ଅନୁଗୋଳ ଅଫିସ, ୧୩ା୧୦ – ଧରାବତରଣ କରିବେ ମା ଲକ୍ଷ୍ମୀ। ଏ ନେଇ ଅନୁଗୋଳ ସହର ସଜେଇ ହୋଇଛି। ରବିବାରଠାରୁ ମା’ଙ୍କ ପୂଜା ଆରମ୍ଭ ହେବ। ମା’ଙ୍କ ଆଗମନ ପାଇଁ ସହରରେ ବିଭିନ୍ନ ପୂଜା କମିଟି ପକ୍ଷରୁ ବ୍ୟାପକ ପ୍ରସ୍ତୁତି ହୋଇଛି। ମୋଟ ୨୯ ପୂଜା ମଣ୍ଡପ ନିର୍ମାଣ କରାଯାଇଥିବାବେଳେ କେବଳ ଚକ୍ଷୁଦାନକୁ ଅପେକ୍ଷା କରିଛନ୍ତି ସହରବାସୀ।
ପୂଜା ପାଇଁ ଆୟୋଜକଙ୍କ ଠାରୁ ଆରମ୍ଭ କରି ସହରବାସୀଙ୍କ ପର୍ଯ୍ୟନ୍ତ ନାହିଁ ନ ଥିବା ଉତ୍ସାହ ଦେଖିବାକୁ ମିଳୁଛି। ଆଲୋକମାଳାରେ ନବବଧୂ ଭଳି ସହର ସଜେଇ ହୋଇଛି। ରଙ୍ଗ ବେରଙ୍ଗର ଆଲୋକମାଳା ସାଙ୍ଗକୁ ଏଲ୍ଇଡ଼ି ଲାଇଟ୍ ଗେଟ ଗୁଡ଼ିକ ସହରର ସୌନ୍ଦର୍ଯ୍ୟକୁ ଦୁଇ ଗୁଣିତ କରିଛି। ରବିବାର ସନ୍ଧ୍ୟାରେ ବିଭିନ୍ନ ମଣ୍ଡପର କଳସ ଶୋଭାଯାତ୍ରା କରାଯାଇ ପୂଜାର୍ଚ୍ଚନା କରିବା ପରେ କଳସ ସ୍ଥାପନ କରାଯିବ। ରାତିରେ ମା’ଙ୍କର କପର୍ଦକ ପୂଜା ସହ ଷୋଡ଼ଶ ଉପଚାରରେ ପୂଜାର୍ଚ୍ଚନା କରାଯିବ। ସହରର ସବୁଠାରୁ ପୁରାତନ ମଣ୍ଡପ ମଧ୍ୟରେ ଲକ୍ଷ୍ମୀ ବଜାର, ବଜାର ଛକ, ବସ୍ଷ୍ଟାଣ୍ଡ, କାଞ୍ଚନ ଟକିଜ୍ ବଜାର, ଅମଲାପଡ଼ା ଜୟଦୁର୍ଗା ପୂଜା କମିଟି, ହୁଲୁରୁସିଂହା, ହରିମହୁରୀ ଛକ, କଲେଜ ଛକ ପ୍ରଭୃତି ମଣ୍ଡପ ସହ କରଡ଼ାଗାଡ଼ିଆ, କଳିଙ୍ଗ ମାର୍କେଟ, ଶାନ୍ତି ବଜାର, ସୂଚନା କେନ୍ଦ୍ର, ମା’ ବୁଢ଼ୀ ବଜାର, ଡେଲି ମାର୍କେଟ, ସଞ୍ଜିବନୀ ମାର୍କେଟ, ରାଜ୍ ହୋଟେଲ ଛକ, ଏନ୍ଏଚ୍ ଅଫିସ ଛକ, ହନୁମାନ ବଜାର, ତାମ୍ରିତ କଲୋନୀ, ଆଶ୍ରମ ଛକ, ଡିଆଇସି ଛକ, ଶିକ୍ଷକପଡ଼ା, ନନ୍ ଭେଜ ମାର୍କେଟ, କମଳା ଫାର୍ମ ଛକ, ହାତୀଶାଲ ପଡ଼ା, ପଞ୍ଚମୁଖୀ ମାର୍କେଟ, ଜଗନ୍ନାଥ ମାର୍କେଟ କମ୍ପ୍ଲେକ୍ସ, ପ୍ରଗତିନଗର ଆଦି ସ୍ଥାନରେ ଏଥର ମା ଲକ୍ଷ୍ମୀଙ୍କ ପୂଜା ଧୁମ୍ଧାମରେ ପାଳନ କରାଯାଉଛି। ସେହିପରି ସହରକୁ ପୂଜା ଦେଖିବାକୁ ଆସୁଥିବା ଲୋକଙ୍କୁ ଆକୃଷ୍ଟ କରିବାକୁ ଦଶହରା ପଡ଼ିଆରେ ମିନା ବଜାର ଖୋଲାଯାଇଛି। ପୂଜାକୁ ଶାନ୍ତି ଶୃଙ୍ଖଳା ସହ ଶେଷ କରିବା ପାଇଁ ସେଣ୍ଟ୍ରାଲ ପୂଜା କମିଟି ପକ୍ଷରୁ ସହରବାସୀଙ୍କୁ ନିବେଦନ କରାଯାଇଛି। ସହରସାରା ପୋଲିସ ମୁତୟନ କରାଯାଇଛି। ଅନ୍ୟପକ୍ଷରେ ଶାନ୍ତି ଶୃଙ୍ଖଳା ରକ୍ଷା କରିବା ସହ ଛିନତାଇ, ପକେଟମାର, ମଦ୍ୟପଙ୍କ ଉପରେ ସାଦା ପୋଷାକଧାରୀ ପୋଲିସ ନଜର ରଖିଥିବା ଜଣାପଡ଼ିଛି।