ନୂଆଦିଲ୍ଲୀ,୧୮।୨: କରୋନା ଭାଇରସ୍ ସନ୍ଦେହରେ ଦିଲ୍ଲୀର ଏକ ଆଇସୋଲେଶନ୍ କ୍ୟାମ୍ପରେ କିଛି ଯୁବତୀ ନାଚୁଥିବାର ଏକ ଭିଡିଓ ସାମ୍ନାକୁ ଆସିଛି। ତାଙ୍କ ରିପୋର୍ଟ ନେଗେଟିଭ୍ ଆସିବା ଓ ଘରକୁ ଫେରିବା ଖୁସିରେ ସେମାନେ ଉକ୍ତ କ୍ୟାମ୍ପରେ ନାଚୁଥିବାର ଦେଖିବାକୁ ମିଳିଛି। ଏହି ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏହି ଭିଡିଓଟି ହେଉଛି ଇଣ୍ଡୋ ତିବ୍ବତାନ୍ ବର୍ଡର ପୋଲିସ(ଆଇଟିବିପି)ର ଆଇସୋଲେଶନ୍ କେନ୍ଦ୍ରର। ସୂଚନାଯୋଗ୍ୟ, ଚଳିତ ମାସ ଆରମ୍ଭରୁ ପ୍ରାୟ ୬ଶହରୁ ଊର୍ଦ୍ଧ୍ୱ ବ୍ୟକ୍ତିଙ୍କୁ ଚାଇନାର ଉହାନ ସହରରୁ ସ୍ବଦେଶକୁ ଅଣାଯାଇଥିଲା। ଏଥିରେ ୪୦୬ ଭାରତୀୟ ନାଗରିକଙ୍କୁ ଆଇଟିବିପି କେନ୍ଦ୍ର ଓ ଅନ୍ୟମାନଙ୍କୁ ମାନେସର ଆର୍ମି କେନ୍ଦ୍ରରେ ରଖାଯାଇଛି। ଚାଇନାରୁ ଆସିଥିବା ଭାରତୀୟଙ୍କୁ ଏହି ୨କେନ୍ଦ୍ରରେ ୧୪ ଦିନ ପାଇଁ ରଖାଯାଇଥିଲା। ସେମାନେ ମାସ୍କ ପିନ୍ଧିବା ସହ ପ୍ରତିଦିନ ସେମାନଙ୍କର ଚିକିତ୍ସା କରାଯାଇ ପରୀକ୍ଷଣ କରାଯାଉଛି। ତେବେ ଆଇଟିବିପି କ୍ୟାମ୍ପରେ ଥିବା କିଛି ଲୋକଙ୍କ ରକ୍ତ ନମୂନାରେ ନେଗେଟିଭ୍ ଆସିବା ପରେ ସେମାନଙ୍କୁ ପର୍ଯ୍ୟାୟକ୍ରମେ ଡିସଚାର୍ଜ କରାଯିବ ବୋଲି ସୂଚନା ମିଳିଛି। ଏହି ଖୁସିରେ ସେଠାରେ ଥିବା କିଛି ଯୁବତୀ ମାସ୍କ ପିନ୍ଧି ବଲିଉଡ୍ ଗୀତରେ ଡ୍ୟାନ୍ସ କରୁଥିବା ବେଳେ ଅନ୍ୟମାନେ କ୍ୟାରେମ୍ ଓ ଟେବୁଲ ଟେନିସ୍ ଖେଳୁଥିବା ନଜର ଆସିଛନ୍ତି। ଏହି ଭିଡିଓ ଏବେ ଭାଇରାଲ ହେବାରେ ଲାଗିଛି। ସୂଚନା ମୁତାବକ ମାନେସର କ୍ୟାମ୍ପରେ ଥିବା ଲୋକଙ୍କ ଭିତରେ କରୋନା ଭାଇରସ୍ ସଂକ୍ରମଣ ନ ଥିବା ନେଇ ସ୍ପଷ୍ଟ ହେବା ପରେ ସେମାନଙ୍କୁ ମଧ୍ୟ ମଙ୍ଗଳବାର ଛୁଟିଦିଆଯିବ ବୋଲି ସ୍ବାସ୍ଥ୍ୟ ମନ୍ତ୍ରଣାଳୟପକ୍ଷରୁ ସୂଚନା ମିଳିଛି। ସେହିପରି ହରିୟାଣା ଓ ଗୁରୁଗ୍ରାମସ୍ଥିତ ଥିବା ଆଇସୋଲେଶନ୍ କେନ୍ଦ୍ରରେ ମଧ୍ୟ ମଙ୍ଗଳବାର ୨୨୦ଜଣଙ୍କୁ ଡିସଚାର୍ଜ କରାଯିବ। ଏହାପରେ ସେମାନେ ନିଜ ଘରକୁ ଯାଇପାରିବେ ବୋଲି ଜଣାପଡ଼ିଛି।