ଅନୁଗୋଳ ଅଫିସ, ୪।୧୦- ଦୁର୍ଗାପୂଜା ପାଇଁ ସଜେଇ ହେଉଛି ଅନୁଗୋଳ ସହର। ଚଳିତବର୍ଷ ୧୧ ମଣ୍ଡପରେ ମା’ ଦଶଭୁଜାଙ୍କ ପୂଜାର୍ଚ୍ଚନା କରାଯିବ। ଶୁକ୍ରବାର ମା’ଙ୍କ ଷଷ୍ଠୀପୂଜା ହେବାକୁ ଥିବାରୁ ଏହାକୁ ନେଇ ସହରରେ ଉତ୍ସବର ପରିବେଶ ସୃଷ୍ଟି ହୋଇଛି। ସପ୍ତମୀରେ ବିଭିନ୍ନ ପୂଜା ମଣ୍ଡପ ପକ୍ଷରୁ କଳସଯାତ୍ରା କରାଯିବ।
ଚଳିତବର୍ଷ ସହରର ଅମଲାପଡ଼ା, ଶିମିଳିପଡ଼ା, ଦଶହରାପଡ଼ିଆ, ହୁଲୁରୁସିଂହା, ହେମସୁରପଡ଼ା, ରାଣୀଗୁଡ଼ା, ଶୁଶୁଡ଼ା, କାଲଟାକ୍ସ ଛକ, ବସଷ୍ଟାଣ୍ଡ ଓ ଗାନ୍ଧୀଛକରେ ପୂଜା ପାଇଁ ଆୟୋଜନ ଶେଷ ହୋଇଛି। ସମସ୍ତ ମଣ୍ଡପ ପକ୍ଷରୁ ଲୋକଙ୍କୁ ଆକୃଷ୍ଟ କରିବା ପାଇଁ ସାଜସଜ୍ଜା ସହ ବଡ଼ ବଡ଼ ତୋରଣ ପ୍ରସ୍ତୁତ କରାଯାଇଛି। ତେବେ ମା’ଙ୍କ ଆଗମନ ପାଇଁ ଷଷ୍ଠୀ ପୂଜାରେ ଷୋଡ଼ଶ ଉପଚାରରେ ପୂଜାର୍ଚ୍ଚନା କରାଯିବ। ବେଲବରଣୀ ୩ଟାରୁ ସାଢ଼େ ପାଞ୍ଚଟା, ସପ୍ତମୀ ପୂଜା ସକାଳୁ କଳସ ଯାତ୍ରା, ଘାଟରେ ଗଙ୍ଗାପୂଜା ହେବା ପରେ କଳସ ଆସି ମଣ୍ଡପରେ ସ୍ଥାପନ କରାଯିବ। ଅଷ୍ଟମୀ ପୂଜା ସାଧାରଣ ପୂଜା ସହ ସନ୍ଧିପୂଜା କରାଯିବ। ନବମୀ ପୂଜା ପରେ ଦଶମୀ ପୂଜା କରାଯିବ। ଅନୁଗୋଳରେ ଶିମିଳପଡ଼ା ପୂଜା ମଣ୍ଡପ ତାର ସ୍ବତନ୍ତ୍ରତା ବଜାୟ ରଖିଛି। ଅନୁଗୋଳର ପୁରାତନ ମଣ୍ଡପରେ ବଙ୍ଗୀୟ ରୀତିନୀତିରେ ପୂଜାଚ୍ଚନା କରାଯିବ, ଯାହା ଅନୁଗୋଳର ଅନ୍ୟ କୌଣସି ମଣ୍ଡପରେ କରାଯାଇ ନ ଥାଏ ବୋଲି ପୂଜା କମିଟି ପକ୍ଷରୁ ସୂଚନା ଦିଆଯାଇଛି। ୮ ତାରିଖରେ ପୂଜା ଶେଷ ପରେ ସହରରେ ୯ ତାରିଖରେ ଭସାଣି ଉତ୍ସବ ଅନୁଷ୍ଠିତ ହେବ ବୋଲି ସେଣ୍ଟ୍ରାଲ ପୂଜା କମିଟି ପକ୍ଷରୁ ନିଷ୍ପତ୍ତି ହୋଇଛି।