କଟକ ଅଫିସ,୪ା୧୦: ଆଚାର୍ଯ୍ୟ ହରିହର ଆଞ୍ଚଳିକ କର୍କଟ କେନ୍ଦ୍ରର ନିର୍ଦ୍ଦେଶକ ଡା. ଲଲାଟେନ୍ଦୁ ଷଡଙ୍ଗୀ ଚଞ୍ଚକତା କରି ନିଜ ବେତନ ବାବଦରେ ପ୍ରାପ୍ୟଠାରୁ ୩୦ ଲକ୍ଷରୁ ଅଧିକ ଉଠାଇ ନେଇଥିବା ଅଭିଯୋଗର ତଦନ୍ତ ପାଇଁ ହାଇକୋର୍ଟରେ ମାମଲା ରୁଜୁ ହୋଇଥିଲା। ତେବେ ତଦନ୍ତ ପାଇଁ ପଦକ୍ଷେପ ସଂକ୍ରାନ୍ତରେ ଜବାବ ରଖିବାକୁ ବିଚାରପତି ଦେବବ୍ରତ ଦାଶଙ୍କ ଖଣ୍ଡପୀଠ ଭିଜିଲାନ୍ସ ବିଭାଗକୁ ନିର୍ଦ୍ଦେଶ ଦେଇଛନ୍ତି। ନଭେମ୍ବର ୭ରେ ମାମଲାର ପରବର୍ତ୍ତୀ ଶୁଣାଣି ହେବ।
ମାମଲାରୁ ପକାଶ, ୨୦୧୫ ମେ ୧୩ରେ ପ୍ରକାଶ ପାଇଥିବା ସ୍ବାସ୍ଥ୍ୟ ବିଭାଗର ନୋଟିଫିକେସନ ନଂ.୯୪୫୦ ଅନୁଯାୟୀ, ଭାରତୀୟ ରେଳ ମନ୍ତ୍ରାଳୟ ଦ୍ୱାରା ପରିଚାଳିତ କର୍କଟ ଚିକିତ୍ସାଳୟରେ ମୁଖ୍ୟ ସର୍ଜନ ଭାବେ କାର୍ଯ୍ୟ କରୁଥିବା ଡା. ଲଲାଟେନ୍ଦୁ ଷଡଙ୍ଗୀ ଆଚାର୍ଯ୍ୟ ହରିହର କର୍କଟ କେନ୍ଦ୍ରର ନିର୍ଦ୍ଦେଶକ ପଦବୀ ପାଇଁ ମନୋନୀତ ହୋଇଥିଲେ। ସେ ନିଜ ମୂଳ ଚାକରିରୁ ଇସ୍ତଫା ଦେଇ ୨୦୧୫ ସେପ୍ଟେମ୍ବର ୩ରେ ଆଚାର୍ଯ୍ୟ ହରିହର ଆଞ୍ଚଳିକ କେନ୍ଦ୍ରର ନିର୍ଦ୍ଦେଶକ ଭାବେ ଯୋଗଦେଇଥିଲେ। ରାଜ୍ୟ ସରକାରଙ୍କ ବିଜ୍ଞପ୍ତି ଅନୁଯାୟୀ ଡା. ଷଡଙ୍ଗୀ ମାସିକ ୮୦ ହଜାର ଟଙ୍କା ବେତନ ପାଇବା କଥା ା କର୍କଟ କେନ୍ଦ୍ରର ମୁଖ୍ୟ ଭାବେ ଡା. ଷଡଙ୍ଗୀ ନିଜେ ଏହି କେନ୍ଦ୍ରର ଡ୍ରଇଂ ଆଣ୍ଡ ଡିସ୍ବର୍ସିଂ ଅଫିସର(ଡିଡିଓ) ଥିଲେ। ଏହାର ସୁଯୋଗ ନେଇ କର୍କଟ କେନ୍ଦ୍ର ପରିଚଳନା କମିଟିର ବିନା ସୁପାରିସରେ ସେ ନିଜ ଦରମାକୁ ବଢାଇବା ପାଇଁ ସ୍ବାସ୍ଥ୍ୟ ବିଭାଗକୁ ସୁପାରିସ କରିଥିଲେ। ଏହି ବେଆଇନ କାର୍ଯ୍ୟରେ ତକତ୍ାଳୀନ ଅତିରିକ୍ତ ଶାସନ ସଚିବ ସହଯୋଗ କରିଥିଲେ। କର୍କଟ କେନ୍ଦ୍ର ପରିଚାଳନା କମିଟି ସଭାପତି ଥିବା ସ୍ବାସ୍ଥ୍ୟମନ୍ତ୍ରୀଙ୍କ ସ୍ବୀକୃତି ନ ନେଇ ନିର୍ଦ୍ଦେଶକଙ୍କ ଦରମା ୧ ଲକ୍ଷ ୬୪ ହଜାର ୯୨୮ ଟଙ୍କା ହେଲା ବୋଲି ଅତିରିକ୍ତ ଶାସନ ସଚିବ ୨୦୧୫ ଅକ୍ଟୋବରରେ କର୍କଟ କେନ୍ଦ୍ର ନିର୍ଦ୍ଦେଶକଙ୍କୁ ଚିଠି କରିଥିଲେ। ଫଳରେ ଡା. ଷଡଙ୍ଗୀ ୨୦୧୬ରୁ ଆଜି ପର୍ଯ୍ୟନ୍ତ ପାଖାପାଖି ୩୦ ଲକ୍ଷରୁ ଅଧିକ ଟଙ୍କା ନେଇ ସାରିଥିଲେ। ସୂଚନା ଅଧିକାର ଆଇନ ବଳରେ ସୂଚନା ଅଧିକାର କର୍ମୀ ରୋହନ ମହାନ୍ତି ସମସ୍ତ ତଥ୍ୟ ପାଇବା ପରେ ଭିଜିଲାନ୍ସ ବିଭାଗ ନିର୍ଦ୍ଦେଶକ ଓ ଏସ୍ପିଙ୍କୁ ତଦନ୍ତ ପାଇଁ ନିବେଦନ କରିଥିଲେ। କିନ୍ତୁ ଭିଜିଲାନ୍ସ ବିଭାଗ ପଦକ୍ଷେପ ନ ନେବାରୁ ମହାନ୍ତି ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଆବେଦନକାରୀଙ୍କ ପକ୍ଷରୁ ଆଇନଜୀବୀ କ୍ଷୀରୋଦ ରାଉତ ମାମଲା ପରିଚାଳନା କରୁଛନ୍ତି।