ଆଗ୍ରା,୨୪।୨: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସୋମବାର ଦୁଇ ଦିନିଆ ଭାରତ ଗସ୍ତରେ ଆସିଛନ୍ତି। ଗୁଜରାଟର ଅହମଦାବାଦରେ ଆୟୋଜିତ ହୋଇଥିବା ‘ନମସ୍ତେ ଟ୍ରମ୍ପ’ କାର୍ଯ୍ୟକ୍ରମ ସାରି ଟ୍ରମ୍ପ ପରିବାର ସହ ଉତ୍ତରପ୍ରଦେଶ ଆଗ୍ରାକୁ ଗସ୍ତ କରିଛନ୍ତି। ଆଗ୍ରାରେ ପହଞ୍ଚିବା ପରେ ଟ୍ରମ୍ପ ତାଙ୍କ ସହଧର୍ମଣୀ ମେଲାନିଆଙ୍କ ସମେତ ଝିଅ ଇଭାଙ୍କା ଓ ଜ୍ୱାଇଁ ଜେରେଡଙ୍କୁ ଉତ୍ତରପ୍ରଦେଶ ରାଜ୍ୟପାଳ ଆନନ୍ଦୀ ବେନ ପଟେଲ ଓ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସ୍ବାଗତ କରିଛନ୍ତି। ଟ୍ରମ୍ପଙ୍କ ପରିବାରକୁ ସ୍ବାଗତ କରିବା ପାଇଁ କଳାକାରମାନେ ଲୋକନୃତ୍ୟ ପରିବେଷଣ କରିଥିଲେ। ସେହି ସମୟରେ ଟ୍ରମ୍ପଙ୍କ ପରିବାର ପ୍ରାୟ ୭ରୁ ୮ ମିନିଟ୍ ଏହି ଲୋକନୃତ୍ୟର ମଜା ଉଠାଇଥିବା ଦେଖିବାକୁ ମିଳିଛି।ଏହାପରେ ସେମାନେ ବିମାନ ବନ୍ଦରରୁ ତାଜମହଲ ଅଭିମୂଖେ ବାହାରି ଯାଇଥିଲେ। ଟ୍ରମ୍ପଙ୍କ ସ୍ବାଗତ ପାଇଁ ବିମାନ ବନ୍ଦରରୁ ତାଜମହଲ ପର୍ଯ୍ୟନ୍ତ ୨୧ଟି ସ୍ଥାନରେ ୩ହଜାର କଳାକାର ଭାରତୀୟ କଳା, ସଂସ୍କୃତିକୁ ପରିବେଷଣ କରିବେ। ଅପରପକ୍ଷେ ପ୍ରଥମ ଥର ଭାରତ ଆସିଥିବା ଟ୍ରମ୍ପଙ୍କୁ ଆଗ୍ରାର ମେୟର ୬ଶହ ଗ୍ରାମ ଓଜନ ଓ ୧୨ ଇଞ୍ଚ୍ ଲମ୍ବର ଏକ ରୂପାର ଚାବି, ତାଜମହଲର ଏକ ମଡେଲ ଓ ମୟୁରର ଏକ କଳାକୃତିକୁ ଉପହାର ସ୍ବରୂପ ଭେଟି ଦେବେ। ଓ ଆଗ୍ରାରେ ଟ୍ରମ୍ପ ପ୍ରାୟ ୨ଘଣ୍ଟା ରହି ପରେ ସେ ଦିଲ୍ଲୀ ଗସ୍ତ କରିବେ। ତେବେ ଟ୍ରମ୍ପଙ୍କ ଗସ୍ତ ପାଇଁ ତାଜମହଲରେ ଅପରାହ୍ନ ୧୨ଟା ପରଠାରୁ ସାଧାରଣ ପର୍ଯ୍ୟଟକଙ୍କ ପାଇଁ ବନ୍ଦ କରାଯାଇଛି।