କେନ୍ଦୁଝର, ୨୧।୧୨(ସ୍ବ.ପ୍ର.)-ବଣପାହାଡ ଘେରା ପ୍ରାକୃତିକ ସାୈନ୍ଦର୍ଯ୍ୟ ପରିପୂର୍ଣ୍ଣ କେନ୍ଦୁଝର ଜିଲାରେ ଅନେକ ପର୍ଯ୍ୟଟନ ବିଭବ ଭରି ରହିଛି। ଗମନାଗମନ ଓ ଅନ୍ୟ ଆନୁସଙ୍ଗିକ ସୁବିଧା ଭଳି ଭିତ୍ତିଭୂମିର ବିକାଶ ହୋଇ ପାରୁ ନ ଥିବାରୁ ବହିରାଗତ ପର୍ଯ୍ୟଟକ ଆସି ହଇରାଣ ହୋଇ ଫେରୁଛନ୍ତି। ଏହି ଜିଲା ଅଧୀନ ଯୋଡା ବ୍ଲକରେ ଥିବା ହାଣ୍ଡିଭଙ୍ଗା ଜଳପ୍ରପାତକୁ ମିଳିଛି ପର୍ଯ୍ୟଟନ କ୍ଷେତ୍ରର ମାନ୍ୟତା। ଏହାର ମନୋରମ ପରିବେଶ ଅନେକଙ୍କୁ ପ୍ରଲୁବ୍ଧ କରିଥାଏ। ବହିରାଗତଙ୍କ ସମେତ ସ୍ଥାନୀୟ ଲୋକେ ବର୍ଷସାରା ଏଠାକୁ ଆସୁଥିଲେ ବି ଶୀତ ଦିନେ ମୁଖ୍ୟତଃ ଏଠାକୁ ପିକ୍ନିକ୍ କରିବାକୁ ଆସି ପ୍ରାକୃତିକ ସୌନ୍ଦର୍ଯ୍ୟର ମଜା ନେଇଥାନ୍ତି।
ଯୋଡାଠାରୁ ପ୍ରାୟ ୨୨ ଓ କେନ୍ଦୁଝରରୁ ପ୍ରାୟ ୫୦ କିମି ଦୂରରେ ଥିବା ଏହି ଜଳପ୍ରପାତ ନିକଟରେ ରହିଛି ବୀର ହନୁମାନ ଓ ପଦ୍ମେଶ୍ୱର ମହାଦେବଙ୍କ ମନ୍ଦିର ା ସେଠାରେ ଦୁଇ ପାହାଡର ସଂଯୋଗ ସ୍ଥଳୀରୁ ପ୍ରାୟ ୨୦୦ ଫୁଟ ଉପରୁ ତଳକୁ ଝରିଆସୁଥିବା ଏକ ଝରଣାର ଜଳଧାର ପ୍ରପାତ ସୃଷ୍ଟି କରିଛି। ଏହା ପାଖକୁ ଯିବା ଲାଗି ଭଲ ରାସ୍ତା ନ ଥିବାରୁ ଲୋକଙ୍କୁ କିଛି ଦୂର ଚାଲି ଚାଲି ଯିବାକୁ ପଡିଥାଏ ା ଜଳପ୍ରପାତର ନିମ୍ନ ଭାଗରେ ରହି ଲୋକେ ଏହାର ମନୋରମ ଦୃଶ୍ୟକୁ ଅନେକ ଉପଭୋଗ କରିଥାନ୍ତି। ବିଭିନ୍ନ ପ୍ରଜାତିର ଗଛଲତା, ଜୀବଜନ୍ତୁ ଓ ସରୀସୃପ ଏହି ସ୍ଥାନରେ ଦେଖିବାକୁ ମିଳନ୍ତି। ଖଣିଖାଦାନଭରା ଅଞ୍ଚଳ ହୋଇଥିଲେ ବି ଏହି ପର୍ଯ୍ୟଟନ କ୍ଷେତ୍ରରେ ଭିତ୍ତିଭୂମିର ବିକାଶ ଲାଗି କୌଣସି ପଦକ୍ଷେପ ନିଆଯାଉ ନାହିଁ କି ପିକ୍ନିିକ କରିବାକୁ ଆସୁଥିବା ଲୋକଙ୍କ ସୁବିଧା ପାଇଁ କୌଣସି ବ୍ୟବସ୍ଥା କରାଯାଉ ନାହିଁ ା ମୋବାଇଲ ଟାଓ୍ବାର ଓ ବିଦ୍ୟୁତ ସୁବିଧା ନ ଥିବାରୁ ବାହାରୁ ଆସୁଥିବା ପର୍ଯ୍ୟଟକମାନେ ଅସୁବିଧା ଭୋଗ କରିଥାନ୍ତି ବୋଲି ସ୍ଥାନୀୟ ଲୋକେ କହିଛନ୍ତି। ଏହି ଜଳ ପ୍ରପାତର ଥଣ୍ଡା ଜଳରେ ଗାଧୋଇବା ମଜା ନିଆରା । ତଳକୁ ବୋହି ଯାଉଥିବା ଝରଣା କୂଳରେ ଶୀତ ଦିନେ ଅନେକେ ଭୋଜିଭାତ ଓ ନାଚଗୀତ କରି ମଜା ଉଠାଇ ସନ୍ଧ୍ୟା ପୂର୍ବରୁ ସେମାନେ ଏଠାରୁ ଫେରି ଯାଇଥାନ୍ତି।