ନୂଆଦିଲ୍ଲୀ,୧୪।୭: ଭାରତରେ ଥିବା ଆତଙ୍କବାଦୀ ସଂଗଠନଗୁଡ଼ିକୁ ପାଣ୍ଠି ଯୋଗାଇବା ପାଇଁ ପାକିସ୍ତାନ ଏବେ ଚୋରା ନିଶାଦ୍ରବ୍ୟ କାରବାର କରୁଛି। ବିଗତ ଦିନରେ ସୀମାପାରରୁ ଆସୁଥିବା ବିପୁଳ ପରିମାଣର ବିଭିନ୍ନ ନିଶାଦ୍ରବ୍ୟ ଜବତ ହୋଇଛି। ଭାରତୀୟ ସୁରକ୍ଷା ସଂସ୍ଥା ଅନୁସାରେ ଜୁଲାଇ ୧୦ରେ ଭାରତୀୟ ଗୋଇନ୍ଦା ବିଭାଗ ସୂଚନା ଆଧାରରେ ଶ୍ରୀଲଙ୍କା ତଟରକ୍ଷୀ ବାହିନୀ ପକ୍ଷରୁ ଚଢ଼ାଉ କରାଯାଇ ୫୦ କିଲୋଗ୍ରାମ୍ ହେରୋଇନ୍ ଜବତ କରାଯାଇଥିଲା। ମେ ୨୬ରେ ମାଳଦ୍ୱୀପ ପୋଲିସ୍ ଇରାନର ଏକ ବୋଟ୍ରୁ ବିପୁଳ ପରିମାଣର ନିଶାଦ୍ରବ୍ୟ ଜବତ କରିଥିଲା। ସେହିପରି ଗତ ମେ ୨୧ରେ ଭାରତୀୟ ତଟରକ୍ଷୀ ବାହିନୀ ପକ୍ଷରୁ ଗୁଜରାଟର କଚ୍ଛ ଜିଲାର ଜାଖୁଠାରେ ଚଢ଼ାଉ କରାଯାଇ ଏକ ପାକିସ୍ତାନୀ ବୋଟ୍ରୁ ୨୧୮ କିଲୋଗ୍ରାମ୍ ହେରୋଇନ୍ ଜବତ କରାଯାଇଥିଲା। ଏସବୁ ପାକିସ୍ତାନର ଚୋରା ଚାଲାଣ ହେଉଥିବା କୁହାଯାଉଛି। ଭାରତରେ ଆତଙ୍କବାଦୀ କାର୍ଯ୍ୟ ଜାରି ରଖିବା ପାଇଁ ଏଭଳି କରାଯାଉଥିବା ଭାରତୀୟ ଗୋଇନ୍ଦା ବିଭାଗ ପକ୍ଷରୁ ସତର୍କ ସୂଚନା ଜାରି ହୋଇଛି।