ଜେନେଭା,୯।୨: ଜଳବାୟୁ ପରିବର୍ତ୍ତନ ଯୋଗୁ ଆଣ୍ଟାର୍କଟିକାରେ ତାପମାତ୍ରା ୧୮.୩ ଡିଗ୍ରୀ ଛୁଇଁଛି। ଏଭଳି ସ୍ଥିତି ଜାରି ରହିଲେ ଆସନ୍ତା ୮୦ ବର୍ଷ ମଧ୍ୟରେ ସମୁଦ୍ର ଜଳସ୍ତର ୩ ମିଟର ବଢ଼ିଯିବ। ତାପମାତ୍ରା ବଢୁଥିବାରୁ ୧.୪୨ କୋଟି ବର୍ଗ କିମି ଅଞ୍ଚଳର ହିମ ପାହାଡ଼ ତରଳି ଯିବ। ଏହାଦ୍ୱାରା ବହୁ ଦେଶ ତଥା ଉପକୂଳରେ ଥିବା ୧୧ଟି ବଡ଼ ବଡ଼ ସହର ସମୁଦ୍ର ଆଁରେ ରହିଯିବାର ଆଶଙ୍କା ଦେଖାଦେଇଛି। ୨୧୦୦ ମସିହା ବେଳକୁ ସମୁଦ୍ର ଜଳସ୍ତର ବଢ଼ିବା ଯୋଗୁ ଏଭଳି ସ୍ଥିତି ସୃଷ୍ଟି ହେବାର ଆଶଙ୍କା ଥିବା ଜେLନେଭା ସ୍ଥିତ ବିଶ୍ୱ ପାଣିପାଗ ବିଜ୍ଞାନ ସଂଗଠନ ପକ୍ଷରୁ ସୂଚନା ଦିଆଯାଇଛି। ସଂଗଠନର ପ୍ରବକ୍ତା କ୍ଲେର୍ ନଲିସ୍ କହିଛନ୍ତି ଯେ, ଖରାଦିନେ ଆଣ୍ଟାର୍କଟିକାରେ ତାପମାତ୍ରା ୧୫ ଡିଗ୍ରୀ ପର୍ଯ୍ୟନ୍ତ ଯାଇଥାଏ। ତେବେ ବର୍ତ୍ତମାନ ଖରାଦିନ ନ ଥିଲେ ବି ତାପମାତ୍ରା ଏଭଳି ରହିବା ଆଗତ ବିପଦର ସତର୍କ ସୂଚନା ଦେଉଛି। ଗତ ୫୦ ବର୍ଷ ମଧ୍ୟରେ ଆଣ୍ଟାର୍କଟିକା ତାପମାତ୍ରା ୩ ଡିଗ୍ରୀ ବଢ଼ିଛି। ତାପମାତ୍ରା ବଢୁଥିବାର ୧୯୭୯ ତୁଳନାରେ ୨୦୧୭ରେ ଏହା ୬ଗୁଣା ବୃଦ୍ଧି ପାଇଥିଲା। ଲଗାତାର ହିମ ପାହାଡ଼ ତରଳୁଥିବାରୁ ଜାକର୍ତ୍ତା,ହଷ୍ଟନ, ଲାଗୋସ୍, ଫ୍ଲୋରିଡ଼ା, ନ୍ୟୁ ଓରଲିୟନ୍ସ, ଢ଼ାକା, ଭେନିସ୍, ଭର୍ଜିନିଆ ଉପକୂଳ, ବ୍ୟାଙ୍କକ, ରୋଟ୍ରଡମ୍, ଆଲେକ୍ସଜାଣ୍ଡ୍ରିଆ ଆଦି ସହର ଆଗାମୀ ଦିନରେ ସମୁଦ୍ର ଗର୍ଭରେ ଲୀନ ହେବାର ଆଶଙ୍କା ରହିଥିବା ବିଶ୍ୱ ପାଣିପାଗ ବିଜ୍ଞାନ ସଂଗଠନ କହିଛି।