ବଅଁରପାଳ,୨୩।୯(ଡି.ଏନ.ଏ.) ଅନୁଗୋଳ ଜିଲା ନାଲ୍କୋ ନଗରରେ ଚାଲିଥିବା ପ୍ରସିଦ୍ଧ ବିଶ୍ୱକର୍ମା ପୂଜାର ରବିବାର ଥିଲା ଶେଷ ସନ୍ଧ୍ୟା। ଛୁଟି ଦିନରେ ପୂଜା ଦେଖିବା ପାଇଁ ଆଖପାଖ ଅଞ୍ଚଳରୁ ବହୁ ଲୋକଙ୍କ ଭିଡ଼ ଜମିଥିଲା। ବିଶେଷ କରି ପଲିଶ୍ରୀ ମେଳା, ମୀନା ବଜାର ଓ ଦୋଳି ଅଞ୍ଚଳରେ ମଧ୍ୟ ନାହିଁ ନ ଥିବା ଭିଡ଼ ପରିଲିକ୍ଷିତ ହୋଇଥିଲା। ଚଳିତ ବର୍ଷ ବିଭିନ୍ନ ପୂଜା କମିଟି ପକ୍ଷରୁ ଅକର୍ଷଣୀୟ ପୂଜା ମଣ୍ଡପ ଓ ତୋରଣ ନିର୍ମିତ ହୋଇଛି। ପୂଜା ମଣ୍ଡପର ସାଜସଜ୍ଜା ଦର୍ଶକମାନଙ୍କୁ ଆକୃଷ୍ଟ କରିଛି। ଶେଷ ଦିନରେ ପ୍ରତ୍ୟେକ ପୂଜା ମଣ୍ଡପରେ ପ୍ରସାଦସେବନ ସାଙ୍ଗକୁ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ହେଉଛି। ସୋମବାର ଭସାଣି କାର୍ଯ୍ୟକ୍ରମ ହେବ। ଭସାଣିରେ ୮ଟି ପୂଜା ମଣ୍ଡପ ସାମିଲ ହୋଇଛନ୍ତି। ସକାଳ ୧୧ଟା ମଧ୍ୟରେ ମେଢ଼ ଗୁଡିକ ପାରମ୍ପରିକ ବାଦ୍ୟ ନୃତ୍ୟ ସହକାରେ ଅତିଥି ନିବାସ ନିକଟ ରାସ୍ତାରେ ଏକତ୍ରିତ ହେବେ। ସେଠାରୁ ମେଢ଼ ଗୁଡିକ ପର୍ଯ୍ୟାୟକ୍ରମେ ଭସାଣିରେ ବାହାରିବେ। ରାତ୍ର ୯ଟା ମଧ୍ୟରେ ଭସାଣି କାର୍ଯ୍ୟକ୍ରମ ଶେଷ ହେବ। ଏଥି ନିମନ୍ତେ ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି।