ଭୁବନେଶ୍ୱର,୨୫।୪(ବ୍ୟୁରୋ): ମେ ୩ ତାରିଖରେ ଶେଷ ହେବ ଲକ୍ଡାଉନ୍। ଏହାପରେ ବାହାରେ ଫସି ରହିଥିବା ଓଡ଼ିଆ ଘରକୁ ଫେରିବେ। ହେଲେ ଆକ୍ରାନ୍ତ ରାଜ୍ୟରୁ ଫେରୁଥିବାରୁ ସଂକ୍ରମଣ ହେବାର ଆଶଙ୍କା ରହିଛି। ଏହାକୁ ଦୃଷ୍ଟିରେ ରଖି ରାଜ୍ୟ ସରକାରଙ୍କ ପକ୍ଷରୁ ପଞ୍ଜୀକରଣ ବ୍ୟବସ୍ଥା କରାଯାଇଛି। ଏନେଇ ଶନିବାର ରାଜ୍ୟ ସରକାରଙ୍କ କରୋନା ମୁକାବିଲା କମିଟି ମୁଖ୍ୟ ସୁବ୍ରତୋ ବାଗ୍ଚୀ ଅଧିକ ସୂଚନା ଦେଇଛନ୍ତି।
ସେ କହିଛନ୍ତି, ଓଡ଼ିଶାର ମାଟିପାଣିପବନ ଉପରେ ସୁରତ, ତିରୁପୁର ଏବଂ ଏନ୍ସିଆର୍ରୁ ଫେରିବାକୁ ଥିବା ଲୋକଙ୍କ ସେତିକି ଅଧିକାର ଅଛି, ଯେତିକି ରହିଛି ସହରାଞ୍ଚଳର ଶିକ୍ଷିତ ବ୍ୟକ୍ତିମାନଙ୍କର ରହିଛି। ସେମାନଙ୍କୁ ସୁରକ୍ଷିତ ଭାବେ ଫେରାଇ ଆଣିବା, ତାଙ୍କୁ ନିରାପଦ ଭାବେ ୧୪ ଦିନ ଅଣସରରେ ରଖିବା, ତାଙ୍କୁ ତାଙ୍କ ପରିବେଶ ସହ ପୁଣି ମିଶାଇ ଦେବାର ଦାୟିତ୍ୱ ଆମ ସମସ୍ତଙ୍କର। କିଛି ଦିନ ତଳେ ବିଶ୍ୱ ସ୍ବାସ୍ଥ୍ୟ ସଂଗଠନର ମୁଖ୍ୟ ଟେଡ୍ରସ୍ କହିଥିଲେ, କରୋନାର ବିପର୍ଯ୍ୟୟକୁ ଟାଳିବାକୁ ହେଲେ ସମ୍ପୂର୍ଣ୍ଣ ସରକାର ଏବଂ ସମ୍ପୂର୍ଣ୍ଣ ସମାଜକୁ ସମନ୍ବିତ ହେବାକୁ ପଡ଼ିବ। ଏବେ ସେହି ସମୟ ଆସିଛି ବୋଲି ସେ କହିଛନ୍ତି।