କଲମ୍ବୋ,୩୧।୫ (ପି.ଟି.): କୋଭିଡ୍-୧୯ ମହାମାରୀ ଜାରି ରହିଥିବା ବେଳେ ୧୩ ଶ୍ରୀଲଙ୍କା କ୍ରିକେଟରଙ୍କୁ ନେଇ ଏକ ଗ୍ରୁପ୍ ସୋମବାରଠାରୁ ଟ୍ରେନିଂ ଆରମ୍ଭ କରିବାକୁ ଯାଉଛନ୍ତି। ଏମାନଙ୍କ ମଧ୍ୟରେ ଅଧିକାଂଶ ଖେଳାଳି ବୋଲର ବୋଲି ଶ୍ରୀଲଙ୍କା କ୍ରିକେଟ ବୋର୍ଡ (ଏସ୍ଏଲ୍ସି) ତରଫରୁ କୁହାଯାଇଛି। କଲମ୍ବୋ କ୍ରିକେଟ କ୍ଲବ୍ରେ ଆଗଧାଡିର ଏହି ୧୩ଜଣ କ୍ରିକେଟର ରେସିଡେନ୍ସିଆଲ ଟ୍ରେନିଂ କ୍ୟାମ୍ପରେ ଅଭ୍ୟାସ ଆରମ୍ଭ କରିବେ ବୋଲି ଏସ୍ଏଲ୍ସି କହିଛି। ୩ଟି ଟାକ ଫର୍ମାଟକୁ ଦୃଷ୍ଟିରେ ରଖି ଟ୍ରେନିଂ ପାଇଁ ଏହି ଖେଳାଳିମାନଙ୍କୁ ଚୟନ କରାଯାଇଛି। ଏମାନଙ୍କ ମଧ୍ୟରେ ଅଧିକାଂଶ ବୋଲର ରହିଛନ୍ତି। କାରଣ ମ୍ୟାଚ୍ରେ ଭାଗ ନେବା ପୂର୍ବରୁ ବୋଲରମାନେ ଫିଟ୍ ହେବା ପାଇଁ ଓ ଫର୍ମକୁ ଫେରିବା ପାଇଁ ଅଧିକ ସମୟ ନେଇଥାନ୍ତି ବୋଲି ବୋର୍ଡ ତରଫରୁ କୁହାଯାଇଛି।
୪ଜଣ ସଦସ୍ୟଙ୍କୁ ନେଇ କୋଚିଂ ଷ୍ଟାଫ୍ ଏହି ଟ୍ରେନିଂ କ୍ୟାମ୍ପର ତଦାରଖ କରିବେ। କୋଭିଡ୍-୧୯ ପାଇଁ ସରକାରଙ୍କ ତରଫରୁ ଜାରି କରାଯାଇଥିବା ନିର୍ଦ୍ଦେଶନାମାକୁ ମାନିବା ପାଇଁ ଖେଳାଳିମାନଙ୍କୁ କୁହାଯାଇଛି। ପୂର୍ବରୁ ଇଂଲଣ୍ଡ କ୍ରିକେଟରମାନେ ପ୍ରଥମେ ଟ୍ରେନିଂ ପାଇଁ ପଡିଆକୁ ଓହ୍ଲାଇଥିଲେ। ଆଗକୁ କେତୋଟି ସିରିଜ ଆୟୋଜନ ହେବାର କାର୍ଯ୍ୟକ୍ରମ ଥିବାରୁ ଖେଳାଳିଙ୍କ ଟ୍ରେନିଂକୁ ଏସ୍ଏଲ୍ସି ଗୁରୁତ୍ୱ ଦେଉଛି।