ପରଜଙ୍ଗ,୧୭।୭(ଡି.ଏନ୍.ଏ.): ଢେଙ୍କାନାଳ ଜିଲା ପରଜଙ୍ଗ ଥାନା ଅନ୍ତର୍ଗତ ୫୩ ନଂ. ଜାତୀୟ ରାଜପଥର ଖଇରାମୁଣ୍ଡା ଗାଁ ନିକଟରେ ବୁଧବାର ଭୋରରେ ଏକ ପରିବା ବୋଝେଇ ଅଟୋ ଗଛରେ ପିଟି ହୋଇଯିବାରୁ ଚାଳକ ଗୁରୁତର ଆହତ ହୋଇଛନ୍ତି। ସେ ହେଲେ କଟାବାହାଳ ଗ୍ରାମର ସୁରେନ୍ଦ୍ର ଦେହୁରୀ ।
ସୂଚନାଯୋଗ୍ୟ, ଅଟୋଟି ଅନୁଗୋଳରୁ ପରିବା ବୋଝେଇକରି ପରଜଙ୍ଗ ଅଭିମୁଖେ ଯାଉଥିଲା। ସୁରେନ୍ଦ୍ରଙ୍କ ଆଖି ଲାଗିଯିବାରୁ ଖଇରାମୁଣ୍ଡା ଗାଁ ନିକଟରେ ଏକ ଶାଗୁଆନ ଗଛକୁ ଧକ୍କା ଦେଇଥିଲା। ଫଳରେ ସୁରେନ୍ଦ୍ର ଗାଡ଼ିଭିତରେ ଚାପିହୋଇଯାଇଥିଲେ। ଖବର ପାଇ ପରଜଙ୍ଗ ଅଗ୍ନିଶମ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ସ୍ଥାନୀୟ ଗ୍ରାମବାସୀଙ୍କ ସହାୟତାରେ ତାଙ୍କୁ ଉଦ୍ଧାରକରି ପରଜଙ୍ଗ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ଅବସ୍ଥା ସଙ୍କଟାପନ୍ନ ହେବାରୁ ସୁରେନ୍ଦ୍ରଙ୍କୁ ଅନୁଗୋଳ ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।