Categories: ବାଣିଜ୍ୟ

ଆଜିଠାରୁ ବଦଳିଯିବ ଏସବୁ ନିୟମ

ନୂଆଦିଲ୍ଲୀ,୧-୧୦: ଅକ୍ଟୋବର ୧ଠାରୁ ସରକାର କିଛି ପରିବର୍ତ୍ତିତ ଆର୍ଥତ୍କ ନିୟମ ଲାଗୁ କରିବେ। ଖାଉଟିଙ୍କ ଉପରେ ଏହାର କି ପ୍ରଭାବ ରହିବ ତାହା ବିଚାର କରିବାକୁ ହେବ। ଏସ୍‌ବିଆଇ ପକ୍ଷରୁ ଏହାର କେଉଁ ନିୟମ ବଦଳିବ, କର୍ପୋରେଟ ଟିକସ ପରିବର୍ତ୍ତନ ଯୋଗୁ କଣ ଫାଇଦା ହେବ, ଜିଏସ୍‌ଟିରେ କଣ ରହିଛି ଭଳି ପ୍ରସଙ୍ଗକୁ ଦେଖିବାକୁ ହେବ। କେଉଁ ସବୁ ନିୟମ ପରିବର୍ତ୍ତନ ହେଉଛି ତାହା ଏଠାରେ ଦିଆଗଲା..
– ଏସ୍‌ବିଆଇ
ଏସ୍‌ବିଆଇ ଇଣ୍ଟରନେଟ ଏବଂ ମୋବାଇଲ ବ୍ୟାଙ୍କିଙ୍ଗ ନେଣଦେଣ ଉପରେ ମାସିକ ସୀମାକୁ ହଟାଇ ଦେଇଛି। ଖାତାରେ ୨୫ ହଜାର ମାସିକ ହାରାହାରି ବାଲାନ୍ସ ରଖୁଥିବା ଗ୍ରାହକମାନେ ବ୍ୟାଙ୍କ ଶାଖାରୁ ୨ଥର ଦେୟମୁକ୍ତ ଉଠାଣ କରିପାରିବେ। ସେହିଭଳି ମାସିକ ହାରାହାରି ୨୫ରୁ ୫୦ ହଜାର ବାଲାନ୍ସ ରଖିଥିବା ଗ୍ରାହକ ୧୦ ଥର ଦେୟମୁକ୍ତ ଉଠାଣ କରିବାକୁ ସକ୍ଷମ ହେବେ। ୫୦ ହଜାରରୁ ୧ ଲକ୍ଷ ଟଙ୍କା ପର୍ଯ୍ୟନ୍ତ ବାଲାନ୍ସ ଥିଲେ ଗ୍ରାହକ ଅସୀମିତ ଉଠାଣ କରିପାରିବେ।
– ପେଟ୍ରୋଲ ପମ୍ପରେ ଏସ୍‌ବିଆଇ କ୍ରେଡିଟ କାର୍ଡରେ ମିଳିବନି କ୍ୟାଶବ୍ୟାକ
ପେଟ୍ରୋଲ ପମ୍ପରେ ଏସ୍‌ବିଆଇ କ୍ରେଡିଟ କାର୍ଡରେ ପେମେଣ୍ଟ ଉପରେ ୦.୭୫% ରିହାତି ଅକ୍ଟୋବର ପହିଲାରୁ ଆଉ ମିଳିବନି। ଡିଜିଟାଲ ନେଣଦେଣକୁ ପ୍ରୋତ୍ସାହିତ କରିବା ଲାଗି ସରକାର ଏଭଳି ପଦକ୍ଷେପ ନେଇଥିଲେ। ଅନ୍ୟ ବ୍ୟାଙ୍କଗୁଡିକ ମଧ୍ୟ ଏଭଳି ସୁବିଧା ଦେଉଥିଲେ। ଏସ୍‌ବିଆଇର ଏଭଳି ନିଷ୍ପତ୍ତି ପରେ ଅନ୍ୟ କମ୍ପାନୀ ମଧ୍ୟ ଏନେଇ ବିଚାର କରିବାର ସମ୍ଭାବନା ରହିଛି।
– ପେନଶନ ପଲିସି ନିୟମ
୧୦ ବର୍ଷ ସର୍ଭିସ ପୂରା କରିବା ପୂର୍ବରୁ ଯଦି କୌଣସି ସରକାରୀ କର୍ମଚାରୀଙ୍କ ମୃତ୍ୟୁ ୨୦୧୯ ଅକ୍ଟୋବର ପହିଲା ପୂର୍ବରୁ ହୋଇଥାଏ, ସେ ଲଗାତର ଭାବେ ୭ ବର୍ଷ ସେବା ଦେଇଥାନ୍ତି ତେବେ ତାଙ୍କ ପରିଜନଙ୍କୁ ଉପନିୟମ (୩) ଅନୁସାରେ ପେନଶନ ଲାଗୁ ହେବ।
– କର୍ପୋରେଟ ଟିକସ ହ୍ରାସ ସୁବିଧା
କର୍ପୋରେଟ ଟିକସ ହ୍ରାସର ଫାଇଦା ଉପଲବ୍ଧ ହେବ। ଅକ୍ଟୋବର ପହିଲା ପରଠାରୁ ସ୍ଥାପନ ହୋଇଥିବା ମାନୁଫାକଚରିଂ ୟୁନିଟ ଗୁଡିକ ଲାଗି ୧୫% ଟିକସ ପ୍ରଦାନର ବିକଳ୍ପ ରହିବ। ଏହି କମ୍ପାନୀଗୁଡିକ ଉପରେ ସରଚାର୍ଜ ସହ ମୋଟ ଟିକସ ହାର ୧୭.୦୧% ରହିବ।
-ଶସ୍ତା ହେବ ହୋଟେଲ ରୁମ୍‌
– ୧୦୦୦ ଟଙ୍କାର ରୁମ ଭଡା ଲାଗି ସରକାର ଜିଏସ୍‌ଟିକୁ ବାଦ ଦେଇଛନ୍ତି। ୧୦୦୧ରୁ ୭୫୦୦ ପର୍ଯ୍ୟନ୍ତ ହୋଟେଲ ରୁମ ଉପରେ ୧୮% ପରିବର୍ତ୍ତେ ୧୨% ଜିଏସ୍‌ଟି ଲାଗୁ ହେବ। ୭,୫୦୦ ଟଙ୍କାରୁ ଉର୍ଦ୍ଧ୍ୱ ହୋଟେଲରୁମ ଉପରେ ୨୮% ବଦଳରେ ୧୮% ଜିଏସ୍‌ଟି ଲାଗିବ। ୧ ଅକ୍ଟୋବର ପରର ବୁକିଂ ଲାଗି ଏହା ମିଳିବ। ସେହିଭଳି ରେଳଗାଡି ଡବା ଉପରେ ଜିଏଟି ବଢାଯିବା ସହ ୫ରୁ ୧୨% ହୋଇଛି। ମୃଦୁ ପାନୀୟ କ୍ଷେତ୍ରରେ ଏହା ୧୮ରୁ ୨୮%କୁ ବଢିଛି।
– ଜିଏସ୍‌ଟି ଫର୍ମରେ ପରିବର୍ତ୍ତନ
ବାର୍ଷିକ ୫ କୋଟି ଟଙ୍କାରୁ ଉର୍ଦ୍ଧ୍ୱ କାରବାର କରୁଥିବା ସଂସ୍ଥାଗୁଡିକ ଲାଗି ଅକ୍ଟୋବର ପହିଲାରୁ ନୂଆ ଜିଏସ୍‌ଟି ରିଟର୍ନ ଫର୍ମ ଆସିବ। ଏମାନେ ଜିଏସ୍‌ଟିଆର୍‌-୧ ବଦଳରେ ଜିଏସ୍‌ଟି ଏଏନ୍‌ଏକ୍ସ-୧ ଫର୍ମ ଭରିବାକୁ ହେବ।

Share