ଓ୍ବାଶିଂଟନ,୨।୧୧: ପାକିସ୍ତାନ ଆତଙ୍କବାଦୀଙ୍କୁ ପାଣ୍ଠି ଯୋଗାଣ ରୋକିବାରେ ଅସଫଳ ହୋଇଛି। ଏନେଇ ଆମେରିକା ପକ୍ଷରୁ ପ୍ରକାଶିତ ଏକ ରିପୋର୍ଟରେ ଦର୍ଶାଯାଇଛି। ଆମେରିକା ବହିର୍ବ୍ୟାପାର ବିଭାଗ ଦ୍ୱାରା ପ୍ରକାଶ ପାଇଥିବା କଣ୍ଟ୍ରି ରିପୋର୍ଟ ଅନ୍ ଟେରୋରିଜିମ୍-୨୦୧୮ ରିପୋର୍ଟରେ ଏହା ସୂଚିତ ହୋଇଛି। ପାକିସ୍ତାନରେ ଆଫଗାନିସ୍ତାନର ତାଲିବାନ୍ ତଥା ହକ୍କାନି ଆତଙ୍କବାଦୀ ସଂଗଠନ ଦ୍ୱାରା ଭର୍ତ୍ତି କାର୍ଯ୍ୟକ୍ରମ ଓ ତାଲିମ୍ ଜାରି ରହିଛି। ପାକିସ୍ତାନର ରାଜନୈତିକ ନେତା ତାଲିବାନ୍ ଆତଙ୍କବାଦୀ ସଂଗଠନକୁ ଖୋଲାଖୋଲି ସମର୍ଥନ ଦେଉଥିବା ରିପୋର୍ଟରେ ପ୍ରକାଶ ପାଇଛି। ୨୦୧୮ ଜୁଲାଇରେ ଜମାତ୍-ଉଦ୍-ଦାଓ୍ବା ମୁଖ୍ୟ ଆତଙ୍କବାଦୀ ହାଫିଜ୍ ସଇଦ୍ ମିଲ୍ଲି ମୁସଲିମ୍ ଲିଗ୍ ଗଠନ କରି ନିର୍ବାଚନ ମଧ୍ୟ ଲଢ଼ିଥିବା ରିପୋର୍ଟରେ ଦର୍ଶାଯାଇଛି। ଇତିମଧ୍ୟରେ ପାକିସ୍ତାନରେ ସକ୍ରିୟ ଥିବା ଲଶ୍ମର-ଇ-ତୋଏବା, ଜୈଶ୍-ଇ-ମହମ୍ମଦ୍ ଏବଂ ଜମାତ୍-ଉଦ୍-ଦାଓ୍ବା ଆତଙ୍କବାଦୀ ସଂଗଠନର ପାଣ୍ଠି ସଂଗ୍ରହ ଲଗାତାର ବଢୁଥିବା ଏହି ରିପୋର୍ଟରେ କୁହାଯାଇଛି।