ଢେଙ୍କାନାଳ ଅଫିସ, ୨୯। ୩: କରୋନା ମୁକାବିଲା ପାଇଁ ଢେଙ୍କାନାଳ ଏମ୍ପି ମହେଶ ସାହୁ ନିଜର ଏମ୍ପି ଲାଡ୍ରୁ ୩୬ ଲକ୍ଷ ଟଙ୍କା ସହାୟତା ପ୍ରଦାନ କରିଛନ୍ତି। ଶୁକ୍ରବାର ସେ ୨୬ଲକ୍ଷ ଟଙ୍କା ପ୍ରଦାନ କରିଥିବାବେଳେ ଶନିବାର ଆଉ ୧୦ ଲକ୍ଷ ଟଙ୍କା ଦେଇଛନ୍ତି। କରୋନା ଆକ୍ରାନ୍ତ ରୋଗୀଙ୍କୁ ଉନ୍ନତମାନର ସ୍ବାସ୍ଥ୍ୟସେବା ଯୋଗାଇଦେବା ଏବଂ ସ୍ବାସ୍ଥ୍ୟସେବା ଭିତ୍ତିଭୂମିର ବିକାଶ ଲାଗି ଜିଲା ପ୍ରଶାସନ ପକ୍ଷରୁ ଅଟକଳ ପ୍ରସ୍ତୁତ କରାଯାଇ ଏମ୍ପିଙ୍କୁ ଅବଗତ କରାଯାଇଥିଲା। ଏହାପରେ ଏମ୍ପି ନିଜର ହାତପାଣ୍ଠିରୁ ଏହି ସହାୟତା ଦେଇଥିବା କହିଛନ୍ତି। ଏ ନେଇ ସେ ଜିଲାପାଳଙ୍କୁ ଅବଗତ କରାଇଛନ୍ତି। ଅନ୍ୟପକ୍ଷରେ ଜିଲାରେ ସଂକ୍ରମଣ ପ୍ରତିରୋଧ ଲାଗି ସମସ୍ତେ ଆବଶ୍ୟକ ସତର୍କତା ଅବଲମ୍ବନ କରିବା, ସରକାରଙ୍କ ଲକ୍ଡାଉନ ନିୟମକକୁ କଡ଼ାକଡ଼ି ଭାବେ ପାଳନ କରିବା, ଏ ନେଇ ନିଜେ ସଚେତନ ହେବା ସହ ଅନ୍ୟମାନଙ୍କୁ ସଚେତନ କରିବାକୁ ଏମ୍ପି ଆହ୍ବାନ ଦେଇଛନ୍ତି।