କାକଟପୁର,୪।୧୦(ଡି.ଏନ୍.ଏ): ପୁରୀ ଜିଲା କାକଟପୁର ମା’ ମଙ୍ଗଳାଙ୍କ ମନ୍ଦିରରେ ଆଶ୍ୱିନ ମୂଳାଷ୍ଠମୀ ତିଥିରୁ ଚାଲିଛି ଶାରଦୀୟ ପାର୍ବଣ ପୂଜା। ଶୁକ୍ରବାର ଆଶ୍ୱିନ ଶୁକ୍ଳ ସପ୍ତମୀ ତିଥି ଅବସରରେ ମା’ମଙ୍ଗଳା ପାରମ୍ପରିକ ପ୍ରଥାନୁସାରେ ଭକ୍ତଙ୍କୁ ସିଂହବାହିନୀ ବେଶରେ ଦର୍ଶନ ଦେବେ। ସନ୍ଧ୍ୟା ଆଳତୀ ପରେ ମା’ଙ୍କୁ ମହାସ୍ନାନକରି ପୂଜାପଣ୍ଡା ସିଂହବାହିନୀ ବେଶରେ ସଜ୍ଜିତ କରିବେ। ମା’ଙ୍କ ମୁଖାରବିନ୍ଦକୁ ଚନ୍ଦନ ପ୍ରଲେପ ଦିଆଯିବା ସହିତ କାଷ୍ଠ ନିର୍ମିତ ଏକ ସିଂହ ଏପରି ଖଞ୍ଜାଯିବ ଯେପରି ମା’ ସିଂହ ଉପରେ ବିରାଜମାନକରି ମହିଷାସୁରକୁ ଖୋଜିବା ପାଇଁ ଅଗ୍ରସର ହେଉଥିବାପରି ଲାଗିବ। ପୂର୍ବରୁ ମା’ଙ୍କୁ ପାଦପଦ୍ମ, ତୀରକମାଣ, ଖଡ଼ଗ, ରକ୍ତପାତ୍ର ଲାଗି କରାଯାଇଥାଏ। ସିଂହବାହିନୀ ବେଶ ଶାରଦୀୟ ପାର୍ବଣ ପୂଜା ଅବସରରେ ହେଉଥିବା ମା’ଙ୍କର ପ୍ରସିଦ୍ଧ ବେଶ ଅଟେ। ମା’ଙ୍କ ଏହି ବେଶ ଦେଖିବାକୁ ଲକ୍ଷାଧିକ ଶ୍ରଦ୍ଧାଳୁଙ୍କ ଭିଡ଼ ଲାଗିଥାଏ। ଏଥିପାଇଁ ମନ୍ଦିର ପ୍ରଶାସନ ଓ ସ୍ଥାନୀୟ ପୋଲିସ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିବା ବେଳେ ମନ୍ଦିର ଉତ୍ତରଦ୍ୱାର ନିକଟରେ ଭଜନ ସମାରୋହ ଅନୁଷ୍ଠିତ ହେବ। ମା’ଙ୍କ ବେଶପରେ ଭକ୍ତମାନଙ୍କୁ ବ୍ୟାରିକେଟ ମଧ୍ୟରେ ମନ୍ଦିର ଭିତରକୁ ଦର୍ଶନ ପାଇଁ ଛଡ଼ାଯିବାର ବ୍ୟବସ୍ଥା ହୋଇଥିବା କାକଟପୁର ଥାନା ଆଇଆଇସି ସୁମନ୍ତି ମହାନ୍ତି କହିଛନ୍ତି।
