ଭୁବନେଶ୍ୱର, ୬।୬(କ୍ରୀଡ଼ା ପ୍ରତିନିଧି)-
ହିରୋ ଇଣ୍ଡିଆନ ସୁପର ଲିଗ୍(ଆଇଏସଏଲ)ର ୭ମ ସଂସ୍କରଣ ପୂର୍ବରୁ ଦୁଇ ଯୁବ ଡିଫେଣ୍ଡର ହେଣ୍ଡ୍ରି ଆଣ୍ଟୋନି ଓ ସୌରଭ ମେହେରଙ୍କ ସହ ଚୁକ୍ତି କରିଛି ଭୁବନେଶ୍ୱର ଭିତ୍ତିକ ଫ୍ରାଞ୍ଚାଇଜ୍ ଓଡ଼ିଶା ଏଫ୍ସି। ଗତ ଆଇ-ଲିଗ୍ ସିଜନରେ ଉଭୟ ଆଣ୍ଟୋନି ଓ ମେହେର ଇଣ୍ଡିଆନ ଆରୋଜ ପକ୍ଷରୁ ପ୍ରତିନିଧିତ୍ୱ କରିଥିଲେ। କ୍ୟାରିୟର ପ୍ରାରମ୍ଭରେ ସେମାନେ ଚେନ୍ନାଇନ୍ ଏଫସି ଦଳର ମଧ୍ୟ ସଦସ୍ୟ ଥିଲେ। ୨୦ ବର୍ଷୀୟ ରାଇଟ୍-ବ୍ୟାକ୍ ଆଣ୍ଟୋନି ୨୦୧୭ ଫିଫା ୧୭ ବର୍ଷରୁ କମ୍ ବିଶ୍ୱକପରେ ଭାରତ ପକ୍ଷରୁ ଖେଳିଥିଲେ। ସେହିପରି ସେଣ୍ଟର ବ୍ୟାକ୍ ମେହେରା ମଧ୍ୟ ଭାରତ ବିପକ୍ଷରୁ ଏଜ୍-ଗ୍ରୁପ ପ୍ରତିଯୋଗିତା ଗୁଡ଼ିକରେ ଖେଳିଥିଲେ। ଉଭୟ ଖେଳାଳିଙ୍କୁ ଓଡ଼ିଶା ଏଫସିକୁ ସ୍ବାଗତ କରିଛନ୍ତି ଓଏଫସି କ୍ଲବ ସଭାପତି ରୋହନ ଶର୍ମା। ଆଣ୍ଟୋନି କହିଛନ୍ତି ଯେ, ମୋତେ ନେବାପାଇଁ ଆଉ କେତେକ କ୍ଲବ ଆଗ୍ରହ ପ୍ରକାଶ କରିଥିଲେ। ମାତ୍ର ଓଡ଼ିଶା ଏଫସି ଯୁବ ଖେଳାଳିଙ୍କୁ ପ୍ରାଧାନ୍ୟ ଦେଉଥିବାରୁ ମୁଁ ଏହାସହ ଚୁକ୍ତିବଦ୍ଧ ହେବାକୁ ନିଷ୍ପତ୍ତି ନେଲି। ମୁଁ ଶିଘ୍ର କ୍ଲବର ଅନ୍ୟ ସଦସ୍ୟଙ୍କୁ ଭେଟିବାକୁ ବ୍ୟଗ୍ର ଏବଂ ଆଗାମୀ ଆଇଏସଏଲ ସିଜନରେ ପ୍ରଦର୍ଶନର ଛାପ ଛାଡ଼ିବାକୁ ପ୍ରତିଶ୍ରୁତିବଦ୍ଧ“। ସେହିପରି ”ଓଡ଼ିଶା ଏଫସିରୁ ଆଗାମୀ ସିଜନରେ ଆଇଏସଏଲ ଖେଳିବାକୁ ଯାଉଥିବାରୁ ମୁଁ ବହୁତ ଖୁସି। ଓଡ଼ିଶା ଏଫସିକୁ ଭୁବନେଶ୍ୱରରେ ବହୁତ ସମର୍ଥନ ମିଳିଥାଏ। ସେଠାରେ ଖେଳିବାକୁ ମୁଁ ଆଗ୍ରହର ସହ ଅପେକ୍ଷା କରିଛି“ ବୋଲି ମେହେର ପ୍ରକାଶ କରିଛନ୍ତି।
