LONDON: Australia's captain Aaron Finch celebrates coring a century during the World Cup cricket match between Sri Lanka and Australia at The Oval in London, Saturday, June 15, 2019. AP/PTI(AP6_15_2019_000096B)
ଲଣ୍ଡନ,୧୬।୬(ପି.ଟି.)- ଗତଥରର ଚାମ୍ପିୟନ ଅଷ୍ଟ୍ରେଲିଆ ଚଳିତ ଆନ୍ତର୍ଜାତିକ କ୍ରିକେଟ କାଉନସିଲ (ଆଇସିସି) ବିଶ୍ୱକପର ୨୦ତମ ମ୍ୟାଚ୍ରେ ୮୭ ରନରେ ଶ୍ରୀଲଙ୍କାକୁ ପରାସ୍ତ କରିଛି। ସ୍ଥାନୀୟ କେନିଂଟନ ଓଭାଲ ଗ୍ରାଉଣ୍ଡରେ ଶନିବାର ଅନୁଷ୍ଠିତ ମ୍ୟାଚ୍ରେ ଅଷ୍ଟ୍ରେଲିଆ ଉଭୟ ବ୍ୟାଟିଂ ଓ ବୋଲିଂରେ କମାଲ କରି ବାଜି ମାରିଛି। ପ୍ରଥମେ ଅଧିନାୟକ ଆରୋନ ଫିଞ୍ଚ୍ଙ୍କ ଦମ୍ଦାର ୧୫୩ ରନରେ ଶତକୀୟ ପାଳି ଓ ପରେ ଦ୍ରୁତ ବୋଲର ମିଚେଲ ଷ୍ଟାର୍କ ଏବଂ କେନ୍ ରିଚାର୍ଡସନଙ୍କ ପ୍ରଭାବୀ ବୋଲିଂ ବଳରେ ଅଷ୍ଟ୍ରେଲିଆ ସହଜରେ ବିଜୟୀ ହୋଇଛି। ଏଥିସହିତ ଅଷ୍ଟ୍ରେଲିଆ ଟୁର୍ନାମେଣ୍ଟରେ ଏପର୍ଯ୍ୟନ୍ତ ୫ଟି ମ୍ୟାଚ୍ ଖେଳି ୪ଟି ବିଜୟ ଓ ଗୋଟିଏ ପରାଜୟ ସହ ମୋଟ ୮ ପଏଣ୍ଟ ପାଇଁ ତାଲିକାର ଶୀର୍ଷକୁ ଉଠିଛି। ଟସ୍ ଜିତି ଶ୍ରୀଲଙ୍କା ଫିଲ୍ଡିଂ କରିବାକୁ ନିଷ୍ପତ୍ତି ନେଇଥିଲା। ପ୍ରଥମେ ବ୍ୟାଟିଂ କରି ଅଷ୍ଟ୍ରେଲିଆ ୭ ଉଇକେଟ ହରାଇ ୩୩୪ ରନ ସଂଗ୍ରହ କରିଥିଲା। ଜବାବରେ ଶ୍ରୀଲଙ୍କା ୪୫.୫ ଓଭରରେ ୨୪୭ ରନ କରି ଅଲଆଉଟ ହୋଇ ପରାସ୍ତ ହୋଇଛି। ଏଥି ସହିତ ଶ୍ରୀଲଙ୍କା ୫ଟି ମ୍ୟାଚ୍ ଖେଳି ଗୋଟିଏ ବିଜୟ, ୨ଟି ପରାଜୟ ଓ ଦୁଇଟି ବିନା ଫଳାଫଳ ସହ ୪ ପଏଣ୍ଟ ହାସଲ କରି ପୂର୍ବପରି ପଞ୍ଚମ ସ୍ଥାନରେ ରହିଛି। ମ୍ୟାଚ୍ ବିଜୟୀ ଶତକୀୟ ଇନିଂସ ଖେଳିଥିବା ଫିଞ୍ଚ୍ ପ୍ଲେୟାର ଅଫ୍ ଦି ମ୍ୟାଚ୍ ବିବେଚିତ ହୋଇଛନ୍ତି।
୩୩୫ ରନ ବିଜୟ ଲକ୍ଷ୍ୟର ପିଛା କରି ଶ୍ରୀଲଙ୍କା ଭଲ ଆରମ୍ଭ କରିଥିଲେ ମଧ୍ୟ ମିଡିଲ ଓ ଲୋୟର ଅର୍ଡର ବ୍ୟାଟ୍ସମ୍ୟାନଙ୍କ ବିଫଳତା ଯୋଗୁ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଓପନର ତଥା ଅଧିନାୟକ ଦୁମୁଥ କରୁଣାରତ୍ନେ ୯୭, କୁଶାଲ ପେରେରା ୫୨, କୁଶାଲ ମେଣ୍ଡସ୍ ୨୯, ଲାହିରୁ ଥିରିମାନେ ୧୬ ରନ କରି ଆଉଟ ହୋଇଥିବା ବେଳେ ଧନଞ୍ଜୟ ଡି’ସିଲଭା ୧୬ ରନ କରି ଅପରାଜିତ ରହିଥିଲେ। ବାକି ୬ଜଣ ବ୍ୟାଟ୍ସମ୍ୟାନ ଦୁଇଅଙ୍କ ଛୁଇଁ ପାରି ନ ଥିଲେ। ବୋଲିଂରେ ଅଷ୍ଟ୍ରେଲିଆ ତରଫରୁ ମିଚେଲ ଷ୍ଟାର୍କ ୪, କେନ୍ ରିଚାର୍ଡସନ ୩, ପ୍ୟାଟ କୁମିନ୍ସ ୨, ଜାସନ ବେହରନଡୋର୍ଫ ଗୋଟିଏ ଉଇକେଟ ଅକ୍ତିଆର କରିଥିଲେ।
