ଓ୍ବାଶିଂଟନ,୨୩।୧୧: ପୃଥିବୀରେ ଆତଙ୍କବାଦୀଙ୍କ ଏନ୍କାଉଣ୍ଟର ୨୦୧୭ ତୁଳନାରେ ୨୦୧୮ରେ ୧୫ ପ୍ରତିଶତ କମିଛି। ଏନେଇ ଗ୍ଲୋବାଲ୍ ଟେରୋରିଜିମ୍ ଇଣ୍ଡେକ୍ସ୍-୨୦୧୯ରେ ରିପୋର୍ଟ ପ୍ରକାଶ ପାଇଛି। ତେବେ ଗୋଟିଏ ବର୍ଷ ମଧ୍ୟରେ ଆତଙ୍କବାଦ ପ୍ରଭାବିତ ଦେଶଙ୍କ ସଂଖ୍ୟା ୭୧ରେ ପହଞ୍ଚିଛି। ୨୦୦୨ ପରେ ଦକ୍ଷିଣ ଏସିଆ ଆତଙ୍କବାଦ ଦ୍ୱାରା ଅଧିକ ପ୍ରଭାବିତ ହୋଇଥିବା ଏଥିରେ ପ୍ରକାଶ ପାଇଛି। ଅପରପକ୍ଷରେ ଏହି ସମୟରେ ମଧ୍ୟ ଆମେରିକା ଅଞ୍ଚଳ କମ୍ ପ୍ରଭାବିତ ହୋଇଛି। ସେହିପରି ୟୁରୋପରେ ଆତଙ୍କବାଦୀଙ୍କ ଏନ୍କାଉଣ୍ଟର ୭୦ ପ୍ରତିଶତ କମିଛି। ଏଥିରେ ଆଫଗାନୀସ୍ତାନରେ ଆତଙ୍କବାଦୀଙ୍କ ଯୋଗୁ ଅଧିକ ଲୋକଙ୍କ ମୃତ୍ୟୁ ଘଟିଥିବାବେଳେ ଏଥି ଲାଗି ତାଲିବାନ୍ ସଂଗଠନକୁ ଦାୟୀ କରାଯାଇଛି। ଅନ୍ୟ ଆତଙ୍କବାଦୀ ସଂଗଠନ ତୁଳାନରେ ୨୦୧୮ରେ ତାଲିବାନ୍ ଅଧିକ ଲୋକଙ୍କ ଜୀବନ ନେଇଛି। ତାଲିବାନ୍ ଦ୍ୱାରା ଏହି ବର୍ଷ ୬ ହଜାର ଶହେ ୩ ଜଣ ଲୋକଙ୍କୁ ହତ୍ୟା କରାଯାଇଥିବା ରିପୋର୍ଟରେ ପ୍ରକାଶ ପାଇଛି। ୨୦୧୮ରେ ଆତଙ୍କବାଦୀ ଆକ୍ରମଣରେ ୭ ହଜାର ୩ଶହ ୭୯ ଲୋକଙ୍କ ଜୀବନ ଯାଇଛି। ୨୦୧୭ ତୁଳନାରେ ସାଧାରଣ ଲୋକଙ୍କ ମୃତ୍ୟୁ ସଂଖ୍ୟା ୪୬ ପ୍ରତିଶତ ବଢ଼ିଛି। ଏହି ସମୟରେ ପଶ୍ଚିମ ଆଫ୍ରିକା ନାଇଜେରିଆରେ ମୌଳବାଦୀ ଅଧିକ ସକ୍ରିୟ ହୋଇଛନ୍ତି। ଅପରପକ୍ଷରେ ସୋମାଲିଆରେ ଆତଙ୍କବାଦୀ ଆକ୍ରମଣ ଘଟଣା କମିଛି। ଆତଙ୍କବାଦୀ ଆକ୍ରମଣ ଯୋଗୁ ୨୦୧୭ରେ ୫୪ ଶହ କୋଟି ଡଲାରର କ୍ଷତି ହୋଇଥିବାବେଳେ ୨୦୧୮ରେ ଏହା କମି ୩୩ ଶହ କୋଟି ଡଲାର ହୋଇଥିବା ଏହି ରିପୋର୍ଟରେ ପ୍ରକାଶ ପାଇଛି।