ଜେନେଭା,୧୩-୯ (ଆଇଏଏନ୍ଏସ୍):ଭାରତକୁ ଆଣବିକ ଯୁଦ୍ଧାସ୍ତ୍ରର ଭୟ ଦେଖାଉଥିବା ପାକିସ୍ତାନ ଏବେ ‘ଆକସ୍ମିକ ଯୁଦ୍ଧ’ର ସଙ୍କେତ ଦେଇଛି। କଶ୍ମୀର ପ୍ରସଙ୍ଗରେ ଭାରତ ସହ ଯୁଦ୍ଧର ଆଶଙ୍କାକୁ ଏଡ଼ାଇ ଦିଆଯାଇ ନ ପାରେ ବୋଲି ପାକିସ୍ତାନ ବହିର୍ବ୍ୟାପାର ମନ୍ତ୍ରୀ ଶାହ ମେହମୁଦ୍ କୁରେଶୀ କହିଛନ୍ତି।
ସ୍ବିଜରଲାଣ୍ଡର ଜେନେଭାରେ ଚାଲିଥିବା ଜାତିସଂଘ ମାନବାଧିକାର ପରିଷଦ (ୟୁଏନ୍ଏଚ୍ଆର୍ସି) ସମ୍ମିଳନୀରେ ଯୋଗଦେବା ପରେ ଇସ୍ଲାମାବାଦ ଫେରିବା ପୂର୍ବରୁ ଗଣମାଧ୍ୟମକୁ କୁରେଶୀ କହିଛନ୍ତି, କଶ୍ମୀରକୁ ନେଇ ଭାରତ ସହ ହଠାତ୍ ଯୁଦ୍ଧ ହୋଇପାରେ। ଉଭୟ ଭାରତ ଓ ପାକିସ୍ତାନ ଯୁଦ୍ଧର ପରିଣାମକୁ ହୃଦୟଙ୍ଗମ କରିଛନ୍ତି। କିନ୍ତୁ କ୍ରମବର୍ଦ୍ଧିଷ୍ଣୁ ଉତ୍ତେଜନାକୁ ଦେଖିଲେ ଯୁଦ୍ଧ ଆଶଙ୍କାକୁ ଏଡ଼ାଇ ହେଉନାହିଁ। ସବୁକିଛି ଏପରି ଚାଲିଲେ କିଛି ବି ଘଟିପାରେ ବୋଲି କହିଛନ୍ତି। ନୂଆଦିଲ୍ଲୀର ମାନସିକତା ଦ୍ୱିପାକ୍ଷିକ ଆଲୋଚନା ସପକ୍ଷରେ ନାହିଁ। ତେଣୁ ଉତ୍ତେଜନା ହ୍ରାସ ପାଇଁ ତୃତୀୟ ପକ୍ଷର ହସ୍ତକ୍ଷେପ ଆବଶ୍ୟକ। ଏଥିଲାଗି ସେ ଉଭୟ ଭାରତ ଓ ପାକିସ୍ତାନ ପଟର ‘ଅଶାନ୍ତ ଅଞ୍ଚଳ’କୁ ପରିଦର୍ଶନ ପାଇଁ ଜାତିସଂଘ ମାନବାଧିକାର ହାଇକମିଶନର ମିଶେଲ ବାଚେଲେଟଙ୍କୁ ଅନୁରୋଧ କରିଛନ୍ତି। ଏହାସହ କଶ୍ମୀରର ସ୍ଥିତି ସମ୍ପର୍କରେ ଅନ୍ତର୍ଜାତୀୟ ତଦନ୍ତ ପାଇଁ ସେ ଦାବି କରିଛନ୍ତି।