ବାକୁ, ୨୩ା ୩ (ଏପି)-ଆଜରବୈଜାନ ଫର୍ମୁଲା ଓ୍ବାନ୍ ଗ୍ରାଁପ୍ରିକୁ ସୋମବାର ସ୍ଥଗିତ ଘୋଷଣା କରାଯାଇଛି। ମହାମାରୀ କରୋନା ଭାଇରସ୍ ଆଶଙ୍କା ଯୋଗୁ ଜୁନ୍ ମାସ ମଧ୍ୟ ଭାଗ ପର୍ଯ୍ୟନ୍ତ ଫର୍ମୁଲା ଓ୍ବାନ ଆରମ୍ଭକୁ ସ୍ଥଗିତ ରଖାଯାଇଛି। ଭାଇରସ୍ ଯୋଗୁ ୨୦୨୦ ସିଜନର ପ୍ରଥମ ୮ଟି ରେସ୍ ସ୍ଥଗିତ କିମ୍ବା ବାତିଲ କରାଯାଇଛି। ବାକୁ ସିଟି ସର୍କିଟରେ ଜୁନ୍ ୭ରେ ଆଜରବୈଜାନ ଗ୍ରାଁ ପ୍ରି ଆୟୋଜନ ହେବାର କାର୍ଯ୍ୟକ୍ରମ ରହିଥିଲା। ସ୍ଥାନୀୟ ସରକାର ଏବଂ ଫେଡେରେଶନ ଅଫ୍ ଇଣ୍ଟରନ୍ୟାଶନାଲ ଅଟୋମୋବାଇଲ୍( ଏଫ୍ଆଇଏ)ର ପରିଚାଳନା ପରିଷଦ ମଧ୍ୟରେ ଆଲୋଚନା ପରେ ଏହି ନିଷ୍ପତ୍ତି ନିଆଯାଇଛି। ରେସ୍ର ନୂଆ ତାରିଖ ସିଜନର ପର ଭାଗରେ ଘୋଷଣା କରାଯିବ। ଆଜରବୈଜାନରେ ୨୦୧୭ରୁ ଫର୍ମୁଲାଓ୍ବାନ ରେସ୍ ଆୟୋଜିତ ହୋଇଆସୁଛି। ସୂଚନାଯୋଗ୍ୟ ମାର୍ଚ୍ଚ ୧୩ରେ ସିଜନ ଆରମ୍ଭ ଅଷ୍ଟ୍ରେଲିଆନ ଗ୍ରାଁ ପ୍ରିକୁ ରେସ୍ ଆରମ୍ଭରୁ ଅଳ୍ପ କେଇ ଘଣ୍ଟା ପୂର୍ବରୁ ବାତିଲ କରାଯାଇଥିଲା। ଏହାର ସପ୍ତାହକ ପରେ ବିନାଦର୍ଶକରେ ଆୟୋଜିତ ହେବାକୁ ଥିବା ବାହାରିନ୍ ଗ୍ରାଁପ୍ରି ଏବଂ ଏପ୍ରିଲ ୫ରେ ଭିଏତ୍ନାମ ଗ୍ରାଁ ପ୍ରିକୁ ମଧ୍ୟ ସଙ୍ଗେ ସଙ୍ଗେ ସ୍ଥଗିତ ରଖାଯାଇଥିଲା। ଏପ୍ରିଲ ୧୯ରେ ସାଂଘାଇଠାରେ ଆୟୋଜିତ ହେବାକୁଥିବା ଚାଇନିଜ ଗ୍ରାଁ ପ୍ରିକୁ ଫେବୃୟାରୀରୁ ସ୍ଥଗିତ ଘୋଷଣା କରାଯାଇ ସାରିଥିଲା। ଗତ ସପ୍ତାହରେ ଯେଉଁ ୩ଟି ରେସ୍ ବାତିଲ ଘୋଷଣା ହୋଇଥିଲା ତନ୍ମଧ୍ୟରେ ମୋନାକୋ ଗ୍ରାଁ ପ୍ରି ଅନ୍ୟତମ। ଅନ୍ୟ ଦୁଇଟି ରେସ୍ ନେଦରଲାଣ୍ଡ୍ସ ଓ ସ୍ପେନ୍ରେ ହୋଇଥାନ୍ତା। ଫର୍ମୁଲା ଓ୍ବାନ କ୍ୟାଲେଣ୍ଡରରେ ଆଜରବୈଜାନ ପଛକୁ ପରବର୍ତ୍ତି ରେସ୍ ଜୁନ୍ ୧୪ରେ କାନାଡ଼ାରେ ଅନୁଷ୍ଠିତ ହେବାର କାର୍ଯ୍ୟକ୍ରମ ରହିଛି।
