ଗତ କିଛିବର୍ଷ ଧରି ଓଡ଼ିଆ ସିନେମାରେ ନବାଗତ କଳାକାରଙ୍କ ସଂଖ୍ୟା ବଢ଼ି ଚାଲିଛି। ନିଜ ସ୍ବପ୍ନକୁ ସାକାର କରିବା ପାଇଁ ସେମାନେ ଅଭିନୟକୁ କ୍ୟାରିୟର ଭାବରେ ଗ୍ରହଣ କରିଛନ୍ତି। ସଫଳତା ହେଉ ଅବା ବିଫଳତା-ଏ ଦୁଇଟି ଅଲଗା କଥା। ହେଲେ ନବାଗତଙ୍କ ଆଗ୍ରହ ଏବଂ ସେମାନଙ୍କୁ ବ୍ରେକ୍ ଦେଇ ରିସ୍କ ଉଠାଇବାକୁ ପଛାଉ ନାହାନ୍ତି ପ୍ରଯୋଜକମାନେ। ନିକଟରେ ଏହି ତାଲିକାରେ ନିଜ ନାମକୁ ସାମିଲ କରିଛନ୍ତି ଆଉ ଜଣେ ନବାଗତା। ସେ ହେଲେ ଖୁସି। ହୋମ ବ୍ୟାନର ଖୁସି ଏଣ୍ଟରଟେନମେଣ୍ଟରେ ନିର୍ମିତ ହେବାକୁ ଯାଉଥିବା ନୂଆ ସିନେମା ‘ହିରୋ ନମ୍ବର ଜିରୋ’ର ନାୟିକା ଭାବରେ ତାଙ୍କୁ ସୁଯୋଗ ଦେଇଛନ୍ତି ନିର୍ଦ୍ଦେଶକ ନିରଞ୍ଜନ ବେହେରା। ଏଥିରେ ତାଙ୍କ ଅପୋଜିଟ୍ରେ ମେଲ୍ ଲିଡ୍ରେ ଅବତୀର୍ଣ୍ଣ ହେଉଛନ୍ତି ଓଲିଉଡ୍ର ଅନ୍ୟତମ ଆଗଧାଡିର ଅଭିନେତା ଜ୍ୟୋତି ନାୟକ। ଏ ସମ୍ପର୍କରେ ନିର୍ଦ୍ଦେଶକ କହନ୍ତି, ‘କାହାଣୀ ଅନୁସାରେ ଜ୍ୟୋତି ଡବଲ ରୋଲ୍ରେ ଅଭିନୟ କରିବେ। ତାଙ୍କ ସହ ନାୟିକା ଭାବରେ ସ୍କ୍ରିନ୍ ଶେୟାର କରିବେ ଖୁସି। ଜଣେ ନୂଆ ନାୟିକାଙ୍କୁ ନେଇ ସିନେମା କରିବା ରିସ୍କ। ମୋ ନିର୍ଦ୍ଦେଶିତ ସିନେମା ‘ଯୋଗୀ’ରେ ନିକିତାଙ୍କୁ ନାୟିକା ଭାବରେ ବ୍ରେକ୍ ଦେଇଥିଲି। ତେବେ ନୂଆ ସିନେମା ‘ହିରୋ ନମ୍ବର ଜିରୋ’ର କାହାଣୀ ଭିନ୍ନ ଏବଂ ଏହା ବିଶେଷ ଭାବରେ ଯୁବପିଢ଼ିଙ୍କୁ ପ୍ରଭାବିତ କରିବ ବୋଲି ଆଶା ରହିଛି। ଏହି ଫିଲ୍ମର ପ୍ରଯୋଜନା କରୁଛନ୍ତି ସ୍ମୃତି ରଞ୍ଜନ ବିଶ୍ୱାଳ। ଗୀତଗୁଡିକୁ ସ୍ବର ଦେଇଛନ୍ତି ମଳୟ ମିଶ୍ର। ଜ୍ୟୋତି-ଖୁସିଙ୍କ ବ୍ୟତୀତ ଉକ୍ତ ସିନେମାର କାଷ୍ଟିଂରେ ପ୍ରଦ୍ୟୁମ୍ନ ଲେଙ୍କା, ବବି ମିଶ୍ର, ଶ୍ରୀତମ ଦାସ, ବିଜୁ ବଡ଼ଜେନା, ପୃଥ୍ବୀରାଜ ନାୟକ, ପ୍ରତିଭା ପଣ୍ଡା ପ୍ରମୁଖ କଳାକାର ରହିଛନ୍ତି। ତେବେ ଖୁସିଙ୍କ ପ୍ରଥମ ସିନେମା ତାଙ୍କ କ୍ୟାରିୟରକୁ କେତେ ମାଇଲେଜ ଦେଉଛି ତାହା ଦେଖିବାକୁ ବାକି ରହିଲା।