କରାଚି,୩୧।୫ (ପି.ଟି.): ପାକିସ୍ତାନ ବ୍ୟାଟ୍ସମ୍ୟାନ ଉମର ଆକମଲଙ୍କ ମାମଲାର ଶୁଣାଣି କରିବେ ପୂର୍ବତନ ସୁପ୍ରିମକୋର୍ଟ ଜଜ୍ ଫକିର ମହମ୍ମଦ ଖୋଖାର। ଦୁର୍ନୀତି କରିବାକୁ ଆକମଲଙ୍କୁ ପ୍ରସ୍ତାବ ଦିଆଯାଇ ନ ଥିଲେ ମଧ୍ୟ ସେ ଏ ସଂକ୍ରାନ୍ତରେ ପାକିସ୍ତାନ କ୍ରିକେଟ ବୋର୍ଡ (ପିସିବି)କୁ ଜଣାଇ ନଥିଲେ। ଫଳରେ ପିସିବି ତାଙ୍କୁ ୩ ବର୍ଷ ବାସନ୍ଦ କରିଥିଲା। ଏବେ ଏହା ବିରୋଧରେ ଆକମଲ ଅପିଲ କରିଛନ୍ତି । ଫକିର ଏହି ଅପିଲର ଶୁଣାଣି କରିବେ ବୋଲି ପିସିବି ତରଫରୁ କୁହାଯାଇଛି।
ଆକମଲଙ୍କୁ ଗତମାସ ପିସିବି ସବୁ ପ୍ରକାର କ୍ରିକେଟ କାର୍ଯ୍ୟକଳାପରୁ ବାସନ୍ଦ କରିଥିଲା। ବୋର୍ଡର ଶୃଙ୍ଖଳାଗତ କମିଟି ତାଙ୍କୁ ଦୋଷୀ ସାବ୍ୟସ୍ତ କରିଥିଲା। ଚଳିତ ବର୍ଷ ପ୍ରାରମ୍ଭରେ ପାକିସ୍ତାନ୍ ସୁପର ଲିଗ୍ ଆରମ୍ଭ ହେବା ପୂର୍ବରୁ ଦୁର୍ନୀତି ନେଇ ପ୍ରସ୍ତାବ ମିଳିଥିଲେ ମଧ୍ୟ ଆକମଲ ପିସିବିକୁ ରିପୋର୍ଟ କରି ନ ଥିଲେ। ତେଣୁ ତାଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା। ଏହା ବାସନ୍ଦାଦେଶ ବିରୋଧରେ ୩୦ ବର୍ଷୀୟ ଆକମଲ ଚ୍ୟାଲେଞ୍ଜ୍ କରିଥିଲେ। ଏବେ ଏହାର ନିରପେକ୍ଷ ତଦନ୍ତ ହେବ। ଏହି ମାମଲାରେ ସାହାଯ୍ୟ କରିବାକୁ ଆକମଲ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ପାର୍ଲାମେଣ୍ଟରୀ ଆଫେୟାର୍ସ ଆଡଭାଇଜର ବାବର ଆଓ୍ବାନଙ୍କର ସହୟତା ନେଇଛନ୍ତି। ପିଏସ୍ଏଲ ଆରମ୍ଭ ହେବା ପୂର୍ବରୁ ଆକମଲଙ୍କୁ ସସ୍ପେଣ୍ଡ କରାଯାଇଥିଲା। ଉମର ହେଉଛନ୍ତି ପୂର୍ବତନ ଉଇକେଟକିପର ବ୍ୟାଟ୍ସମ୍ୟାନ କାମରାନ ଆକମଲଙ୍କ ସାନ ଭାଇ। ସେ ମଧ୍ୟ ଅଧିନାୟକ ବାବର ଆଜମଙ୍କର ସମ୍ପର୍କୀୟ ଭାଇ। ଉମର ପାକିସ୍ତାନ ପାଇଁ ୧୬ ଟେଷ୍ଟ, ୧୨୧ ଦିନିକିଆ ଓ ୮୪ଟି ଟି୨୦ ମ୍ୟାଚ୍ ଖେଳି ଯଥାକ୍ରମେ ୧୦୦୩, ୩୧୯୪ ଓ ୧୬୯୦ ରନ ସଂଗ୍ରହ କରିଛନ୍ତି। ନ୍ୟୁଜିଲାଣ୍ଡ ବିପକ୍ଷ ଟେଷ୍ଟରେ ପଦାର୍ପଣ କରି ସେ ଶତକ ହାସଲ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ। ତେବେ ପରେ ସେ ଏହି ସଫଳତାକୁ ଦୋହରାଇ ପାରି ନ ଥିଲେ।