ମୁମ୍ବାଇ: ବଲିଉଡ ଇଣ୍ଡଷ୍ଟ୍ରିର ଫିଟ୍ ଆକ୍ଟର୍ସଙ୍କ ମଧ୍ୟରେ ଜଣେ ହେଉଛନ୍ତି ବିଦ୍ୟୁତ୍ ଜମଓ୍ବାଲ। ସେ ନିଜର ଆକ୍ସନ ଏବଂ ଷ୍ଟଣ୍ଟ ଜରିଆରେ ଦର୍ଶକଙ୍କ ମନରେ ଏକ ସ୍ବତନ୍ତ୍ର ପରିଚୟ ସୃଷ୍ଟି କରି ଏବେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛନ୍ତି। ସେ ଦେଇଥିବା ଏକ ଇଣ୍ଟରଭ୍ୟୁରେ ଅକ୍ଷୟ କୁମାରଙ୍କୁ ନେଇ ନିଜର ମନ କଥା କହିଛନ୍ତି। ଖିଲାଡି କୁମାରଙ୍କ ବଡ଼ ପ୍ରଶଂସକଙ୍କ ମଧ୍ୟରେ ସେ ଜଣେ ବୋଲି କହିଛନ୍ତି। ବ୍ୟାଙ୍କକ୍ରେ ଜଣେ କୁକ୍ରୁ ମୁମ୍ବାଇର ଜଣେ ସାଧାରଣ କଳାକାର ଭାବେ କ୍ୟାରିୟର ଆରମ୍ଭ କରିଥିବା ଅକ୍ଷୟ ବର୍ତ୍ତମାନର ଜଣେ ସଫଳ ସୁପରଷ୍ଟାରଙ୍କ ମଧ୍ୟରେ ଗଣାଯାଉଛନ୍ତି। ତାଙ୍କର ଏହି ଯାତ୍ରା ବେଶ୍ ପ୍ରେରଣାଦାୟକ ବୋଲି ସେ କହିଛନ୍ତି। ଯଦି ଆଗାମୀ ଭବିଷ୍ୟତରେ ଅକ୍ଷୟଙ୍କ ଜୀବନୀକୁ ନେଇ ବାୟୋପିକ ନିର୍ମାଣ କରାଯାଏ, ତେବେ ଅକ୍ଷୟଙ୍କ ଭୂମିକାକୁ କରିବାକୁ ଇଚ୍ଛା ପ୍ରକାଶ କରବେ ବୋଲି ବିଦ୍ୟୁତ କହିଛନ୍ତି। ଏଥିସହିତ ସେ କହିଛନ୍ତି ଯେ, ଅକ୍ଷୟ ଓ ତାଙ୍କ କ୍ୟାରିୟରେ ବହୁ ସମାନତା ରହିଛି। ଅକ୍ଷୟଙ୍କ ପରି ବିଦ୍ୟୁତ୍ ମଧ୍ୟ ଛୋଟ ମୋଟ ଭୂମିକାରୁ କ୍ୟାରିୟର ଆରମ୍ଭ କରିଛନ୍ତି। ସେହିପରି ଫିଲ୍ମର ଆକ୍ସନ ସିନ୍ଗୁଡ଼ିକ ଦୁହେଁ ନିଜେ କରିବାକୁ ପସନ୍ଦ କରନ୍ତି। ବିଦ୍ୟୁତଙ୍କ ଆଗାମୀ ପ୍ରୋଜେକ୍ଟ କଥା କହିବାକୁ ଗଲେ, ପାନୋରମା ଷ୍ଟୁଡିଓଜ୍ ପ୍ରଡକ୍ସନରେ ନିର୍ର୍ମିତ ହେଉଥିବା ନୂଆ ଫିଲ୍ମ ‘ଖୁଦା ହାଫିଜ୍’ରେ ସେ ଆସୁଛନ୍ତି। ଏହା ଏକ ରୋମାଣ୍ଟିକ ଆକ୍ସନ ଥ୍ରୀଲର ଫିଲ୍ମ ଅଟେ। ଫାରୁକ କୁମାରଙ୍କ ଦ୍ୱାରା ନିର୍ଦ୍ଦେଶିତ ଏହି ଫିଲ୍ମଟି ଆସନ୍ତାବର୍ଷ ପ୍ରାରମ୍ଭରେ ମୁକ୍ତିଲାଭ କରିବାର ଯୋଜନା ରହିଛି। ଫିଲ୍ମଟିର ସୁଟିଂ ଉଜ୍ବେକିସ୍ତାନରେ ଆରମ୍ଭ ହୋଇଥିବାବେଳେ କୁମାର ମଙ୍ଗତ୍ ପାଠକ ଏବଂ ଅଭିଷେକ ପାଠକ ମିଳିତ ଭାବେ ଏହାର ପ୍ରଯୋଜନା ସମ୍ଭାଳୁଛନ୍ତି। ଏଥିସହିତ ବିଦ୍ୟୁତଙ୍କ ଅଭିନୀତ ‘କମାଣ୍ଡୋ-୩’ ନଭେମ୍ବର ୨୯ରେ ରିଲିଜ ଅପେକ୍ଷାରେ ରହିଛି। ଏଥିରେ ତାଙ୍କ ଅପୋଜିଟ୍ରେ ଅଦା ଶର୍ମା ଅଭିନୟ କରିଛନ୍ତି। ଏହି ଦୁଇ ଫିଲ୍ମ ବ୍ୟତୀତ ଏସ୍. ଶଙ୍କରଙ୍କ ଦ୍ୱାରା ନିର୍ଦ୍ଦେଶିତ ତାମିଲ ଫିଲ୍ମ ‘ଇଣ୍ଡିଆନ-୨’ରେ ମଧ୍ୟ ବିଦ୍ୟୁତ୍ ନଜର ଆସିବେ।