ସମ୍ବଲପୁର,୭ା୫(ବ୍ୟୁରୋ): ସମ୍ବଲପୁର ଜିଲାରେ ଆସନ୍ତା ୧୧ ତାରିଖରୁ ଧାନ କିଣାବିକା ଆରମ୍ଭ ହେବାକୁ ସ୍ଥିର ହୋଇଛି। ଏଥିପାଇଁ କେତେକ ଚାଷୀଙ୍କୁ ଟୋକନ ଦିଆଯାଇଛି। ହେଲେ ଏଥିପାଇଁ ଚାଷୀଙ୍କ ଟିପଚିହ୍ନ ସହ ଆଖି ସ୍କାନ କରିବାର ନିୟମ ରହିଛି । ଆଇସ୍କାନ କଲେ କିନ୍ତୁ କରୋନା ଭୂତାଣୁ ସଂକ୍ରମଣ ହେବାର ଭୟ ରହୁଛି । ତେଣୁ ଚଳିତ ବର୍ଷ ପାଇଁ ଏହି ବ୍ୟବସ୍ଥା ଧାନ ସଂଗ୍ରହରେ ବାଦ ଦିଆଯାଉ ବୋଲି ପଶ୍ଚିମ ଓଡିଶା କୃଷକ ସଂଗଠନ ସମନ୍ବୟ ସମିତି ଦାବି କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚିଠି ଲେଖିଛି।
କରୋନା ଭୂତାଣୁ ସମଗ୍ର ବିଶ୍ୱରେ କାୟା ବିସ୍ତାର କରିଛି। ଲକ୍ ଡାଉନ୍ ସମୟରେ ମଧ୍ୟ ଚାଷୀଙ୍କ ଧାନ ସଂଗ୍ରହ ପାଇଁ ସରକାର ନିଷ୍ପତ୍ତି ନେଇ ଚାଷୀମାନଙ୍କୁ ସହଯୋଗ କରିଛନ୍ତି । ଧାନ ସଂଗ୍ରହ କେନ୍ଦ୍ର ଗୁଡିକରେ ସାମାଜିକ ଦୂରତା ରଖିବା, ୩୦ରୁ ୩୫ ଜଣ ଚାଷୀ ପ୍ରତିଦିନ ଧାନ ବିକ୍ରି କରିବା, ଧାନ ସଂଗ୍ରହ କେନ୍ଦ୍ର ବୃଦ୍ଧି କରିବା ଭଳି କେତେକ ପଦକ୍ଷେପ ସରକାର ନେଇଛନ୍ତି । ହେଲେ ଏବେ ସବୁଠାରୁ ବଡ ସମସ୍ୟା ହୋଇଛି ଆଇସ୍କାନ କରିବା। ମାକେର୍ଟୟାର୍ଡରେ ଥିବା ଗୋଟିଏ ଆଇ ସ୍କାନ ମେଶିନରେ ସମସ୍ତ ଚାଷୀଙ୍କ ଆଖି ସ୍କାନ କରାଯିବ। ଏହା ଦ୍ୱାରା ଯଦି କାହାକୁ କରୋନା ସଂକ୍ରମଣ କରିଥାଏ ତାହା ହେଲେ କଥା ସରିଲା। ପରିସ୍ଥିତି ସମ୍ଭାଳିବା ସହଜ ହେବନି। ଏହି ଆଇସ୍କାନର ସୁପର ସ୍ପ୍ରେଡର ହୋଇଯିବ। ଏବେ ପଶ୍ଚିମ ଓଡିଶାର ଅନେକ ଜିଲା ସହିତ ସମ୍ବଲପୁର ଗ୍ରୀନ୍ ଜୋନ୍ରେ ରହିଛି । ତେଣୁ ଏଭଳି ସ୍ଥିତି ରହିବାକୁ ହେଲେ ଧାନ ସଂଗ୍ରହ ସମୟରେ ଆଇସ୍କାନର ବ୍ୟବହାର ବନ୍ଦ କରିବାକୁ ହେବ । ଚାଷୀଙ୍କ ଜୀବନ ପ୍ରତି ବିପଦ ରହୁଛି। ତେଣୁ ଏ ଦିଗରେ ପଦକ୍ଷେପ ଗ୍ରହଣ କରାଯାଉ ବୋଲି ପଶ୍ଚିମ ଓଡ଼ିଶା କୃଷକ ସଂଗଠନ ସମନ୍ବୟ ସମିତି ଆବାହକ ଆଶୋକ ପ୍ରଧାନ, ଅନ୍ୟତମ ଆବାହକ ଲିଙ୍ଗରାଜ, ଜିଲା ସଭାପତି ମୁରାରୀ ପ୍ରସାଦ ପୁରୋହିତ, ସଂପାଦକ ବ୍ୟୋମକେଶ ଠାକୁର ଦାବି କରିଛନ୍ତି । ସେହିପରି ରେଙ୍ଗାଲି ବିଧାୟକ ନାଉରୀ ନାଏକ ମଧ୍ୟ ରାଜ୍ୟ ଖାଦ୍ୟ ଓ ଯୋଗାଣମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁଙ୍କୁ ଚିଠି ଲେଖି ଏହି ଆଇସ୍କାନ ପ୍ରକ୍ରିୟାକୁ ବାଦ୍ ଦେବାକୁ ଅନୁରୋଧ କରିଛନ୍ତି।