କୋକସରା,୪।୬(ଡି.ଏନ.ଏ)-କଳାହାଣ୍ଡି ଜିଲା କୋକସରା ବ୍ଲକ ଲଡୁଗାଁ ପଞ୍ଚାୟତ ସରପଞ୍ଚ କହ୍ନେଇ ଚରଣ ଦାସଙ୍କ ଉଦ୍ୟମରେ ଲଡୁଗାଁ ହାଇସ୍କୁଲ କ୍ୱାରାଣ୍ଟାଇନ ସେଣ୍ଟରରେ ରହୁଥିବା ପ୍ରବାସୀମାନେ ଏବେ ଶୃଙ୍ଖଳିତ ଜୀବନ ଯାପନ କରୁଛନ୍ତି ା ସେମାନେ ପ୍ରତିଦିନ ସକାଳୁ ହାଇସ୍କୁଲ ପରିସରକୁ ଝାଡୁ ଧରି ସଫା କରୁଛନ୍ତି। ସରପଞ୍ଚ ଦାସ ଏହି ପ୍ରବାସୀ ଶ୍ରମିକଙ୍କ ସହ ବିଭିନ୍ନ ବିଷୟରେ ଆଲୋଚନା କରିବା ସହ ସେମାନଙ୍କୁ ଆଉ ଦାଦନ ଖଟି ନ ଯିବାକୁ ପରାମର୍ଶ ଦେଉଛନ୍ତି । ରାଜ୍ୟ ସରକାର ମହାତ୍ମା ଗାନ୍ଧୀ ନିଶ୍ଚିତ କର୍ମ ନିଯୁକ୍ତି ଯୋଜନା ହେଉ ଅବା ଅନ୍ୟ ଯୋଜନାରେ ଶ୍ରମିକ ପରିବାରକୁ କାମ ଯୋଗାଇ ଦେବା ପାଇଁ ଯୋଜନା କରିଛନ୍ତି । ଏଣୁ ନିଜ ଭିଟାମାଟି ଛାଡି ଅନ୍ୟ ରାଜ୍ୟକୁ ନ ଯିବା ପାଇଁ ସେ ଶ୍ରମିକମାନଙ୍କୁ ପରାମର୍ଶ ଦେଇଛନ୍ତି ା ଏନେଇ ସରପଞ୍ଚ ଦାସ କହିଛନ୍ତି, ପ୍ରବାସୀ ଶ୍ରମିକଙ୍କ ମନ ପରିବର୍ତ୍ତନ ପାଇଁ ଆମେ ସୁସମ୍ପର୍କ ସ୍ଥାପନ କରିଛୁ ା ଏହା ଏକ ଉପଯୁକ୍ତ ସମୟ, ଏଣୁ ପ୍ରବାସୀ ଶ୍ରମିକମାନେ କେମିତି ଆଗାମୀ ଦିନରେ ଅନ୍ୟ ରାଜ୍ୟକୁ ଦାଦନ ଖଟିବାକୁ ନ ଯିବେ ସେଥିପାଇଁ ଆମେ ଆଲୋଚନା କରିଛୁ ା ସେମାନେ କିପରି ନିଜ ଜିଲା ଓ ପଞ୍ଚୟାତରେ କର୍ମ ସଂସ୍ଥାନ ପାଇବେ ତାହା ଉପରେ ମୁଁ ଗୁରୁତ୍ୱ ଦେଇଆସିଛି ବୋଲି ସେ କହିଛନ୍ତି ା