ପୁରୁଣା ଭୁବନେଶ୍ୱର, ୭ା୩ (ଡି.ଏନ.ଏ.): ମହାପ୍ରଭୁ ଶ୍ରୀଲିଙ୍ଗରାଜଙ୍କ ବାହାର ଫଗୁ ଖେଳ ଶୁକ୍ରବାରଠାରୁ ଆରମ୍ଭ ହୋଇଛି। ଏହି ଅବସରରେ ନଗର ପରିକ୍ରମାରେ ଶ୍ରୀ ଜୀଉମାନେ ଯାତ୍ରା ଆରମ୍ଭ କରିଛନ୍ତି। ସନ୍ଧ୍ୟାଧୂପ ସରିବା ପରେ ଠାକୁରଙ୍କ ବଡ଼ସିଂହାର ଓ ବେଶ ହୋଇଥିଲା। ପରେ ଯାତ୍ରା ପୂଜା କରାଯାଇଥିଲା ।
ଶ୍ରୀଲିଙ୍ଗରାଜ, ମା’ପାର୍ବତୀ, ମା’ ରୁଙ୍କୁଣା ଦେବୀ ଏବଂ ପ୍ରଭୁ ବାସୁଦେବ ସୁସଜ୍ଜିତ ବିମାନ ଓ ପାଲିଙ୍କିରେ ବିଜେ କରିଥିଲେ। ଘଣ୍ଟ ଘଣ୍ଟା ମଶାଲ, ଛତ୍ରୀ, ତ୍ରାସର ଶୋଭାଯାତ୍ରାରେ ଶ୍ରୀଜୀଉମାନେ ବଢେଇବାଙ୍କସ୍ଥିତ ଭାରତୀ ମଠରେ ପହଞ୍ଚତ୍ଥିଲେ। ଶ୍ରୀଲିଙ୍ଗରାଜଙ୍କ ଭଉଣୀ ମା’ କାମାକ୍ଷୀଦେବୀଙ୍କ ନିକଟରେ ସିଂହାସନରେ ଉପବିଷ୍ଟ ହୋଇଥିଲେ। ପଞ୍ଚ ଉପଚାର ପୂଜା କରାଯାଇ ଶ୍ରୀଜୀଉଙ୍କୁ ଫଗୁଲାଗି ହୋଇଥିଲା। ପରେ ଠାକୁରାଣୀଙ୍କ ନିକଟରେ ଭେଟ ଆଳତି ହୋଇଥିଲା। ସେଠାରୁ ସ୍ବମନ୍ଦିର ପ୍ରତ୍ୟାବର୍ତ୍ତନ ବାଟରେ ବଢେଇବାଙ୍କ ଛକରେ ଚାଚେରୀ ଭୋଗ ହୋଇଥିଲା। ପରେ ମନ୍ଦିରରେ ବଡ଼ସିଂହାର ଭୋଗ କରାଯାଇ ପଞ୍ଚବକ୍ର ଆଳତି କରାଯାଇ ପହଡ଼ ପଡ଼ିଥିଲା। ସୂଚନାଥାଉ କି ଗୁରୁବାର ଠାକୁରଙ୍କ ମନ୍ଦିର ଭିତରେ ଭିତର ଫଗୁ ସମ୍ପୂର୍ଣ୍ଣ ହୋଇଥିଲା। ପାଲିଙ୍କିରେ ଶ୍ରୀଜୀଉମାନେ ବେଢା ପରିକ୍ରମା କରି ନାଭିକଟା ମଣ୍ଡପରେ ଖଟୁଲିରେ ବସିଥିଲେ। ସେଠାରେ ପଞ୍ଚ ଉପଚାର ପୂଜା ହୋଇ ଫଗୁ ଲାଗି ହୋଇଥିଲା।
