ଭୁବନେଶ୍ୱର,୨୮।୧(ବ୍ୟୁରୋ): ରାଜ୍ୟରେ ସରକାରୀ କର୍ମଚାରୀଙ୍କ ପଦୋନ୍ନତି ବ୍ୟବସ୍ଥାରେ ସ୍ବଚ୍ଛତା ଏବଂ ସମୟାନୁବର୍ତ୍ତିତା ଆଣିବା ପାଇଁ ସମସ୍ତ ପଦକ୍ଷେପ ନିଆଯାଇଛି। ଗତବର୍ଷ ଡିସେମ୍ବର ଶେଷସୁଦ୍ଧା ଉଭୟ ବରିଷ୍ଠ ଏବଂ କନିଷ୍ଠ ପ୍ରଶାସନରେ ପଦୋନ୍ନତି କରାଯାଇଥିଲା। ଏପରିକି କିଛିଦିନ ତଳେ ପଦୋନ୍ନତି ପାଇଁ ସ୍ବତନ୍ତ୍ର ଅଦାଲତର ମଧ୍ୟ ଘୋଷଣା କରାଯାଇଛି। କୌଣସି ଯୋଗ୍ୟ କର୍ମଚାରୀ ଯେପରି ଠିକ୍ ସମୟରେ ପଦୋନ୍ନତିରୁ ବଞ୍ଚିତ ନ ହୁଅନ୍ତି, ସେଥିଲାଗି ସରକାର ଗୁରୁତ୍ୱ ଦେଇ ଏହି ବ୍ୟବସ୍ଥା କରିବାକୁ ଯାଉଛନ୍ତି। ମଙ୍ଗଳବାର, ବୁଧବାର ଏବଂ ଶୁକ୍ରବାର ପ୍ରଥମ ପର୍ଯ୍ୟାୟ ପଦୋନ୍ନତି ଅଦାଲତ ବସିବା ପାଇଁ ସ୍ଥିର ହୋଇଛି। ପ୍ରମୁଖ ଶାସନ ସଚିବ ସଞ୍ଜୀବ ଚୋପ୍ରାଙ୍କ ଅଧ୍ୟକ୍ଷତାରେ ରବିବାର ସାରେ ବିଭାଗୀୟ ଅଧିକାରୀମାନଙ୍କୁ ନେଇ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଥିଲା। ବୈଠକ ଶେଷରେ ଚୋପ୍ରା କହିଛନ୍ତି ଯେ, ଗତ ଡିସେମ୍ବର ୩୧ ସୁଦ୍ଧା ପଦୋନ୍ନତି ପାଇବା ପାଇଁ ଯୋଗ୍ୟଥିବା ମାତ୍ର ଏଥିରୁ ବଞ୍ଚିତ ରହିଯାଇଥିବା କର୍ମଚାରୀଙ୍କ ଲାଗି ମଙ୍ଗଳବାର ଠାରୁ ଅଦାଲତ ବସିବ। ଏଥିଲାଗି ଆସିଥିବା ତାଲିକା http://www.gaodisha.gov.in/node/2087ରେ ଅପଲୋଡ୍ କରାଯାଇଥିବା ସେ କହିଛନ୍ତି। ୩ଦିନ ପର୍ଯ୍ୟନ୍ତ ପେନ୍ସନ ଅଦାଲତ ମୁଖ୍ୟମନ୍ତ୍ରୀ ଅଭିଯୋଗ ପ୍ରକୋଷ୍ଠ, ଗୋପବନ୍ଧୁ ଏକାଡେମୀ, କୃଷିଭବନ, କଳିଙ୍ଗ ଷ୍ଟାଡିୟମ, ରାଜ୍ୟ ଗ୍ରାମ୍ୟ ଉନ୍ନୟନ ପ୍ରତିଷ୍ଠାନ ଏବଂ ଇଡ୍କୋ କନ୍ଫରେନ୍ସ ହଲ୍ ଆଦି ୬ଟି ସ୍ଥାନରେ ଅନୁଷ୍ଠିତ ହେବ। ଏ ସମସ୍ତ ଅଦାଲତ ମୁଖ୍ୟ ଶାସନ ସଚିବ ଏବଂ ଅତିରିକ୍ତ ଶାସନ ସଚିବସ୍ତରୀୟ ଅଧିକାରୀମାନଙ୍କ ଅଧ୍ୟକ୍ଷତାରେ ଅନୁଷ୍ଠିତ ହେବ ବୋଲି ଚୋପ୍ରା କହିଛନ୍ତି।