ଭୁବନେଶ୍ୱର,୮ା୬(ବ୍ୟୁରୋ): କେନ୍ଦ୍ର ସରକାରଙ୍କ ଦ୍ୱିତୀୟ ପାଳି ସରକାରର ପ୍ରଥମ ବର୍ଷ ପୂର୍ତ୍ତି ପୂରଣ ଅବସରରେ ଭାଜପା ପକ୍ଷରୁ ସୋମବାର ଭର୍ଚୁଆଲ ରାଲି କାର୍ଯ୍ୟକ୍ରମ ଆୟୋଜନ କରାଯାଇଛି। ଗତବର୍ଷେ ମଧ୍ୟରେ କେନ୍ଦ୍ର ସରକାର ନେଇଥିବା ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଏବଂ ରାଜ୍ୟକୁ ମିଳିଥିବା ବିଭିନ୍ନ କ୍ଷେତ୍ର ବାବଦୀୟ ଅର୍ଥ ସମ୍ପର୍କରେ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ସମ୍ବୋଧନ କରିବେ। ଏଥିରେ ପ୍ରାୟ ଏକକୋଟି ଲୋକ ସାମିଲ ହେବେ ବୋଲି ରାଜ୍ୟ ଭାଜପା ପକ୍ଷରୁ କୁହାଯାଇଛି। ହେଲେ ଏହି ଭର୍ଚୁଆଲ ରାଲି କାର୍ଯ୍ୟକ୍ରମକୁ କଂଗ୍ରେସ ସମାଲୋଚନା କରିଥିବା ବେଳେ ବିଜେଡି ଏହା ସହ କିଛି ସମ୍ପର୍କ ନାହିଁ ବୋଲି କହିଛି।
ଭାଜପା ନେତା ପୃଥ୍ବୀରାଜ ହରିଚନ୍ଦନ କହିଛନ୍ତି ଯେ, ଭର୍ଚୁଆଲ ରାଲିର ଅର୍ଥ ବୁଝିବାକୁ କଂଗ୍ରେସକୁ ଆଉ ୫ବର୍ଷ ଲାଗିବ। ସେମାନେ ପ୍ରଥମେ ଏହାର ଅର୍ଥ ବୁଝନ୍ତୁ ତା’ପରେ ଏହା ଉପରେ କଥା କହିବେ। ଭର୍ଚୁଆଲ ରାଲିରେ କୋଟିଏ ଲୋକଙ୍କୁ ଯୋଡିବା ପାଇଁ ଯୋଜନା ହୋଇଛି। ସମସ୍ତେ ନିଜନିଜ ଘରେ ବସି ଏଥିରେ ଯୋଗଦାନ କରିବେ। ସେଥିରେ ସଫଳ ମଧ୍ୟ ହେବୁ। ଏଥିରେ ବିରାଟ ସଂଖ୍ୟାରେ ଲୋକ ଯୋଗଦେବେ। ୪ଟାରେ ଆରମ୍ଭ ହେବାକୁ ଥିବା ଏହି କାର୍ଯ୍ୟକ୍ରମରେ ସ୍ବରାଷ୍ଟ୍ର ମନ୍ତ୍ରୀ ଆତ୍ମନିର୍ଭର ଭାରତ ବାବଦରେ କହିବେ। ଏହା ସହ କେନ୍ଦ୍ର ସରକାର ରାଜ୍ୟ ପାଇଁ ଆଣିଥିବା ଯୋଜନା, ଏପର୍ଯ୍ୟନ୍ତ ଓଡ଼ିଶାର ଅର୍ଥନୀତି ଓ ସାଧାରଣ ଲୋକଙ୍କ ବିକାଶ ବାବଦରେ କହିବେ। ମୁଖ୍ୟତଃ ଏହା ଓଡ଼ିଶା ପାଇଁ କରାଯିବ ବୋଲି ହରିଚନ୍ଦନ କହିଛନ୍ତି।
କଂଗ୍ରେସ ନେତା ତଥା ଜଟଣୀ ବିଧାୟକ ସୁରେଶ କୁମାର ରାଉତରାୟ ଭର୍ଚୁଆଲ ରାଲିକୁ ସମାଲୋଚନା କରି କହିଛନ୍ତି, ଲକ୍ଡାଉନ ଓ ଶଟ୍ଡାଉନ ସମୟରେ ଏପରି ରାଲି ଆୟୋଜନ କରାଯିବା ବେଆଇନ। ରାଜନୈତିକ କାର୍ଯ୍ୟକ୍ରମ ବାରଣ କରାଯାଇଛି। ସ୍ବରାଷ୍ଟ୍ର ମନ୍ତ୍ରୀ କିପରି ଭାଷଣ ଦେବେ ବୋଲି ସୁରେଶ ପ୍ରଶ୍ନ ଉଠାଇଛନ୍ତି। ବିଜେଡି ନେତା ସଞ୍ଜୟ ଦାମବର୍ମା କହିଛନ୍ତି ଯେ, କିଏ କ’ଣ ରାଲି କଲା ସେଥିରେ କିଛି ଆମର ଯାଏ ଆସେ ନାହିଁ। ସେହି ପ୍ରସଙ୍ଗରେ ଆମର କୌଣସି ସମ୍ପର୍କ ମଧ୍ୟ ନାହିଁ। ବର୍ତ୍ତମାନ ଆମେ କୌଣସି ରାଜନୈତିକ କାର୍ଯ୍ୟକ୍ରମ କରିବୁ ନାହିଁ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶରେ ଆମେ ଏବେ କରୋନା ଲଢ଼େଇରେ ଲାଗିଛୁ ବୋଲି ସଞ୍ଜୟ କହିଛନ୍ତି।