଶୀର୍ଷ ସ୍ଥାନରେ ରହିଆସୁଥିଲେ ମଧ୍ୟ ଆନୁଆଲ ଅପ୍ଡେଟ ବା ର଼୍ୟାଙ୍କିଙ୍ଗରେ ବାର୍ଷିକ ନବୀକରଣ ହେବା ଭାରତକୁ ୧ ନମ୍ବର ସ୍ଥାନ ହରାଇବାକୁ ପଡିଛି। ତେବେ ଆଇସିସି ଟେଷ୍ଟ ଚାମ୍ପିୟନଶିପ୍ରେ ଭାରତ ପୂର୍ବପରି ତା’ର ଶୀର୍ଷ ସ୍ଥାନ ବଜାୟ ରଖିଛି।
୨୦୧୬-୧୭ରେ ଭାରତ ୧୨ଟି ଟେଷ୍ଟରେ ବିଜୟୀ ହୋଇଥିଲା ଓ ମାତ୍ର ଗୋଟିଏ ଟେଷ୍ଟରେ ପରାସ୍ତ ହୋଇଥିଲା। ତେବେ ଏବେ ପ୍ରକାଶିତ ଚାର୍ଟରୁ ଭାରତର ଏହି ରେକର୍ଡକୁ ବାଦ୍ ଦିଆଯାଇଛି। ଫଳରେ ଭାରତକୁ ଶୀର୍ଷ ସ୍ଥାନ ହରାଇବାକୁ ପଡିଛି ବୋଲି ଆଇସିସି ତରଫରୁ କୁହାଯାଇଛି। ଏହି ସମୟ ଅବଧିରେ ବିରାଟ କୋହଲିଙ୍କ ନେତୃତ୍ୱାଧୀନ ଭାରତ ସବୁ ୫ଟି ଯାକ ଟେଷ୍ଟ ସିରିଜରେ ବିଜୟୀ ହୋଇଥିଲା। ଏଥିରେ ଅଷ୍ଟ୍ରେଲିଆ ଓ ଇଂଲଣ୍ଡ ବିପକ୍ଷ ଟେଷ୍ଟ ସିରିଜ ସାମିଲ ଥିଲା। ଅନ୍ୟପଟେ ଅଷ୍ଟ୍ରେଲିଆ ଦକ୍ଷିଣ ଆଫ୍ରିକା ସହିତ ଭାରତଠାରୁ ପରାସ୍ତ ହୋଇଥିଲା। ଲାଟେଷ୍ଟ ଅପ୍ଡେଟରେ ୨୦୧୯ ମେ ପରଠାରୁ ଖେଳାଯାଇଥିବା ସବୁ ମ୍ୟାଚ୍ ୧୦୦ ପ୍ରତିଶତ ଓ ଗତ ଦୁଇବର୍ଷ ମଧ୍ୟରେ ଖେଳାଯାଇଥିବା ମ୍ୟାଚ୍ ୫୦ ପ୍ରତିଶତ ମୂଲ୍ୟ ବହନ କରୁଛି।
ଅନ୍ୟପଟେ ଅଷ୍ଟ୍ରେଲିଆ ଟେଷ୍ଟ ର଼୍ୟାଙ୍କିଙ୍ଗ୍ରେ ଶୀର୍ଷ ସ୍ଥାନ ହାସଲ କରିବା ସହ ଟି୨୦ ତାଲିକାରେ ପ୍ରଥମଥର ପାଇଁ ୧ ନମ୍ବର ସ୍ଥାନ ହାସଲ କରିଛି। ସେହିପରି ବିଶ୍ୱ ଚାମ୍ପିୟନ ଇଂଲଣ୍ଡ ଦିନିକିଆ ର଼୍ୟାଙ୍କିଙ୍ଗ୍ର ଶୀର୍ଷ ସ୍ଥାନରେ ରହିଛି। ଆନୁଆଲ ଅପ୍ଡେଟ୍ରେ ୨-୧୬-୧୭ ଫଳାଫଳକୁ ବାଦ୍ ଦିଆଯାଇଛି। ଟେଷ୍ଟ ର଼୍ୟାଙ୍କିଙ୍ଗ୍ରେ ଅଷ୍ଟ୍ରେଲିଆ ଏବେ ୧୧୬ ପଏଣ୍ଟ ହାସଲ କରି ଶୀର୍ଷରେ ରହିଥିବା ବେଳେ ନ୍ୟୁଜିଲାଣ୍ଡ ୧୧୫ ପଏଣ୍ଟ ସହ ଦ୍ୱିତୀୟ ଓ ଭାରତ ୧୧୪ ପଏଣ୍ଟ ପାଇଁ ତୃତୀୟ ସ୍ଥାନରେ ରହିଛି। ୨୦୦୩ ପରଠାରୁ ଟେଷ୍ଟ ର଼୍ୟାଙ୍କିଙ୍ଗ ଆରମ୍ଭ ହେବା ପରେ ଦ୍ୱିତୀୟଥର ପାଇଁ ଶୀର୍ଷ ୩ଟି ଦଳରେ ସର୍ବନିମ୍ନ ୨ ପଏଣ୍ଟର ବ୍ୟବଧାନ ରହିଛି। ପୂର୍ବରୁ ୨୦୧୬ରେ ଶ୍ରେଷ୍ଠ ୩ଟି ଦଳ ଯଥା ଭାରତ, ଅଷ୍ଟ୍ରେଲିଆ ଓ ଦକ୍ଷିଣ ଆଫ୍ରିକା ମଧ୍ୟରେ ମାତ୍ର ୨ ପଏଣ୍ଟର ବ୍ୟବଧାନ ଥିଲା। ଦକ୍ଷିଣ ଆଫ୍ରିକା ୮ ପଏଣ୍ଟ ହରାଇ ଏବେ ଶ୍ରୀଲଙ୍କା ତଳକୁ ରହି ଷଷ୍ଠ ସ୍ଥାନରେ ରହିଛି।
ଦିନିକିଆ ଦଳୀୟ ର଼୍ୟାଙ୍କିଙ୍ଗ୍ରେ ଇଂଲଣ୍ଡ ୧୨୭ ପଏଣ୍ଟ ପାଇ ଶୀର୍ଷ ରହିଥିବା ବେଳେ ଭାରତ ୧୧୯ ପଏଣ୍ଟ ପାଇ ଦ୍ୱିତୀୟ ସ୍ଥାନରେ ରହିଛି। ସେହିପରି ବିଶ୍ୱକପ୍ ରନର୍ସଅପ୍ ନ୍ୟୁଜିଲାଣ୍ଡ ୧୧୬ ପଏଣ୍ଟ ପାଇ ତୃତୀୟ ସ୍ଥାନରେ ରହିଛି।
ସେହିପରି ଟି୨୦ ର଼୍ୟାଙ୍କିଙ୍ଗ୍ରେ ଅଷ୍ଟ୍ରେଲିଆ ପାକିସ୍ତାନକୁ ହଟାଇ ୨୭୮ ପଏଣ୍ଟ ପାଇ ପ୍ରଥମ ଥର ପାଇଁ ଶୀର୍ଷ ସ୍ଥାନ ଅଧିକାର କରିଛି। ପାକିସ୍ତାନ ୨୬୦ ପଏଣ୍ଟ ପାଇ ଚତୁର୍ଥ ସ୍ଥାନରେ ରହିଛି। ୨୬୬ ପଏଣ୍ଟ ପାଇ ଭାରତ ତୃତୀୟ ସ୍ଥାନରେ ରହିଥିବା ବେଳେ ୨୬୮ ପଏଣ୍ଟ ପାଇ ଇଂଲଣ୍ଡ ଦ୍ୱିତୀୟ ସ୍ଥାନରେ ରହିଛି। ଆଫଗାନିସ୍ତାନ ସପ୍ତମ ସ୍ଥାନରୁ ଦଶମ ସ୍ଥାନକୁ ଖସିଛି। ତେବେ ବୁଲଗେରିଆ ୧୨ଟି ସ୍ଥାନ ଉପରକୁ ଉଠି ଲମ୍ବା ଜମ୍ପ ମାରିବା ସହ ୫୧ତମ ସ୍ଥାନ ଅଧିକାର କରିଛି। ଟି୨୦ ର଼୍ୟାଙ୍କିଙ୍ଗ୍ରେ ୮୪ଟି ଦେଶ ସାମିଲ ହୋଇଥାନ୍ତି।