ଭୁବନେଶ୍ୱର, ୧୭।୫(ବ୍ୟୁରୋ): ଖୁବ୍ଶୀଘ୍ର ରାଜ୍ୟର ଆଉ ୫ ସ୍ଥାନରେ କୋଭିଡ୍ ପରୀକ୍ଷା ଆରମ୍ଭ ହେବ। ୨୩ ତାରିଖରୁ କୋରାପୁଟ ଓ ବଲାଙ୍ଗୀର ମେଡିକାଲ୍ କଲେଜରେ କରୋନା ନମୁନା ପରୀକ୍ଷଣ ଆରମ୍ଭ ହେବ। ସେହିପରି ୩୧ ତାରିଖ ସୁଦ୍ଧା ବାଲେଶ୍ୱର ଓ ବାରିପଦା ମେଡିକାଲ୍ କଲେଜରେ ନମୁନା ପରୀକ୍ଷା କରାଯିବ। ଏହାଛଡ଼ା ଖୋର୍ଦ୍ଧା ଅରଗୋଳଠାରେ ଥିବା ପ୍ରାଣୀ ରୋଗ ଗବେଷଣା ପରୀକ୍ଷାଗାରରେ ମଧ୍ୟ ନମୁନା ପରୀକ୍ଷା ହେବ। ଆସନ୍ତା ଦୁଇଦିନ ମଧ୍ୟରେ ଏଠାରେ କରୋନା ପରୀକ୍ଷଣ ଆରମ୍ଭ ହେବ। ଏଠାରେ ଥିବା ଉନ୍ନତମାନର ଲାବାରୋଟୋରି ନିର୍ମାଣ ହେବା ପରଠାରୁ ବ୍ୟବହାର କରାଯାଇ ନ ଥିଲା। କୋଭିଡ୍ ପାଇଁ ଏହି ଲାବାରୋଟୋରି ପ୍ରଥମଥର କାର୍ଯ୍ୟ କରିବ ବୋଲି ସ୍ବାସ୍ଥ୍ୟ ବିଭାଗ ଅତିରିକ୍ତ ମୁଖ୍ୟ ସଚିବ ପ୍ରଦୀପ୍ତ ମହାପାତ୍ର ସୂଚନା ଦେଇଛନ୍ତି। ସେ କହିଛନ୍ତି, ମାର୍ଚ୍ଚ ୧୬ରେ ରାଜ୍ୟରେ ପ୍ରଥମ କରୋନା ପଜିଟିଭ୍ ଚିହ୍ନଟ ହୋଇଥିଲା। ସେହି ସମୟରେ ଦିନକୁ ମାତ୍ର ୩ଟି କୋଭିଡ୍ ଟେଷ୍ଟ ହେଉଥିଲା। ଟେଷ୍ଟିଂ କ୍ଷମତାକୁ ବୃଦ୍ଧି କରିବା ସ୍ବାସ୍ଥ୍ୟ ବିଭାଗ ପାଇଁ ବଡ଼ ଚ୍ୟାଲେଞ୍ଜ ଥିଲା। ମୁଖ୍ୟମନ୍ତ୍ରୀ ଏହାକୁ ଗୁରୁତ୍ୱ ଦେବା ସହିତ ମେ’ ୨୦ ସୁଦ୍ଧା ଦିନକୁ ୫ହଜାର ନମୁନା ପରୀକ୍ଷଣ କରିବାକୁ ନିର୍ଦ୍ଦେଶ ଦେଇଥିଲେ। ଏହି ପରିପ୍ରେକ୍ଷୀରେ ବର୍ତ୍ତମାନ ଦିନକୁ ୪,୭୦୦ ନମୁନା ପରୀକ୍ଷଣ ହେଉଛି। ଆସନ୍ତା ୨୦ତାରିଖ ବେଳକୁ ଏହା ବଢ଼ି ୫ହଜାର ଉପରକୁ ଚାଲିଯିବ।