ଅନୁଗୋଳ ଅଫିସ,୨୪।୭: ଅନୁଗୋଳ ଜିଲାରେ ଗୋଟିଏ ସପ୍ତାହ ମଧ୍ୟରେ ଦୁଇଟି ମୃତଦେହରୁ ଆଖି ଗାଏବ ଏବଂ ଜଣେ ଆଠ ବର୍ଷୀୟା ନାବାଳିକାଙ୍କୁ ବଳାତ୍କାର ଘଟଣା ପ୍ରତିବାଦରେ ବୁଧବାର ଭାଜପା ଅନୁଗୋଳ ନଗର ମଣ୍ଡଳ ପକ୍ଷରୁ ୧୨ଘଣ୍ଟିଆ ବନ୍ଦ ଡାକରା ଦିଆଯାଇଛି। ବୁଧବାର ସକାଳୁ ସହରର ସମସ୍ତ ଦୋକାନବଜାର ବନ୍ଦ ରହିଥିବା ଦେଖିବାକୁ ମିଳିଛି। ଭାଜପା ନେତା ଏବଂ କର୍ମୀମାନେ ପ୍ରମୁଖ ଛକଗୁଡ଼ିକରୁ ପିକେଟିଂ କରିବା ସହ ଟାୟାର୍ ଜାଳି ବିକ୍ଷୋଭ ପ୍ରଦର୍ଶନ କରୁଛନ୍ତି। ସହରର ପ୍ରବେଶ ଦ୍ୱାର ଯଥା ହୁଲୁରିସିଂହା ଛକ, ତୁରଙ୍ଗ ଛକ, ପ୍ରଗତିନଗର ଛକ ଏବଂ ହାଟ ଛକରେ ରାସ୍ତା ଅବରୋଧ କରାଯାଇଛି। ଫଳରେ ସହର ଭିତରକୁ ଯାନବାହନ ପ୍ରବେଶ କରିପାରୁନାହିଁ। ବନ୍ଦକୁ କେତେକ ସଂଗଠନ ମଧ୍ୟ ସମର୍ଥନ କରୁଥିବା ଦଳ ପକ୍ଷରୁ କୁହାଯାଉଛି। ଭାଜପା ଅନୁଗୋଳ ରାଜ୍ୟ କାର୍ଯ୍ୟକାରିଣୀ ସଦସ୍ୟ ପ୍ରତାପ ଚନ୍ଦ୍ର ପ୍ରଧାନଙ୍କ ନେତୃତ୍ୱରେ ନଗର ମଣ୍ଡଳ ସଭାନେତ୍ରୀ ନମିତା ଦଳବେହେରାଙ୍କ, ରୂଦ୍ରନାରାୟଣ ପାଣି, ସରିତା ମିଶ୍ର, ରୋଜାଲିନ ଦାସ, ସୁଦୀପ ଗଡ଼ନାଏକ, ସୁଜାତା ଦାସ, ଚନ୍ଦ୍ରକାନ୍ତ ପ୍ରଧାନଙ୍କ ସମେତ ବହୁ କର୍ମୀ ଏବଂ ନେତା ବିକ୍ଷୋଭ ପ୍ରଦର୍ଶନରେ ସାମିଲ ହୋଇଛନ୍ତି। ଦଳ ପକ୍ଷରୁ ଅଭିଯୋଗ ହୋଇଛି ଯେ, ଗତ ଶୁକ୍ରବାର ଜଣେ ଚାରି ବର୍ଷୀୟା ଶିଶୁକନ୍ୟାର ମୃତଦେହରୁ ଦୁଇଟି ଆଖି ଗାଏବ ହୋଇଯାଇଥିଲା। ତା’ର ଦୁଇ ଦିନ ପରେ ଆଠ ବର୍ଷୀୟା ଜଣେ ନାବାଳିକାଙ୍କୁ ବଳାତ୍କାର କରାଯାଇଥିଲା। ଏବେ ପୁଣି ଥରେ ମଙ୍ଗଳବାର ଏକ ମୃତଦେହରୁ ଆଖି ଗାଏବ ହୋଇଯାଇଛି। ବାରମ୍ବାର ଏଭଳି ଗୁରୁତର ଅପରାଧିକ ଘଟଣାକୁ ନେଇ ସହରବାସୀ ଭୟଭୀତ ଅବସ୍ଥାରେ ରହୁଛନ୍ତି। ବିପର୍ଯ୍ୟସ୍ତ ଆଇନଶୃଙ୍ଖଳା ପରିସ୍ଥିତି ନେଇ ଜିଲାପାଳ ଏବଂ ଏସ୍ପିଙ୍କୁ ଦାବିପତ୍ର ପ୍ରଦାନ କରାଯାଇଥିଲା। ହେଲେ କୌଣସି ସୁଫଳ ମିଳିଲା ନାହିଁ। ସେହିଭଳି ସହର ସାରା ଏବେ ଅଳିଆ ଆବର୍ଜନା ଭର୍ତ୍ତି ହୋଇଯାଇଛି । ପୌରପରିଷଦ ଭାଙ୍ଗିବା ପରେ ପ୍ରଶାସନ ଦାୟିତ୍ୱ ନେଇଛି। କିନ୍ତୁ ଆବର୍ଜନା ସଫା ଦିଗରେ ପଦକ୍ଷେପ ନେଉନି। ପୌରପାଳିକାର କାର୍ଯ୍ୟରେ ବ୍ୟାପକ ଅନିୟମିତତା ଦେଖିବାକୁ ମିଳୁଛି। ଏଣୁ ଏହି ବନ୍ଦ ଡାକରା ଦିଆଯାଇଛି। ଯଦି ଆଇନଶୃଙ୍ଖଳା ପରିସ୍ଥିତି ଏବଂ ଆଖି ଗାଏବ ଘଟଣାର ପର୍ଦ୍ଦାଫାଶ କରିବାରେ ପୋଲିସ ପ୍ରଶାସନ ବିଫଳ ହୁଏ, ତେବେ ଆଗାମୀ ଦିନରେ ବଡ଼ ଧରଣର ଆନ୍ଦୋଳନ ଡାକରା ଦିଆଯିବ ବୋଲି ଦଳ ପକ୍ଷରୁ ଚେତାବନୀ ଦିଆଯାଇଛି।