ବୋଲଗଡ଼,୩୧ା୫(ଡି.ଏନ.ଏ.)-ଆଗକୁ ବର୍ଷା ଋତୁ। ଜୁନ୍ ୩ୟ ସପ୍ତାହରେ ମୌସୁମୀ ଆସିବା ନେଇ ପାଣିପାଗ ବିଭାଗ ସୂଚନା ଦେଇଛି। ତେବେ ବର୍ଷା ପୂର୍ବରୁ ବୋଲଗଡ଼ ବ୍ଲକ ଅଞ୍ଚଳରେ ରାସ୍ତା ମରାମତି କାର୍ଯ୍ୟ ସରିନି କିମ୍ବା ନୂତନ ଭାବେ ନିର୍ମିତ ୨ଟି ସେତୁର ଆପ୍ରୋଚ ରୋଡ କାର୍ଯ୍ୟ ମଧ୍ୟ ଶେଷ ହୋଇନି। ଏଥିଯୋଗୁ ଲୋକେ ବର୍ଷା ଦିନେ ଅସୁବିଧା ଭୋଗିବେ ବୋଲି ସାଧାରଣରେ ଅଭିଯୋଗ ହୋଇଛି। ସୂଚନାଯୋଗ୍ୟ, ବୋଲଗଡ଼ଠାରୁ ଦଳାଇସାହି ରାସ୍ତା କାର୍ଯ୍ୟ ୨୦୧୬ ରୁ ଶେଷ ହୋଇଛି । ମାତ୍ର ଏହି ରାସ୍ତାର ଏକ ନାଳ ଉପରେ ନିର୍ମିତ ବ୍ରିଜର ଉଭୟ ପାଶର୍ବରେ ଆପ୍ରୋଚ ରୋଡ କାର୍ଯ୍ୟ ସରିନି। ଏହି ରାସ୍ତାଦେଇ କଳାଙ୍ଗ, ଫାସିଓଦା ଦଳାଇସାହି ପଞ୍ଚାୟତବାସୀ ବ୍ଲକ କାର୍ଯ୍ୟାଳୟକୁ ଆସିଥାନ୍ତି। ତେଣୁ ତୁରନ୍ତ ଆପ୍ରୋଚ ରୋଡଟିକୁ ପକ୍କା କରିବା ପାଇଁ ଲୋକେ ଦାବି କରିଛନ୍ତି। ସେହିପରି ବାଙ୍କୋଇଠାରୁ ବିନୋଦପଡ଼ା ମୁଖ୍ୟମନ୍ତ୍ରୀ ଗ୍ରାମ ସଡକ ରାସ୍ତାଟି ନିର୍ମାଣାଧୀନ ଅବସ୍ଥାରେ ରହିଛି । ଏହି ରାସ୍ତା କାର୍ଯ୍ୟ ଆରମ୍ଭ ପୂର୍ବରୁ ହଡାନଦୀଠାରେ ବିଜୁ ସେତୁ ନିର୍ମାଣ ହୋଇଛି । ଏଠାରେ ମଧ୍ୟ ରାସ୍ତାର ଅବସ୍ଥା ଭଲ ନୁହେଁ। ବିଜୁ ସେତୁର ଉଭୟ ପାର୍ଶ୍ୱରେ ଆପ୍ରୋଚ ରୋଡ଼ ନିର୍ମାଣ ହୋଇପାରିନି। ରାଜସୁନାଖଳାଠାରୁ ବାଙ୍କୋଇ ଦେଇ ଯାଇଥିବା ପୂର୍ତ୍ତ ରାସ୍ତାଟି ମଧ୍ୟ ଶୋଚନୀୟ ଅବସ୍ଥାରେ ରହିଛି। ଏହି ରାସ୍ତାଟି ଭାପୁର ବ୍ଲକ ଏବଂ ବାଙ୍କୀ ଅଞ୍ଚଳକୁ ରାଜସୁନାଖଳାଠାରେ ୫୭ନଂ ଜାତୀୟ ରାଜପଥକୁ ସଂଯୋଗ କରୁଛି। ଏଠାରେ ପ୍ରତ୍ୟହ ବଡକୁମାରୀ, ବାଙ୍କୋଇଦେଶ, ସାଗରଗଁା, ଆରିକମା, ପାଟପୁର ଶାସନ ଏବଂ ଧଳାପଥର ପଞ୍ଚାୟତବାସୀ ଯାତାୟାତ କରିଥାନ୍ତିି । ବଡକୁମାରୀ ହାଟବସ୍ତ ମଧ୍ୟବର୍ତ୍ତୀ ରାସ୍ତା କଦର୍ଯ୍ୟ ଅବସ୍ଥାରେ ଥିଲେ ମଧ୍ୟ ଏହାକୁ ମରାମତି କରାଯାଉନି। ଏବେଠାରୁ ରାସ୍ତାକାମ ଶେଷ ନ କଲେ ବର୍ଷାଦିନେ ରାସ୍ତାର ଅବସ୍ଥା ଅଧିକ ଶୋଚନୀୟ ହୋଇ ଦୁର୍ଘଟଣାର କାରଣ ପାଲଟିବ। ତେଣୁ ଜନସାଧାରଣଙ୍କ ସୁବିଧା ଦୃଷ୍ଟିରୁ ବର୍ଷାଦିନ ପୂର୍ବରୁ ରାସ୍ତା ମରାମତି, ଆପ୍ରୋଚ ରୋଡ଼ଗୁଡିର କାର୍ଯ୍ୟ ଶେଷ କରିବାକୁ ବିିଭିନ୍ନ ମହଲରେ ଦାବି ହେଉଛି।