ବିଶୋଇ,୧୧ା୫(ଡି.ଏନ୍.ଏ.)- ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ବାହାର ରାଜ୍ୟରୁ ପ୍ରବାସୀଓଡ଼ିଆ ମାନେ ନିଜ ଅଞ୍ଚଳକୁ ଆସି ପ୍ରଥମେ ଆଇସୋଲେଶନ ସେଣ୍ଟରରେ ରହିବା ନିୟମ ଥିବାରୁ ଏହି ସେଣ୍ଟରକୁ ଲାଗି ରହୁଥିବା ଜନସାଧାରଣ ଭୟଭୀତ ହୋଇ ପଡ଼ିଛନ୍ତି। ମୟୂରଭଞ୍ଜ ଜିଲାର ବିଶୋଇ ବ୍ଲକ ଅଧୀନ ଖଡ଼ମବେଡା ଗ୍ରାମରେ ଖୋଲାଯାଇଥିବା ଏଭଳି ଏକ ଆଇସୋଲେଶନ ସେଣ୍ଟରକୁ ନେଇ ବିବାଦ ଦେଖାଦେଇଛି। ଏହି ବ୍ଲକର ପ୍ରବାସୀ ଓଡ଼ିଆମାନଙ୍କ ପାଇଁ ୪୯ ନଂ. ଜାତୀୟ ରାଜପଥ ମଝିରେ ଥିବା ଖଡ଼ମବେଡା ସରକାରୀ ଉଚ୍ଚ ବିଦ୍ୟାଳୟରେ ବିଶୋଇ ବ୍ଲକର ଆଇସୋଲେଶନ ସେଣ୍ଟର ଖୋଲାଯାଇଥିବାରୁ ଏହାକୁ ଗ୍ରାମବାସୀମାନେ ବିରୋଧ କରିଛନ୍ତି। ରବିବାର ଗ୍ରାମବାସୀମାନେ ଏକ ବୈଠକ କରି ଏହି ଆଇସୋଲେଶନ ସେଣ୍ଟରକୁ ଅନ୍ୟତ୍ର ସ୍ଥାନାନ୍ତର କରିବା ପାଇଁ ଖଡ଼ମବେଡା ସରପଞ୍ଚ ଅମର ସିଂ ଟୁଡୁ ଏବଂ ଜିଲାପାଳଙ୍କ ଉଦ୍ଦେଶ୍ୟରେ ବିଶୋଇ ତହସିଲଦାରଙ୍କୁ ସ୍ମାରକପତ୍ର ପ୍ରଦାନ କରିଛନ୍ତି। ସୂଚନା ଥାଉକି ଏହି ବିଦ୍ୟାଳୟ ଖଡ଼ମବେଡା ପଞ୍ଚାୟତର ସଙ୍ଗରୋଧ କେନ୍ଦ୍ର ହୋଇଥିବାରୁ ଏଠାକାର ଗ୍ରାମବାସୀମାନଙ୍କ ଏଥିପ୍ରତି କୌଣସି ଆପତ୍ତି ନାହିଁ। ମାତ୍ର ଏହି ସେଣ୍ଟରକୁ ବିଶୋଇ ବ୍ଲକର ଆଇସୋଲେଶନ ସେଣ୍ଟର ଭାବରେ ଚୟନ କରାଯାଇଥିବାରୁ ଗ୍ରାମବାସୀ ଏହାକୁ ବିରୋଧ କରିଛନ୍ତି। ସୂଚନାଥାଉକି, ଏହି ସେଣ୍ଟରରେ ପାଚେରୀ ନ ଥିବା ବେଳେ ଏହି ସେଣ୍ଟରକୁ ଲାଗି ଏକ ଗ୍ରାମ ରହିଛି। ଏହି ଗ୍ରାମରେ ସମସ୍ତ ଜନସାଧାରଣ ଆଦିବାସୀ ସମ୍ପ୍ରଦାୟର ହୋଇଥିବା ବେଳେ କରୋନା ଭୂତାଣୁର ସଂକ୍ରମଣ ବିଷୟରେ ସେମାନେ ଏତେ ସଚେତନ ନୁହନ୍ତି। ତେଣୁ ଏହି ଅଞ୍ଚଳରେ ଆଇସୋଲେଶନ ସେଣ୍ଟର ହେଲେ ଆଗାମୀ ଦିନରେ ସଂକ୍ରମଣ ଆଶଙ୍କା କରି ଗ୍ରାମବାସୀ ଏହାକୁ ଅନ୍ୟତ୍ର ସ୍ଥାନାନ୍ତର କରିବା ପାଇଁ ଦାବି କରିଛନ୍ତି। ପ୍ରଶାସନ ଏଥିପ୍ରତି ଦୃଷ୍ଟି ନ ଦେଲେ ଗ୍ରାମବାସୀ ୪୯ ନଂ. ଜାତୀୟ ରାଜପଥକୁ ଅବରୋଧ କରିବେ ବୋଲି ଚେତାବନୀ ଦେଇଛନ୍ତି।