ବଲାଙ୍ଗୀର ଅଫିସ, ୧୭ା୫- ବଲାଙ୍ଗୀର ରେଲୱେ ଷ୍ଟେଶନକୁ ସୋମବାର ୩ଟି ଶ୍ରମିକ ସ୍ପେଶାଲ ଟ୍ରେନ୍ ଆସିବ। ଆନ୍ଧ୍ରପ୍ରଦେଶର ବିଶାଖାପାଟଣାରୁ ଆସୁଥିବା ଶ୍ରମିକ ସ୍ପେଶାଲ ଟ୍ରେନ୍ ସୋମବାର ଭୋର ୫ଟାରେ ପହଞ୍ଚିବ । ଏହାପରେ ଦିନ ସାଢ଼େ ୧ଟାରେ ଗୁଜରାଟର ରାଜକୋଟରୁ ଆସୁଥିବା ଶ୍ରମିକ ସ୍ପେଶାଲ ଟ୍ରେନ୍ ପହଞ୍ଚିବ। ଅପରାହ୍ଣ ୫ଟା ୧୦ରେ ତାମିଲନାଡୁର ଥିରୁଭାଲ୍ଲୁରଠାରୁ ଆସୁଥିବା ଶ୍ରମିକ ସ୍ପେଶାଲ ଟ୍ରେନ୍ ବଲାଙ୍ଗୀର ପହଞ୍ଚିବ । ଏହି ତିନି ଟ୍ରେନ୍ରେ ପ୍ରାୟ ୪ ହଜାର ପ୍ରବାସୀ ବଲାଙ୍ଗୀର ଆସି ପହଞ୍ଚିବେ ବୋଲି ଜଣାପଡିଛି । ସୋମବାର ତିନୋଟି ସ୍ପେଶାଲ ଟ୍ରେନ୍ ଆସୁଥିବାରୁ ଏବଂ ୪ ହଜାର ପ୍ରବାସୀ ଆସୁଥିବାରୁ ସମସ୍ତଙ୍କ ଆଗମନ ଓ ପ୍ରତ୍ୟାଗମନକୁ ସୁଗମ କରିବା ପାଇଁ ପ୍ରଶାସନ ପକ୍ଷରୁ ସୁବ୍ୟବସ୍ଥା କରାଯାଇଛି । ଏଥି ସକାଶେ ସହରର ବିଭିନ୍ନ ରାସ୍ତା ଓ କିଛି ନିର୍ଦ୍ଦିଷ୍ଟ ଅଞ୍ଚଳରେ ସୋମବାର ଭୋର ୪ଟାରୁ ରାତି ୧୧ଟା ପର୍ଯ୍ୟନ୍ତ ସମୁଦାୟ ୧୮ ଘଣ୍ଟା କର୍ଫ୍ୟୁ ଘୋଷଣା କରାଯାଇଛି । ଉପଜିଲାପାଳ ସଞ୍ଜୟ କୁମାର ମିଶ୍ର ଏନେଇ ସୂଚନା ଦେଇଛନ୍ତି ।
