ବରଗଡ଼ ଅଫିସ, ୧୪।୧୦: ବରଗଡ଼ ଜିଲା ବିଜେପୁର ଉପନିର୍ବାଚନକୁ ଆଉ ମାତ୍ର ସପ୍ତାହେ ବାକି। ୨/୩ ଦିନ ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଜେପୁରକୁ ନିର୍ବାଚନୀ ପ୍ରଚାରରେ ଯିବାର କାର୍ଯ୍ୟକ୍ରମ ରହିଛି। ତେବେ ଏହାର ଅବ୍ୟବହିତ ପୂର୍ବରୁ ସ୍ଥାନୀୟ ତୋରା ସମବାୟ ଚିନିକଳ କର୍ମଚାରୀମାନେ ବିଭିନ୍ନ ଦାବିନେଇ ସୋମବାରରୁ ବରଗଡ଼ ଜିଲାପାଳ ଅଫିସ ଆଗରେ ଦୁଇ ଦିନିଆ ଧାରଣା ଆରମ୍ଭ କରିଛନ୍ତି। ଦୀର୍ଘ ୨୫ ମାସ ହେଲା ସେମାନଙ୍କୁ ଦରମା ନ ମିଳିବା ଏବଂ ଗତ ସାଧାରଣ ନିର୍ବାଚନ ପୂର୍ବରୁ ଅର୍ଥାତ୍ ଫେବୃଆରୀ ମାସରେ ମୁଖ୍ୟମନ୍ତ୍ରୀ ସୋହେଲା ବ୍ଲକ ଇଚ୍ଛାପାଲିରେ କାଳିଆ ଯୋଜନାନେଇ ଅନୁଷ୍ଠିତ ସମାବେଶରେ ତୋରା ସମବାୟ ଚିନିକଳ ପାଇଁ ଘୋଷଣା କରିଥିବା ୧୧ କୋଟି ଟଙ୍କାର ପ୍ୟାକେଜର କୌଣସି ସୁଫଳ ଏପର୍ଯ୍ୟନ୍ତ ମିଳି ନ ଥିବା ପ୍ରତିବାଦରେ ଧାରଣାରେ ବସିଥିବା ଚିନିକଳ କର୍ମଚାରୀମାନେ କହିଛନ୍ତି। ଚିନିକଳ କର୍ମଚାରୀ ସଂଘର ସମ୍ପାଦକ ସୁବ୍ରତ ସାହୁ, ଭବାନୀ ପ୍ରସାଦ ସାହୁ ପ୍ରମୁଖ ଏହାର ନେତୃତ୍ୱ ନେଇଥିବାବେଳେ ସମସ୍ତ କର୍ମଚାରୀମାନେ ଧାରଣାରେ ସାମିଲ ଅଛନ୍ତି।
ପ୍ରକାଶଥାଉକି, ଗତ ସାଧାରଣ ନିର୍ବାଚନ ପୂର୍ବରୁ ଚିନିକଳ କର୍ମଚାରୀମାନେ ଦୀର୍ଘ ୭୩ ଦିନଧରି ଧାରଣାରେ ବସିଥିଲେ। ମୁଖ୍ୟମନ୍ତ୍ରୀଙ୍କ ୧୧ କୋଟିର ପ୍ୟାକେଜ ଘୋଷଣା ପରେ ସେତେବେଳେ ଧାରଣାରୁ ଓହରିଥିଲେ।