CARDIFF, WALES - JUNE 08: Jason Roy of England celebrates his century during the Group Stage match of the ICC Cricket World Cup 2019 between England and Bangladesh at Cardiff Wales Stadium on June 08, 2019 in Cardiff, Wales.
କାର୍ଡିଫ, ୯ା୬- ସ୍ଥାନୀୟ ସୋଫିଆ ଗାର୍ଡେନଠାରେ ଚଳିତ ଆଇସିସି ବିଶ୍ୱକପ୍ ଟୁର୍ନାମେଣ୍ଟର ଏକ ମ୍ୟାଚରେ ଜାସନ ରୟଙ୍କ ଆକର୍ଷଣୀୟ ୧୫୩ ରନ ଏବଂ ଜୋସ୍ ବଟଲରଙ୍କ ଷ୍ଟ୍ରୋକ୍ଭରା ଅର୍ଦ୍ଧଶତକ ସହାୟତାରେ ଇଂଲଣ୍ଡ ୧୦୬ ରନରେ ବାଂଲାଦେଶକୁ ପରାସ୍ତ କରିଛି। ଶନିବାର ଖେଳାଯାଇଥିବା ଏହି ମ୍ୟାଚରେ ୩୮୭ ରନର କଷ୍ଟସାଧ୍ୟ ବିଜୟ ଲକ୍ଷ୍ୟକୁ ପିଛାକରି ବାଂଲାଦେଶ ଅଲରାଉଣ୍ଡର ଶକିବ ଅଲ ହସନ(୧୨୧)ଙ୍କ ଶତକ ସହାୟତାରେ ୪୮.୫ ଓଭରରେ ୨୮୦ରନ କରି ଅଲଆଉଟ ହୋଇଯାଇଥିଲା। ଦଳ ପକ୍ଷରୁ ଅନ୍ୟମାନଙ୍କ ମଧ୍ୟରେ ଉଇକେଟକିପର ମୁସ୍ଫିକର ରହିମ ୪୪ ରନ କରିଥିଲେ। ଇଂଲଣ୍ଡ ପକ୍ଷରୁ ବେନ୍ ଷ୍ଟୋକ୍ସ ଏବଂ ଜୋଫ୍ରା ଆର୍ଚର ୩ଟି ଲେଖାଏଁ ଏବଂ ମାର୍କ ଉଡ୍ ୨ଟି ଉଇକେଟ ନେଇଥିଲେ। ଇଂଲଣ୍ଡ ଟୁର୍ନାମେଣ୍ଟରେ ଏପର୍ଯ୍ୟନ୍ତ ଖେଳିଥିବା ୩ଟି ମ୍ୟାଚ ମଧ୍ୟରୁ ଏହା ଦ୍ୱିତୀୟ ବିଜୟ ହୋଇଥିବାବେଳେ ସମାନ ସଂଖ୍ୟକ ମ୍ୟାଚ ଖେଳିଥିବା ବାଂଲାଦେଶର ଏହା ଦ୍ୱିତୀୟ ପରାଜୟ।
ହାରି ପ୍ରଥମେ ବ୍ୟାଟିଂ କରିଥିବା ଇଂଲଣ୍ଡ ୬ ଉଇକେଟ ବିନିମୟରେ ୩୮୬ ରନ ସଂଗ୍ରହ କରିଥିଲା। ରୟ ତାଙ୍କ ୧୨୧ ବଲ୍ର ଇନିଂସରେ ୧୪ ଚୌକା ଏବଂ ୫ଟି ଛକା ଲଗାଇଥିଲେ। ସେ ଓପନର ଜନି ବେୟାରଷ୍ଟୋ (୫୧) ଏବଂ ପ୍ରଥମ ଡାଉନ୍ରେ ଜୋ ରୁଟ୍ (୨୧)ଙ୍କ ସହିତ ଗୁରୁତ୍ୱପୂର୍ଣ୍ଣ ଭାଗୀଦାରି କରିଥିଲେ, ଯାହାକି ଦଳର ବ୍ୟାଟିଂ ମୂଳଦୁଆ ପକାଇବାରେ ସହାୟକ ହୋଇଥିଲା। ପରେ ବଟଲର ୪୪ ବଲ୍ରୁ ୬୪ ରନ କରିଥିଲେ। ଏଥିରେ ୪ ଛକା ଏବଂ ୨ ଚୌକା ସାମିଲ ରହିଥିଲା। ସେ ଅଧିନାୟକ ଇଅନ ମୋର୍ଗାନ (୩୫)ଙ୍କ ସହିତ ପାର୍ଟନରଶିପ୍ରେ ୯୫ରନ ଯୋଗ କରିଥିଲେ। ଫଳରେ ଇଂଲଣ୍ଡ ଟୁର୍ନାମେଣ୍ଟରେ ପ୍ରଥମ ଦଳ ହିସାବରେ ୩୫୦ରୁ ଅଧିକ ରନ ସଂଗ୍ରହ କରିପାରିଥିଲା। ବାଂଲାଦେଶ ପକ୍ଷରୁ ମହମ୍ମଦ ସଇଫୁଦ୍ଦିନ (୨/୭୮) ଏବଂ ମେହିଦି ହସନ (୨/୬୭) ଦୁଇଟି ଲେଖାଏଁ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର
ଇଂଲଣ୍ଡ: ୫୦ ଓଭରରେ ୩୮୬/୬ (ଜାସନ ରୟ-୧୫୩, ଜୋସ୍ ବଟଲର-୬୪, ଜନି ବେୟାରଷ୍ଟୋ-୫୧, ମେହିଦି ହସନ-୨/୬୭, ମହମ୍ମଦ ସଇଫୁଦ୍ଦିନ-୨/୭୮)।
ବାଂଲାଦେଶ: ୪୮.୫ ଓଭରରେ ୨୮୦/ଅଲଆଉଟ (ଶକିବ ଅଲ୍ ହସନ-୧୨୧, ମୁସ୍ଫିକର ରହିମ-୪୪, ମହମୁଦୁଲ୍ଲା-୨୮, ବେନ୍ ଷ୍ଟୋକ୍ସ-୩/୨୩, ଜୋଫ୍ରା ଆର୍ଚର-୩/୩୦, ମାର୍କ ଉଡ୍-୨/୫୨)।