ଢେଙ୍କାନାଳ ଅଫିସ, ୭।୨ – ମହିମାଧର୍ମର ପ୍ରମୁଖ ପୀଠସ୍ଥଳୀ ଯୋରନ୍ଦା ମହିମାଗାଦିରେ ଶୁକ୍ରବାରଠାରୁ ଆରମ୍ଭ ହେଉଛି ବିଶ୍ୱପ୍ରସିଦ୍ଧ ମାଘମେଳା। ୩ଦିନ ଧରି ଆୟୋଜିତ ହେବାକୁ ଥିବା ଏହି ମେଳା ପାଇଁ ଉତ୍ସବମୁଖର ହୋଇଉଠିଛି ମହିମାଗାଦି। ମେଳା ଅବ୍ୟବହିତ ପୂର୍ବରୁ ଯୋରନ୍ଦାକୁ ଛୁଟିଛନ୍ତି ସାଧୁସନ୍ଥ, ଶ୍ରଦ୍ଧାଳୁ।
ଚଳିତବର୍ଷ ମେଳାରେ ସୁରକ୍ଷାକୁ ବିଶେଷ ପ୍ରାଧାନ୍ୟ ଦିଆଯାଇଛି। ଏସ୍ପିଙ୍କ ନେତୃତ୍ୱରେ ମୋଟ ୮ ପ୍ଲାଟୁନ୍ ସଶସ୍ତ୍ର ପୋଲିସ ସୁରକ୍ଷା ଦାୟିତ୍ୱରେ ମୁତୟନ ହୋଇଛନ୍ତି। ସେମାନଙ୍କ ମଧ୍ୟରେ ଅଛନ୍ତି ଜଣେ ଅତିରିକ୍ତ ଏସ୍ପି, ୪ ଡିଏସ୍ପି, ୯ ଇନ୍ସପେକ୍ଟର, ୪୯ ଏସ୍ଆଇ ଏବଂ ଏଏସ୍ଆଇ, ୧୩୨ ହୋମଗାର୍ଡ, ୧୦ ହାବିଲଦାର, ୬ ଟ୍ରାଫିକ୍ ପୋଲିସ। ଗୁରୁବାର ଅପରାହ୍ନରେ ଏସ୍ପି ଅନୁପମା ଜେମ୍ସ ଯୋରନ୍ଦା ଫାଣ୍ଡି ପରିସରରେ ପୋଲିସ ଅଧିକାରୀ ଏବଂ କର୍ମଚାରୀଙ୍କୁ ଦାୟିତ୍ୱ ବଣ୍ଟନ କରିଛନ୍ତି। ଏଥିସହ ଯେ କୌଣସି ସମସ୍ତ ପ୍ରକାର ଆଇନଶୃଙ୍ଖଳାର ପରିସ୍ଥିତି ଏଡ଼ାଇବା ଲାଗି ସତର୍କ ରହିବାକୁ ପରାମର୍ଶ ଦେଇଛନ୍ତି। ସେହିପରି ଟ୍ରାଫିକ୍ ନିୟନ୍ତ୍ରଣ, ଯାନବାହନ ପାର୍କିଂ ଉପରେ ଗୁରୁତ୍ୱ ଦିଆଯାଇଛି। ମେଳା ପରିସରରେ ଆପରାଧିକ କାର୍ଯ୍ୟକଳାପ ରୋକିବାକୁ ସିସିଟିଭି ବ୍ୟବସ୍ଥା, ସନ୍ଧାନୀ କୁକୁର ମୁତୟନ ସହ ସ୍ବତନ୍ତ୍ର ସ୍କ୍ବାଡ୍ ଗଠିତ ହୋଇଛି। ସନ୍ଧ୍ୟାରେ ଜିଲାପାଳ ଭୂମେଶ ଚନ୍ଦ୍ର ବେହେରା, ଉପଜିଲାପାଳ ସାଫଲ୍ୟ ମଣ୍ଡିତ ପ୍ରଧାନ ପ୍ରମୁଖ ମେଳା ପରିସରରେ ସୁରକ୍ଷା ଏବଂ ଯାତ୍ରୀଙ୍କ ରହିବା ବ୍ୟବସ୍ଥାର ତଦାରଖ କରିଛନ୍ତି। ଯୋରନ୍ଦା ସରପଞ୍ଚ ପ୍ରଶାନ୍ତ ରାଉତ ଉପସ୍ଥିତ ଥିଲେ।
ଶୁକ୍ରବାର ଭୋର ୩ଟାରୁ ନୀତିକାନ୍ତି ଆରମ୍ଭ ହେବ। ଅପରାହ୍ନ ୫ଟା ୧୫ରେ ଝାଡ଼ଦୀପ ପ୍ରଜ୍ୱଳନ କରାଯାଇ ବିଶ୍ୱକଲ୍ୟାଣ ଉଦ୍ଦେଶ୍ୟରେ ପ୍ରାର୍ଥନା କରାଯିବ। ଏଥିପାଇଁ ମଠ, ମନ୍ଦିରରେ ସମସ୍ତ ପ୍ରସ୍ତୁତି ଶେଷ ହୋଇଛି। ଅପରପକ୍ଷେ ଗୁରୁବାରଠାରୁ ହଜାର ହଜାର ଉଠାଦୋକାନୀ ପସରା ମେଲାଇ ବ୍ୟବସାୟ ଆରମ୍ଭ କରିସାରିଲେଣି। ପାଗ ଅନୁକୂଳ ହେଲେ ଭଲ ଦି ପଇସା ମିଳିବ ବୋଲି ସେମାନେ ଆଶାବାନ୍ଧି ଅଛନ୍ତି।