ଇସ୍ଲାମାବାଦ,୧୩-୯(ପି.ଟି.): ପିଓକେକୁ ନେଇ ଛାନିଆ ହୋଇଯାଇଥିବା ପାକିସ୍ତାନର ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ ଶୁକ୍ରବାର ସେଠାକାର ରାଜଧାନୀ ମୁଜାଫରାବାଦ ଗସ୍ତ କରିବେ। ସେ ସେଠାରେ ସମ୍ବୋଧନ ବେଳେ କଶ୍ମୀର ସମ୍ପର୍କିତ ଏକ ‘ନୀତି ବିବୃତି’ ଜାରି କରିବେ ବୋଲି ଗୁରୁବାର ଇସ୍ଲାମାବାଦ ପକ୍ଷରୁ କୁହାଯାଉଛି। ପାକିସ୍ତାନ ବହିର୍ବ୍ୟାପାର ମୁଖପାତ୍ର ମହମ୍ମଦ ଫୈଜାଲ ଗଣମାଧ୍ୟମକୁ କହିଛନ୍ତି, କଶ୍ମୀର ପ୍ରସଙ୍ଗର ବୈଧତା ଅନ୍ତର୍ଜାତୀୟ ଆଇନ ଉପରେ ପର୍ଯ୍ୟବସିତ ହୋଇଥିବାରୁ ଏହାର ସମାଧାନ ପାଇଁ ପାକିସ୍ତାନ ତୃତୀୟ ପକ୍ଷର ମଧ୍ୟସ୍ଥତା ଚାହେଁ। ମଧ୍ୟସ୍ଥତା ପାଇଁ ଭାରତ ପ୍ରସ୍ତୁତ ନୁହେଁ, କିନ୍ତୁ ଆମେ ପ୍ରସ୍ତୁତ। ଆଲୋଚନା ମାଧ୍ୟମରେ ହିଁ ସମସ୍ତ ସମସ୍ୟାର ସମାଧାନ ହୋଇପାରିବ। ପ୍ରଧାନମନ୍ତ୍ରୀ ଇମ୍ରାନ୍ ଶୁକ୍ରବାର ମୁଜାଫରାବାଦ ଯାଇ କଶ୍ମୀର ପ୍ରସଙ୍ଗରେ ନୀତି ସ୍ପଷ୍ଟ କରିବେ ବୋଲି କହିଛନ୍ତି। ସେହିପରି କଶ୍ମୀରୀମାନଙ୍କ ଦୁର୍ଦ୍ଦଶାକୁ ବିଶ୍ୱର ସବୁ ମଞ୍ଚରେ ଉଠାଇ ସେମାନଙ୍କ ଅଧିକାର ପାଇଁ ସ୍ବର ଉତ୍ତୋଳନ ଜାରି ରହିବ। କଶ୍ମୀରୀଙ୍କ ଆମତ୍ନିର୍ଦ୍ଧାରଣ ଅଧିକାର ପାଇଁ ନୈତିକ, ରାଜନୈତିକ ଓ କୂଟନୈତିକ ସମର୍ଥନ ଦେବା ବଜାୟ ରଖାଯିବ ବୋଲି ପାକିସ୍ତାନ ବହିର୍ବ୍ୟାପାର ମନ୍ତ୍ରୀ ଶାହ ମେହମୁଦ୍ କୁରେଶୀ ଗୁରୁବାର ଇସ୍ଲାମାବାଦ ବିମାନବନ୍ଦରରେ କହିଛନ୍ତି।