କେନ୍ଦୁଝର, ୨୫।୯(ସ୍ବ.ପ୍ର.): କେନ୍ଦୁଝର ଜିଲା ଗ୍ରାମାଞ୍ଚଳରେ ରାସ୍ତାଘାଟ ସମସ୍ୟା ଯୋଗୁ କୁନିକୁନି ପିଲା ପାଣିରେ ପଶି ବିପଦପୂର୍ଣ୍ଣ ଅବସ୍ଥାରେ ସ୍କୁଲ ଯିବାଆସିବା କରୁଥିବା ଦେଖିବାକୁ ମିଳୁଛି। ତେବେ ସହରର ୮ ନମ୍ବର ୱାର୍ଡର ଭାଲୁକିପତଲା ସାହିରେ ଥିବା ପ୍ରାଥମିକ ବିଦ୍ୟାଳୟର ଛାତ୍ରୀଛାତ୍ର ଆଣ୍ଠୁଏ ପାଣିରେ ପଶି ସ୍କୁଲ ଯାଉଥିବା ଆଲୋଚ୍ୟର ବିଷୟ ହୋଇଛି। ବର୍ଷା ହେଲେ ରାସ୍ତାରେ ପାଣି ପ୍ରବାହିତ ହେଉଛି। ଅନେକ ସମୟରେ ସ୍କୁଲର ପ୍ରଧାନଶିକ୍ଷକ ଓ ସହକାରୀ ଶିକ୍ଷକ ପାଣି ଘେରରେ ପିଲାଙ୍କୁ ନେବାଆଣିବା କରିଥାନ୍ତି। ଜଳ ସ୍ରୋତ ପ୍ରବାହିତ ଅଞ୍ଚଳ ଜବରଦଖଲ ହୋଇଯାଇଥିବାରୁ ଏଭଳି ସମସ୍ୟା ସୃଷ୍ଟି ହେଉଛି। ବାହୁଟିଆ ନାଳ ଜବରଦଖଲ ହୋଇଥିବାରୁ ଏହି ପାଣି ନିଷ୍କାସନ ହୋଇ ନ ପାରି ରାସ୍ତା ଉପରେ ବହୁଛି। ଏ ନେଇ ପୌରପାଳିକାକୁ ସ୍ଥାନୀୟ ଲୋକେ ଜଣାଇଥିଲେ ମଧ୍ୟ କେହି ଶୁଣୁ ନ ଥିବାରୁ ଅସନ୍ତୋଷ ପ୍ରକାଶ ପାଉଛି।