ଫିଞ୍ଚ୍ଙ୍କ ଧୂଆଁଧାର ଶତକ
ଟସ୍ ହାରି ବ୍ୟାଟିଂ ପାଇଁ ଆମନ୍ତ୍ରଣ ପାଇଥିବା ଅଷ୍ଟ୍ରେଲିଆ ଆରମ୍ଭରୁ ଦ୍ରୁତ ଗତିରେ ରନ୍ ସଂଗ୍ରହ କରିଥିଲା ଓ ବଡ଼ ସ୍କୋର ହାସଲ କରିବାରେ ସକ୍ଷମ ହୋଇଥିଲା। ଅଧିନାୟକ ଆରୋନ ଫିଞ୍ଚ୍ ୧୩୨ଟି ବଲର ସମ୍ମୁଖୀନ ହୋଇ ୧୫ ଚୌକା ଓ ୫ ଛକା ସହ ୧୫୩ ରନର ବୃହତ୍ ଶତକୀୟ ପାଳି ଖେଳିଥିଲେ। ଏଥିସହ ସେ ଦିନିକିଆରେ ୧୪ତମ ଶତକ ହାସଲ କରିଛନ୍ତି। ତେବେ ଇନ୍ଫର୍ମ ଓପନର ଡେଭିଡ ଓ୍ବାର୍ନର ମନ୍ଥର ବ୍ୟାଟିଂ କରି ୪୮ଟି ବଲ ଖେଳି ୨ ଚୌକା ସହ ୨୬ ରନ କରି ପ୍ରଥମେ ଆଉଟ ହେବା ପରେ ଉସ୍ମାନ ଖ୍ବାଜା ୧୦ ରନ କରି ପ୍ୟାଭିଲିୟନ ଫେରିଥିଲେ। ପୂର୍ବତନ ଅଧିନାୟକ ଷ୍ଟିଭେନ୍ ସ୍ମିଥ୍ ୫୯ଟି ବଲ୍ ଖେଳି ୭ ଚୌକା ଓ ୧ ଛକା ସହ ୭୩ ରନର ଦ୍ରୁତ ଅର୍ଦ୍ଧଶତକୀୟ ପାଳି ଖେଳିଥିଲେ। ଧୂଆଁଧାର ବ୍ୟାଟିଂ ପାଇଁ ବେଶ୍ ପରିଚିତ ଥିବା ଗ୍ଲେନ୍ ମ୍ୟାକ୍ସଓ୍ବେଲ ଏଥର କିନ୍ତୁ ନିରାଶ କରି ନ ଥିଲେ। ସେ ମାତ୍ର ୨୫ଟି ବଲର ସମ୍ମୁଖୀନ ହୋଇ ୫ ଚୌକା ଓ ୧ ଛକା ସହ ୪୬ ରନ କରି ଅପରାଜିତ ରହିଥିଲେ। ବାକି ୪ ବ୍ୟାଟ୍ସମ୍ୟାନ ଦୁଇ ଅଙ୍କ ଛୁଇଁ ପାରି ନ ଥିଲେ। ସନ ମାର୍ଶ ୩, ଆଲେକ୍ସ କାରୀ ୪ ରନ କରି ଆଉଟ ହୋଇଥିବାବେଳେ ପ୍ୟାଟ କୁମିନ୍ସ ଖାତା ଖୋଲିପାରି ନ ଥିଲେ। ମିଚେଲ ଷ୍ଟାର୍କ ୫ ରନ କରି ଅପରାଜିତ ରହିଥିଲେ। ତୃତୀୟ ଉଇକେଟରେ ଫିଞ୍ଚ୍ ଓ ସ୍ମିଥ୍ ୧୭୩ ରନ ସଂଗ୍ରହ କରି ଶ୍ରୀଲଙ୍କା ବୋଲରଙ୍କୁ ନିରାଶ କରିଥିଲେ। ଏହାପୂର୍ବରୁ ଓପନିଂ ଯୋଡିରେ ଫିଞ୍ଚ୍ ଓ ଓ୍ବାର୍ନର ୮୦ ରନ କରି ଦେଖିଚାହିଁ ଆରମ୍ଭ କରିଥିଲେ। ବୋଲିଂରେ ଇସୁରୁ ଉଡାନା ଓ ଧନଞ୍ଜୟ ଡି’ସିଲଭା ୨ଟି ଲେଖାଏ ଓ ଲାସିଥ ମାଲିଙ୍ଗା ଗୋଟିଏ ଉଇକେଟ ଅକ୍ତିଆର କରିଥିଲା।
ସଂକ୍ଷିପ୍ତ ସ୍କୋର:
ଅଷ୍ଟ୍ରେଲିଆ ୫୦ ଓଭରରେ ୩୩୪/୭
(ଫିଞ୍ଚ୍- ୧୫୩, ସ୍ମିଥ୍- ୭୩, ମ୍ୟାକ୍ସଓ୍ବେଲ-୪୬, ଓ୍ବାର୍ନର- ୨୬, ଉଡାନ- ୨/୫୭, ଧନଞ୍ଜୟ- ୨/୪୦ )।
ଶ୍ରୀଲଙ୍କା ୪୫.୫ ଓଭରରେ ୨୪୭ ଅଲଆଉଟ୍
(କରୁଣାରତ୍ନେ- ୯୭, କୁଶାଲ ପେରେରା- ୫୨,ମେଣ୍ଡିସ୍- ୩୦,ଷ୍ଟାର୍କ- ୪/୫୫, ରିଚାର୍ଡସନ- ୩/୪୭, କୁମିନ୍ସ- ୨/୩୮)।