ନୂଆଦିଲ୍ଲୀ/ଇସ୍ଲାମାବାଦ୍, ୨।୮(ଆଇଏଏନ୍ଏସ୍):ପାକିସ୍ତାନୀ ଜେଲ୍ରେ ବନ୍ଦୀ ଥିବା ଭାରତୀୟ ନାଗରିକ କୁଳଭୂଷଣ ଯାଦବଙ୍କୁ ଦୂତାବାସ ସହାୟତା ଯୋଗାଇଦେବାକୁ ପାକିସ୍ତାନ ରାଜି ହୋଇଛି। ତାଙ୍କୁ ଏହି ସହାୟତା ଦେବାକୁ ଅନ୍ତର୍ଜାତୀୟ ନ୍ୟାୟିକ ଅଦାଲତ ନିର୍ଦ୍ଦେଶ ଦେବାର ୧୫ ଦିନ ପରେ ପାକିସ୍ତାନ ଏପରି ନିଷ୍ପତ୍ତି ନେଇଥିବା ବିଷୟ ଭାରତକୁ ଅବଗତ କରାଇଛି। ପାକିସ୍ତାନ ଏଭଳି ପ୍ରସ୍ତାବ ଦେଇଥିବା ଭାରତ ଗୁରୁବାର ସୁନିଶ୍ଚିତ କରାଇଛି। ଏ ସଂକ୍ରାନ୍ତରେ କୂଟନୈତିକ ସ୍ତରରେ ଇସଲାମାବାଦ ସହ ଯୋଗାଯୋଗ କରାଯିବ ବୋଲି ଭାରତ କହିଛି।
କୁଳଭୂଷଣଙ୍କୁ ଦୂତାବାସ ସହାୟତା ଯୋଗାଇଦେବାକୁ ପାକିସ୍ତାନ କିଛି ସର୍ତ୍ତ ରଖିଛି। ଯାଦବ ଓ ଭାରତୀୟ ଅଫିସରଙ୍କ ମଧ୍ୟରେ କଥାବାର୍ତ୍ତା ବେଳେ ପାକିସ୍ତାନର ଜଣେ ଅଫିସର ଉପସ୍ଥିତ ରହିବେ ବୋଲି ସର୍ତ୍ତ ରଖାଯାଇଥିବାବେଳେ ଆଇସିଜେଙ୍କ ରାୟ ପରିପ୍ରେକ୍ଷୀରେ ପାକିସ୍ତାନର ପ୍ରସ୍ତାବକୁ ଭାରତ ପରୀକ୍ଷା ନିରୀକ୍ଷା କରି ଦେଖୁଛି ବୋଲି ବୈଦେଶିକ ବ୍ୟାପାର ମନ୍ତ୍ରଣାଳୟ ମୁଖପାତ୍ର ରବୀଶ କୁମାର ନୂଆଦିଲ୍ଲୀଠାରେ ଗଣମାଧ୍ୟମକୁ ସୂଚନା ଦେଇଛନ୍ତି। ପାକିସ୍ତାନ ବୈଦେଶିକ ଦପ୍ତର ମୁଖପାତ୍ର ମହମ୍ମଦ ଫୈଜାଲ ଖବରଦାତାଙ୍କ ଏକ ପ୍ରଶ୍ନର ଉତ୍ତର ଦେବାକୁ ଯାଇ କହିଛନ୍ତି, ଶୁକ୍ରବାର ଦୂତାବାସ ସହାୟତା ପାଇଁ ଭାରତୀୟ ହାଇକମିଶନରଙ୍କୁ ଅବଗତ କରାଯାଇଛି। ତେବେ ଏ ଦିଗରେ ଭାରତର ଉତ୍ତରକୁ ଅପେକ୍ଷା କରାଯାଇଛି। ଭାରତୀୟ ନାଗରିକ କୁଳଭୂଷଣ ଯାଦବଙ୍କୁ ପାକିସ୍ତାନ ଇରାନ୍ରୁ ଧରିଆଣି ଭାରତ ପାଇଁ ଗୁପ୍ତଚର ବୃତ୍ତି କରୁଥିବା ଅଭିଯୋଗରେ ସାମରିକ ଜେଲ୍ରେ ବନ୍ଦୀ କରି ରଖିଛି। ଭିଏନା ଚୁକ୍ତି ଅନୁଯାୟୀ ଯାଦବଙ୍କୁ ଦୂତାବାସ ସହାୟତା ଯୋଗାଇ ଦିଆଯିବାର ଥିଲେ ହେଁ ପାକିସ୍ତାନ ଏହାକୁ ବାରମ୍ବାର ପ୍ରତ୍ୟାଖ୍ୟାନ କରିଆସୁଥିଲା।