ନୂଆଦିଲ୍ଲୀ,୩।୫ (ପି.ଟି.): ସମସ୍ତଙ୍କୁ ଚକିତ କରିବା ଭଳି କଥା କହିଛନ୍ତି ଭାରତୀୟ ତାରକା ଦ୍ରୁତ ବୋଲି ମହମ୍ମଦ ସାମି। ଆତ୍ମହତ୍ୟା କରିବାକୁ ୩ଥର ଚିନ୍ତା କରିଥିଲି ବୋଲି ସେ କହିଛନ୍ତି। ଗତକିଛି ବର୍ଷ ତଳେ ବ୍ୟକ୍ତିଗତ ସମସ୍ୟା ନେଇ ସଂଘର୍ଷର କରୁଥିବା ବେଳେ ଏଭଳି ନକାରାତ୍କମ ଚିନ୍ତା ମୁଣ୍ଡକୁ ଆସିଥିଲା। ସେତେବେଳେ ମୋ ପରିବାର ସବୁ ବେଳେ ମୋତେ ନଜର କରୁଥିଲେ ବୋଲି ଶାମି କହିଛନ୍ତି। କାରଣ ଆପାର୍ଟମେଣ୍ଟର ୨୪ତମ ମହଲାରୁ କାଳେ ଡେଇଁ ପଡିବି ବୋଲି ମୋ ପରିବାର ସଦସ୍ୟ ଭାବୁଥିଲେ।
ଶନିବାର ଇନ୍ଷ୍ଟାଗ୍ରାମରେ ନିଜର ଦଳୀୟ ସାଥି ତଥା ସୀମିତ ଓଭର ଉପ- ଅଧିନାୟକ ରୋହିତ ଶର୍ମାଙ୍କ ସହ ଚାଟ୍ କଲାବେଳେ ସେ ନିଜ ବ୍ୟକ୍ତିଗତ ଓ ପେସାଦାର ଜୀବନ ନେଇ ଏହି କଥା କହିଛନ୍ତି। ସେତେବେଳେ ଯଦି ମୋ ପରିବାର ସମର୍ଥନ କରି ନ ଥାନ୍ତେ ତା’ହେଲେ କ୍ରିକେଟ ଛାଡି ଦେଇଥାନ୍ତି। ବ୍ୟକ୍ତିଗତ ଜୀବନ କାରଣରୁ ଅତ୍ୟଧିକ ଚାପ୍କୁ ସାମ୍ନା କରିବାରେ ସମର୍ଥ ହୋଇପାରି ନ ଥିଲି। ଫଳରେ ୩ଥର ଆତ୍ମହତ୍ୟା କଥା ଚିନ୍ତା କରିଥିଲି ବୋଲି ସେ କହିଛନ୍ତି। ସେତେବେଳେ କ୍ରିକେଟ କଥା ଆଦୌ ଚିନ୍ତା କରୁ ନ ଥିଲି। ଆମେ ୨୪ତମ ତାଲାରେ ରହୁଥିଲୁ। ପରିବାର ଲୋକେ ଭାବୁଥିଲେ ଯେ, ବାଲକୋନୀରୁ କାଳେ ଡେଇଁ ପଡିବି। ମୋ ଭାଇ ସେତେବେଳେ ବହୁତ ସମର୍ଥନ କରିଥିଲେ। ଏବେ ୨୯ ବର୍ଷୀୟ ସାମି କ୍ରିକେଟ ଉପରେ ଫୋକସ କରୁଛନ୍ତି। ମୋର ୨-୩ ଜଣ ବନ୍ଧୁ ମୋ ସହିତ ବରାବର ୨୪ ଘଣ୍ଟା ସାଥିରେ ରହୁଥିଲେ। ଅନ୍ୟକଥା ନ ଭାବି କ୍ରିକେଟ କଥା ଚିନ୍ତା କରିବାକୁ ମାତାପିତା ମୋତେ ପରାମର୍ଶ ଦେଉଥିଲେ। ଏହାପରେ ଡେରାଡୁନ୍ର ଏକାଡେମୀରେ ଟ୍ରେନିଂ ଆରମ୍ଭ କରିଥିଲି ଓ ବହୁତ ଝାଳ ବୁହାଇଥିଲି ବୋଲି ସେ କହିଛନ୍ତି।
୨୦୧୮ ମାର୍ଚ୍ଚରେ ପତ୍ନୀ ହାସିନ ଜାହାଁ ସାମିଙ୍କ ବିରୋରେ ଘରୋଇ ହିଂସାର ଅଭିଯୋଗ ଆଣିଥିଲେ ଓ ମାମଲା ଦାୟର କରିଥିଲେ। ପୋଲିସ ମଧ୍ୟ ଏ ନେଇ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ମଧ୍ୟ ସାମିଙ୍କ କେନ୍ଦ୍ରୀୟ ଚୁକ୍ତିକୁ କିଛି ଦିନ ପାଇଁ ସ୍ଥଗିତ ରଖିଥିଲା। ଏହି ସମୟରେ ଏକ ସଡକ ଦୁର୍ଘଟଣାର ସମ୍ମୁଖୀନ ହୋଇଥିଲି। ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ଠିକ୍ ୧୦-୧୨ ଦିନ ପୂର୍ବରୁ ଏହି ଦୁର୍ଘଟଣା ହୋଇଥିଲା ଓ ଏତିକି ବେଳେ ବ୍ୟକ୍ତିଗତ ସମସ୍ୟା ସବୁଠାରୁ ଅଧିକ ଥିଲା ରୋହିତଙ୍କୁ ସାମି କହିଛନ୍ତି। କିନ୍ତୁ ସବୁ ସମସ୍ୟାର ସମାଧାନ ରହିଛି ବୋଲି ପରିବାର ଲୋକ ମୋତେ କହିଥିଲେ। ସେହିପରି ୨୦୧୫ରେ ବିଶ୍ୱକପ୍ରେ ଇଞ୍ଜୁରିର ସମ୍ମୁଖୀନ ହୋଇଥିଲା ଓ ଏହା ମଧ୍ୟ ବହୁତ କଷ୍ଟ ଦେଇଥିଲା। ଦଳକୁ ଫେରିବାକୁ ମୋତେ ୧୮ ମାସ ସମୟ ଲାଗିଥିଲା। ଏହା ମଧ୍ୟ ମାନସିକ ଭାବେ ବହୁତ କଷ୍ଟ ଦେଇଥିଲା ବୋଲି ସାମି ରୋହିତଙ୍କୁ କହିଛନ୍ତି।