ତାଳଚେର, ୧୧ା୧୧ (ନି.ପ୍ର.):ପୂର୍ବ ନିଷ୍ପତ୍ତି ମୁତାବକ ଅନୁଗୋଳ ଜିଲା ତାଳଚେର ଓକିଲ ସଂଘ ପକ୍ଷରୁ ୧୧ ତାରିଖରେ ୧୨ ଘଣ୍ଟିଆ ତାଳଚେର ଓ ପାଲଲହଡ଼ା ବନ୍ଦ ଆନ୍ଦୋଳନ କରାଯିବ। ଗୁରୁବାର ଓକିଲ ସଂଘ ସଭାପତି ସନ୍ତୋଷ କୁମାର ସାହୁ ଏହି ସୂଚନା ଦେଇଛନ୍ତି। ସାହୁ କହିଛନ୍ତି, ଗତ ୨୬ ତାରିଖରେ ତାଳଚେର ସିଏଏସ୍ଆଇ ଓକିଲମାନଙ୍କ ନାମରେ କରିଥିବା ମିଥ୍ୟା ମକଦ୍ଦମା ପ୍ରତ୍ୟାହାର ଓ ସମ୍ପୃକ୍ତ ସିଏଏସ୍ଆଇଙ୍କୁ ନିଲମ୍ବିତ କରାଯିବା ସହ ଅନ୍ୟ କର୍ମଚାରୀଙ୍କ ବଦଳି ଦାବି କରି ସଂଘ ପକ୍ଷରୁ ୧୪ ଦିନ ହେଲା କାର୍ଯ୍ୟ ବନ୍ଦ ଆନ୍ଦୋଳନ ଚାଲିଛି। ଓକିଲ ସଂଘର ଦାବିଗୁଡ଼ିକ ପ୍ରତି ବିଚାର କରିବାକୁ ସା ୭ଟା ପର୍ଯ୍ୟନ୍ତ ଜିଲା ପ୍ରଶାସନକୁ ସମୟ ଦିଆଯାଇଥିଲା। ହେଲେ କିଛି ପଦକ୍ଷେପ ନିଆ ନ ଯିବାରୁ ପୂର୍ବ ନିଷ୍ପତ୍ତି ଅନୁଯାୟୀ ୧୧ ତାରିଖ ସକାଳ ୬ ଘଟିକାଠାରୁ ସନ୍ଧ୍ୟା ୬ ଘଟିକା ପର୍ଯ୍ୟନ୍ତ ତାଳଚେର ଓ ପାଲଲହଡ଼ାରେ ବନ୍ଦ ପାଳନ କରାଯିବାକୁ ସ୍ଥିର କରାଯାଇଛି। ଏହି ବନ୍ଦ ପାଳନ ବେଳେ ଏମ୍ସିଏଲ୍ର ସମସ୍ତ କୋଇଲା ଖଣି, ଟ୍ରକ୍ ଓ ରେଳ ଯୋଗେ କୋଇଲା ପରିବହନ, ସମସ୍ତ ଯାତ୍ରୀବାହୀ ଗାଡି, ଦୋକାନ ବଜାର, ସ୍କୁଲ୍ କଲେଜ ଓ ଅନ୍ୟାନ୍ୟ ଶିକ୍ଷାନୁଷ୍ଠାନ, ସରକାରୀ, ବେସରକାରୀ କାର୍ଯ୍ୟାଳୟ, ସମସ୍ତ ବ୍ୟାଙ୍କ ବନ୍ଦ କରାଯିବ। ଏହି ବନ୍ଦକୁ ବିଭିନ୍ନ ରାଜନୈତିକ ଦଳର ନେତୃବୃନ୍ଦ, ସାମାଜିକ ଅନୁଷ୍ଠାନ ନୈତିକ ସମର୍ଥନ ଦେଇଥିବା ସଂଘ ପକ୍ଷରୁ କୁହାଯାଇଛି।
